Presidenti i sapozgjedhur i SHBA-së, Donald Trump, tha të martën se kishte zgjedhur John Ratcliffe, për të shërbyer si drejtor i Agjencisë Qëndrore të Inteligjencës (CIA).

Ratcliffe është një aleat i ngushtë i Trump, i cili ishte drejtor i Inteligjencës Kombëtare Amerikane në fund të mandatit të parë presidencial.

Kohët e fundit, ai ishte bashkëkryetar i Qendrës për Sigurinë Amerikane, një institut kërkimor që mbronte pozicionet e Trump dhe këshilloi ish-presidentin republikan për politikat e sigurisë kombëtare gjatë fushatës së tij 2024.

“Mezi pres që John të jetë personi i parë që do të shërbejë në të dyja pozicionet më të larta të Inteligjencës së Kombit. Ai do të jetë një luftëtar i patrembur për të drejtat kushtetuese të të gjithë amerikanëve, duke siguruar nivelet më të larta të sigurisë kombëtare, “tha Trump në një deklaratë.

Ratcliffe shërbeu si drejtor i Inteligjencës Kombëtare nga fundi i Majit 2020 derisa Trump u largua nga detyra në Janar 2021.

Ratcliffe premtoi se do të monitorojë nga afër çështje si ushtria e Iranit, programi i armëve bërthamore të Koresë së Veriut dhe ndërhyrjet e huaja në zgjedhjet e SHBA.

Kur Ratcliffe u konfirmua si drejtor i Inteligjencës Kombëtare në vitin 2020 nga Senati me shumicë votash republikane, të gjithë senatorët demokratë votuan kundër emërimit të tij, duke përmendur mungesën e përvojës.

Por, me republikanët që do të kontrollojnë sërish Senatin vitin e ardhshëm, tashmë me përvojën që Ratcliffe ka, votimi i tij pritet të bëhet lehtësisht.

/tvklan.al