Olivia Culpo do të bëhet nënë për herë të parë.
Modelja dhe aktorja ka njoftuar se është në pritje të ëmbël, një vit pas martesës me Christian McCaffrey.
“Kapitulli tjetër, mëmësia”, shkroi ajo krah disa fotove. Më pas, 32-vjeçarja postoi një video romantike duke puthur yllin 28-vjeçar të NFL teksa ecin përdore në një lëndinë.
Para se të ndante lajmin, modelja ishte fotografuar në fund të shkurtit në Los Angeles me duart në bark ndërsa po blinte diçka për të ngrënë.
Fjalët e para rreth shtatzënisë dolën në tetor 2024 kur ajo postoi disa foto ku në njërën prej tyre, McCaffrey i kishte vënë dorën në bark.
Modelja ka rrëfyer disa herë se dëshironte të kishte fëmijë, por kishte frikë nga diagnoza e saj, endometrioza. “Dua të kem fëmijë, por dua të sigurohem që mundem”, tha ajo në vitin 2022 gjatë një episodi të “Culpo Sisters”. “Mund ta kem të vështirë të bëj fëmijë. Endometrioza mund të ndikojë fertilitetin në mënyra të ndryshme. Mund të kesh inde endometri që rriten në ose pranë vezoreve, prek cilësinë e vezëve dhe tubave të falopit. Ka shumë gjëra që unë s’e di çfarë do të ndodhin në të ardhmen dhe shqetësohem për afatin tim. Ndihem sikur duhet të bëj fëmijë sa më shpejt”.
Modelja dhe futbollisti u lidhën në vitin 2019 ndërsa në qershor të vitit 2024 shkëmbyen betimet e martesës në ceremoninë e mbajtur në Rhode Island./tvklan.al
