Prej 5 muajsh, Edlira Çepani dhe familja e saj mbartin dhimbjen e humbjes së Gerti Bogdanit. Politikani u nda nga jeta papritur në moshën 44-vjeçare nga një atak kardiak duke lënë pas Edlirën dhe dy fëmijët e mitur.

Në rrëfimin e saj të parë pas kësaj humbjeje, në programin “Rudina” në Tv Klan, Edlira kujton marrëdhënien e tij të jashtëzakonshme me fëmijët.  “Ishte një baba perfekt.  Nëse do të  kishte një baba perfekt,  ishte ai”, u shpreh ajo. Ky fakt nuk e bënte më të lehtë detyrën për t’u treguar fëmijëve për tragjedinë, por e konsideron veten me fat që Gerti jeton ende në sytë e tyre.

Edlira Çepani: Ishte një…një nga momentet më të vështira në jetë. Nuk ka fjalë që e përshkruajnë dhimbjen dhe nuk ka fjalë sesi mund t’ia shpjegosh një fëmije një situatë të tillë. Fati i tyre është që ata  janë rritur në një familje e cila i ka dhënë  aq shumë dashuri, me një baba dhe dy prindër që u kanë dhënë  aq shumë dashuri sa ata kanë një dashuri të rrënjosur në zemër për  gjithë jetën. Një pengesë kaq e madhe patjetër që nuk do të plotësohet kurrë, por janë fryti më i bukur i dashurisë sonë dhe unë sa herë që shoh në sy secilin prej tyre, aty shoh Gertin… kam një fat kaq të madh që jam mamaja e tyre dhe kam një fat kaq të madh që Gerti më ka lënë një dhuratë kaq të bukur në jetë sa ata të dy.

Presidentja e Kosovës, Vjosa Osmani, më 17 Shkurt në Ditën e Pavarësisë nderoi me urdhrin “Ibrahim Rugova”, politikanin e ndjerë Gerti Bogdanin. Edlira bashkë me fëmijët ishin në ceremoni dhe për të simbolizon rëndësinë e trashëgimisë që bashkëshorti i saj ka lënë pas.

Edlira Çepani: Ishte një moment shumë emocionues për të gjithë ne sepse të gjitha këto nderime na kujtojnë se sa shumë impakt ai ka pasur dhe sa e rëndësishme është që të vijojë trashëëgimia që ai ka lënë pas. Unë e thashë edhe në fjalën që thashë, është një nder i veçantë që ky nderim bëhet nga Presidentja e Kosovës e cila është një personalitet jo vetëm në rajon, por edhe në botë, është një personalitet i shqiptarisë mbarë që na bën krenarë kudo që shkon, e cila në fakt ka qenë kolege, mikeshë me Gertin dhe së bashku kanë dhënë një kontribut për njohjen e Kosovës, për ndërkombëtarizimin e çështjes së Kosovës kudo që kanë shkuar dhe është gjithashtu një nder i veçantë që dekorata quhet “Ibrahim Rugova” sepse Ibrahim Rugova është simboli i qëndresës me dinjitet i gjtihë popullit të Kosovës dhe gjithë popullit shqiptar. Është një nderim i jashtëzakonshëm dhe jemi thellësisht mirënjohës për të./tvklan.al