Militantët bombarduan nga ajri shkollën ushtarake, 30 të vdekur në Libi

Këto xhirime tregojnë momentin kur një bombë e hedhur nga avionët ushtarakë i merr jetën 30 kadetëve të një shkolle ushtarake në Tripoli. 33 të tjerë mbetën të plagosur.

Momenti i goditjes me bombë u xhirua nga kamerat e sigurisë. Sulmi ndodhi të shtunën në shkollën e mesme ushtarake në jug të kryeqytetit të Libisë, që ndodhet nën kontrollin e qeverisë së Fajez al-Serrazhit, që njihet nga Kombet e Bashkuara. Kadetët janë të moshave nga 12-19 vjeç. Autoritetet në Tripoli akuzuan forcat e gjeneralit rebel Kalifa Haftar për sulmin. Megjithatë rebelët nuk e kanë marrë përsipër këtë sulm. 

Forcat e Haftarit po përpiqen prej Prillit të kaluar të pushtojnë Tripolin, të cilin po e mbajnë të rrethuar. 280 civilë dhe mbi 2 mijë luftëtarë kanë humbur jetën nga këto beteja, kryesisht në jug të kryeqytetit. Parlamenti turk miratoi më 2 Janar planin për dërgimin e trupave në ndihmë të qeverisë libiane kundër milicisë së Haftarit, me mision 1-vjeçar.

Tv Klan