Lajme, #edicioniinformativ ora 22:50 data 8 Dhjetor 2024 #TvKlan #klanlajme

Spiker: Reis Çiço

Headline 8 dhjetor 2024

34 vjet nga “8 Dhjetori”,Berisha: Sot, një diktaturë e re. Mesazhe nga Begaj, Rama dhe Spiropali
Mbushen 34 vite nga nisja e protestave studentore që kulmuan me rrëzimin e komunizmit. Në një marshim të të rinjve demokratë, Berisha tha se sot vendi është në një diktaturë të re. Mesazhe për këtë ditë shpërndanë edhe Begaj, Rama e Spiropali.

Tritol ndaj një lokali në Vlorë. I përket familjarëve të Bledar Birçes, të vrarë në 2021
Një shpërthim i fuqishëm eksplozivi shkatërroi fasadën e një lokali në zonën e “Ujit të ftohtë” në Vlorë mëngjesin e kësaj të diele. Biznesi u përket familjarëve të biznesmenit Bledar Birçe i ekzekutuar në këtë qytet në vitin 2021.

Mjekët: Rriten rastet e lindjeve premature. Shkaku kryesor, mosha e madhe për lindjen e parë
Mjekët vërejnë një rritje të rasteve të foshnjave që lindin para kohe vitet e fundit në vendin tonë. Sipas tyre shkak është rritja e moshës së nënave që lindin fëmijën e parë. Foshnjat e lindura prematurë përballen me rreziqe të shumta.

Shumica e banesave në Shqipëri janë të vjetra. Afro 26% e tyre kanë një moshë mbi 43-vjeçare
Më shumë se gjysma e banesave në Shqipëri kanë një vjetërsi të madhe duke u përkthyer në kosto mirëmbajtjeje për banorët. 26% e këtyre ndërtimeve rezultojnë të jenë ndërtuar përpara vitit 1981 duke numëruar mbi 43 vjet.

Hashim Thaçi mohon akuzat e “Speciales”: S’jam në garë elektorale, s’paraqes rrezik për askënd
Ish-Presidenti i Kosovës, Hashim Thaçi u njoh sot me akuzat e reja të ngritura nga Prokuroria Speciale e Hagës. Përpara trupës gjykuese ai tha se nuk është pjesë e garës elektorale në Kosovë dhe se nuk përbën rrezik për askënd.

Bie pas 24 vitesh regjimi i Bashar Al-Assad në Siri. Rebelët marrin Damaskun, Presidenti braktis vendin
Regjimi i Bashar al-Asadit tashmë ka marrë fund pas 24 vitesh sundim, pasi rebelët sirianë morën gjatë natës edhe në kryeqytetin Damask. E ardhmja e vendit është tashmë në pikëpyetje pasi rrezikon të shndërrohet në një vend ekstremist.

Rozana Radi & Sany, fitues të “Kënga Magjike”. Emocione dhe spektakël në ekranin e Tv Klan
Rozana Radi dhe Sani u shpallën fitues të edicionit të 24-t të festivalit “Kënga Magjike” që erdhi drejtpërdrejt në ekranin e TV Klan mbrëmjen e së shtunës. Në natën finale në Pallatin e Koncerteve ishin të shumta emocionet në skenë.

/tvklan.al