Presidenti i Rusisë, Vladimir Putin ka uruar Donald Trumpin për fitoren në Presidencialet 2024 dhe ka deklaruar se është gati për bisedime me homologun e tij amerikan.

Gjatë fjalës së tij në një takim në qytetin rus të Soçit, Putin i dërgoi urimet Trumpit për zgjedhjen e tij si President i SHBA. Më tej, ai i përshëndeti veprimet e Trumpit gjatë tentativës së tij për ta vrarë si të “guximshme”.

“Më bëri përshtypje. Ai është një person i guximshëm. Një person tregon karakterin e tij të vërtetë në këto emergjenca dhe mendoj se ai e përballoi në mënyrë të admirueshme.”

Putin vuri në dukje se Trump ka shprehur dëshirën për t’i dhënë fund konfliktit në Ukrainë dhe se deklarata të tilla meritojnë të paktën vëmendje. Presidenti rus shtoi se ishte i hapur për të marrë një telefonatë nga Trump.

Nga ana tjetër, Trump ka premtuar vazhdimisht që do t’i japë fund të shpejtë konfliktit në Ukrainë edhe pse nuk ka dhënë shumë detaje se si do ta bëjë të mundur një gjë të tillë.

Ndërkohë, Moska thotë se çdo zgjidhje duhet të fillojë me ndërprerjen e operacioneve ushtarake nga Ukraina dhe duke pranuar se ajo nuk do të rimarrë asnjëherë kontrollin e rajoneve të Donetsk, Lugansk, Kherson dhe Zaporozhye, si dhe Krimenë.

Përveç kësaj, Kremlini këmbëngul se qëllimet e operacionit të tij ushtarak, të cilat përfshijnë neutralitetin ukrainas, çmilitarizimin dhe denazifikimin, do të arrihen./tvklan.al