Sistemi i shitjes së biletave për ndeshjet e Kombëtares Shqiptare ka ndryshuar. Federata Shqiptare e Futbollit njofton se me sistemin e ri, të gjitha biletat do të shiten online dhe një person mund të blejë deri në 4 bileta.

“Federata Shqiptare e Futbollit (FSHF) dëshiron të sqarojë publikun mbi sistemin e ri të shitjes së biletave për ndeshjet e Kombëtares, një vendim që synon të sigurojë barazi dhe gjithëpërfshirje për të gjithë tifozët shqiptarë. Në përputhje me praktikat më të mira evropiane, FSHF ka vendosur që të gjitha biletat të shiten online dhe çdo person të ketë mundësinë të blejë maksimumi 4 bileta. Ky sistem është vendosur për të garantuar një proces të hapur dhe të drejtë, ku çdo tifoz ka mundësi të barabartë për të qenë pjesë e mbështetjes së Kombëtares. Për shumë vite, grupe të ndryshme tifozësh kanë pasur mundësinë të sigurojnë bileta të rezervuara nga FSHF. Megjithatë, me rritjen e kërkesës për bileta dhe dëshirën për të krijuar një qasje më të hapur për të gjithë tifozët shqiptarë, është vendosur që nga tani e tutje biletat të jenë të aksesueshme përmes një procesi të drejtë dhe transparent”.

Sipas FSHF, ky sistem i ri i shitjes së biletave u mundëson të gjithë tifozëve që të jenë të pranishëm në ndeshjet e kombëtares.

“FSHF vlerëson dhe respekton të gjithë ata që kanë mbështetur Kombëtaren ndër vite dhe beson se tifozëria shqiptare, në të gjithë larminë e saj, do të vazhdojë të krijojë atmosferën e zjarrtë që gjithmonë ka dalluar ndeshjet e Kombëtares sonë. Ky vendim nuk synon përjashtimin e askujt, por përkundrazi, garantimin e mundësisë për të gjithë tifozët që duan të jenë pjesë e spektaklit të Kombëtares.

FSHF mbetet e hapur për çdo sugjerim apo diskutim që ndihmon në përmirësimin e përvojës së tifozëve dhe në forcimin e lidhjes mes ekipit Kombëtar dhe mbështetësve të tij të zjarrtë”, thuhet në reagimin e FSHF.

Të premten më 21 Mars, ora 20:45, në Uembli do të luhet sfida Angli-Shqipëri, e vlefshme për kualifikueset e Botërorit 2026.

Ndeshjen e kombëtares do të keni mundësi ta ndiqni falas në ekranin e Tv Klan.

/tvklan.al