Lajme, #edicioniinformativ ora 15:30, 23 Shkurt 2025 #TvKlan #klanlajme
Spiker: Oljana Maloku
Natë e qetë për Papën pas krizës së të shtunës. Mjekët nuk japin ende diagnozën për të ardhmen
Papa Françesku kaloi një natë të qetë në spitalin Xhemeli të Romës, por mjekët nuk bëjnë ende parashikime për të ardhmen. Gjendja e tij shëndetësore mbetet kritike pas përkeqësimit të së shtunës. Lutje për të edhe në kishat shqiptare.
Rama fton emigrantët të kthehen në Shqipëri: Pensionet europiane nuk bëhen kollaj
Kryeministri Edi Rama u bëri sot apel emigrantëve që të kthehen dhe të investojnë e punojnë në atdhe. Ai tha se pensionet europiane nuk bëhen kollaj, por shtoi se përpara ardhjes së PS në pushtet nuk ishte bërë asgjë për ta.
26 parti kërkojnë të garojnë në 11 maj. Afati për kërkesat mbyllet më 25 shkurt
Shkon në 26 numri i partive politike që kanë bërë kërkesë në KQZ për t’u regjistruar në procesin e 11 majit. Afati për dorëzimin e kërkesave përfundon pas 2 ditësh. Deri më 7 mars është afati për dorëzimin e kërkesave për koalicionet.
13 mijë të huaj në tregun shqiptar të punës. Dominojnë Italia, Turqia e India
Mbi 13 mijë të huaj janë regjistruar në tregun shqiptar të punës gjatë vitit që lamë pas duke shënuar një rritje të ndjeshme. Ekspertët thonë se dominojnë kërkesat nga Italia, Turqia dhe India, ndërsa sektorët më të kërkuar janë turizmi dhe ndërtimi.
Tentuan të vrisnin 30-vjeçarin, identifikohen 2 autorët. Në kërkim së bashku me “objektivin”
Zbardhet atentati i një nate më parë në Kamëz, ku dy persona qëlluan me armë zjarri ndaj një 30-vjeçari nga një makinë në lëvizje. Policia identifikon autorët dhe shpall në kërkim edhe të riun që ishte objektiv, pasi humbi gjurmët pas ngjarjes.
SHBA: Të shqetësuar për mbylljen e zyrave në veri. Rrezikohen pasoja negative për të ardhmen e Kosovës
Ambasada amerikane në Prishtinë reagon me shqetësim për mbylljen e papritur dhe të pakoordinuar të disa zyrave të punës sociale të drejtuara nga Serbia në veri të Kosovës. SHBA thotë se këto veprime do të kenë pasoja për të ardhmen e Kosovës.
Gjermania mban sot zgjedhjet parlamentare. Favoritë, CDU e Merz. Rritet ekstremi i djathtë
Në Gjermani zhvillohen sot zgjedhjet parlamentare. Favoritë për fitoren shihen kristiandemokratët në opozitë, por vëmendja është fokusuar edhe te rritja e ndjeshme e nacionalistëve, që mund të ngjiten në vend të dytë.
