Skandal me mbetjet urbane në Vlorë. Prej disa ditësh vendgrumbullimi i plehrave ndodhet nën flakë.

Tymi ka mbuluar të gjithë qytetin bregdetar, ku aktualisht pushojnë mijëra turistë, shqiptarë e të huaj.

Siç e shihni në këto pamje, shtëllungat e tymit janë përhapur në plazhet e bregdetit të Vlorës, duke detyruar pushuesit të largohen.

Klan News ishte pranë këtij venddepozitimi edhe gjatë orëve të mbrëmjes ku pa nga afër katastrofën e krijuar.

Shtëllungat e tymit të shkaktuara nga djegia e mbetjeve të qytetit të Vlorës, vijuan të jenë prezente edhe gjatë natës duke mbuluar një pjesë të madhe të qytetit.

Ky skandal është një kronikë e paralajmëruar. Prej katër vitesh gjatë sezonit turistik ky vendgrumbullim kthehet në një gangrenë për pushuesit.

Zgjidhja e problemit të plehrave në Vlorë dhe në Orikum, tëe cilat po dëmtojnë mjedisin dhe imazhin e Shqipërisë turistike, është mbajtur peng nga Ministria e Turizmit dhe Mjedisit.

Kjo ministri duhet të kishte miratuar kuadrin ligjor që në muajin nëntor të vitit 2023 në mënyrë që të mundësonte operimin e landfillit të Sherishtës, që do t’i jepte zgjidhje problemit të mbetjeve…Siç e shihni nga pamjet, landfilli i Sherishtës ka përfunduar.

Në nëntor 2023 u ndryshua kuadri ligjor për t’i i transferuar përgjegjësitë për mbetjen nga Ministria e Infrastrukturës dhe Energjisë tek Ministria e Turizmit dhe Mjedisit. Ky ndryshim çoi në nevojën për të ndryshuar marrëveshjet e financimit për projektin. Pa këto marrëveshje KFW nuk miraton as financimin e supervizorit dhe as përfundimin e pjesës te mbetur te punimeve në landfillin e Sherishtës. Po kanë kaluar 8 muaj dhe dokumentacioni nuk është ende gati.

8 muaj për një VKM, e cila, nëse do te ishte miratuar në kohë, do ta kishte evituar këtë katastrofë mjedisore dhe këtë pamje skandaloze, që përbën reklamën më të keqe të Shqipërisë turistike.

Zgjidhja është vonuar edhe nga Ministria e Financave, pjesë e ndryshimit të kuadrit ligjor për të vënë në punë landfillin e Sherishtës.

Miratimi i kuadrit ligjor do të zgjidhte edhe katastrofën tjetër mjedisore me plehrat e Orikumit. Këto plehra hidhen anës rrugës kombëtare që të çon në perlën e bregdetit shqiptar dhe që fatkeqësisht ky vendgrumbullim amator i plehrave, e prezanton tmerrësisht shëmtuar këtë mrekulli të bregut të jugut.

Ajo që shohim sot në këto pamje, nuk është gjë tjetër veçse një dështim i Ministrisë së Turizmit e Mjedisit dhe Ministrisë së Financave, përgjegjëse për katastrofën mjedisore qe po përjeton Vlora për anti-reklamën më të madhe që mund t’i bëhet Shqipërisë turistike.

Klan News