#EDielaShqiptare nga #ArditGjebrea prej vitit 2008 në #TvKlan, programi më popullor në të gjitha familjet shqiptare çdo të dielë. Një program i cili përfshin një fashë orari maratonë, prej 6 orësh transmetim.

“Gjenerata Alfa”- Agresiviteti në adoleshencë

Të ftuar:

  • Pranvera Dhima, Trajnere prinderimi
  • Entela Alushi, Drejtore e shkolles 9 vjecare “Jeronim de Rada”
  • Lediona Asabella, Punonjese sociale, pedagoge
  • Valbona Biba, Oficere sigurie
  • Klaudia Hasanllari, Kriminologe, Drejtore e Qendrës së Parandalimit të Krimeve të të Miturve dhe të Rinjve ne Ministrine e Drejtesise

Vrasja e 14-vjeçarit, të rinjtë pohojnë të vërtetën tronditëse: Nuk jemi të shokuar, por të familjarizuar

Lajmi i vrasjes së 14-vjeçarit në shkollën “Fan Noli” nga bashkëmoshatari i tij ka qenë ngjarja më shokuese e ditëve të fundit. Tragjedia në vetvete është një pjesë e saj, teksa nga ana tjetër ka ndezur  diskutimin e dhunës te të rinjtë, rritjen e një brezi agresiv, problemet familjare, psiko-sociale, rolin e shkollës e institucioneve dhe mbi të gjitha pyetjen se pse asgjë nuk funksionoi.

Në nisje të “Gjeneratës Alfa”, pyetja e parë që  drejtuesi i së “Dielës Shqiptare” në Tv Klan, Ardit Gjebrea u bëri të rinjve ishte të përshkruanin si ishte kjo javë për ta. Ndërsa shprehën trishtimin, ata nuk fshehën një të vërtetë tronditëse: për ta, fenomene të tilla janë të njohura.

Ilda: Për t’i kthyer edhe njëherë përgjigje pyetjes që ju bëtë “a jeni të familjarizuar?”, ne jemi. Pra, të dëgjsh një lajm shokues dhe të mos shokohesh, është e tmerrshme. Ju pyetët edhe si e diskutojmë në familjet tona këtë rast apo këtë lajm. Më të shokuar janë prindërit se ne. Ne jemi shumë pranë këtyre sherreve që fatmirësisht jo gjithmonë përfundojnë në thika, por është shumë e tmerrshme që në familjen tonë akoma prindërit na pyesin ne si ka mundësi që ndodh një gjë e tillë dhe është prindi i pari që nuk kontrollon fëmijën sesi del, si sillet apo si konfrontohet me fëmiëjt e tjerë në shkollë. Në familjet tona sigurisht që diskutohet një gjë e tillë dhe shikohet ndonjëherë si rast i izoluar, por me shumë keqardhje e them që nuk është rast i izoluar dhe fatmirësisht nuk përfundon gjithmonë kështu, por nis gjithmonë kështu.

Ardit Gjebrea: Domethënë ju jetoni me këto sherre?

Ilda: Patjetër që jetojmë me këto sherre. Sherret që pse më pe shtrembër apo pse i fole asaj që e di unë që s’duhet t’i flasësh, sherre të tilla të pakuptimta janë pjesë e përditshmërisë sonë fatkeqësisht.

“Kujdes shëndetin”- Roboti në kancerin gjinekologjik,Liv Hospital

“Ka një mesazh për ty”-E pazaktontë,vajza e përbashkët me shoqen

Jeton në shtëpi me ‘motrën’ që njohu në Facebook: Vajza i tha “baba” burrit të saj

Eldën e kanë sjellë një “Ka Një Mesazh PërTy” dy njerëz shumë të  rëndësishëm të jetës së saj, nëna dhe shoqja të cilën e quan motër. Rrëfimin për rubrikën e së “Dielës Shqiptare” në Tv Klan ajo e nis me gruan që i ka dhënë jetë asaj dhe dy djemve, të rritur në rrethana shumë të vështira.

Elda nisi punë që në moshën 15-vjeçare dhe pak vite më vonë, u martua me mblesëri. Në fillim gjendja dukej mirë, por në shtëpinë bashkëshortore dhuna psikologjike ishte aq e fortë sa e kishte të pamundur të qëndronte. Nëna i hapi menjëherë derën Eldës dhe vajzës së saj që sapo kishte ardhur në jetë.

Por edhe në shtëpinë e prindërve s’ishte e lehtë. Elda punonte e emigronte për të siguruar të ardhura dhe e ëma kujdesej për të bijën. Tre vite më parë, sfidat ishin të mëdha por teknologjia solli Orestian në jetën e Eldës dhe vajzës.

Elda: Para  tre vjetësh, njoha edhe një shoqe që e kam sot shoqe. Jo shoqe, por motër.

Ardit Gjebrea: Ku e njohe?

Elda: E njoha në Facebook.

Ardit Gjebrea: Si e njohe?

Elda: Thjesht më çoi një ftesë dhe e njoha, i tregova historinë time me të gjitha hallet që kam kaluar. Takoi edhe vajzën, u lidh shumë shpirtërisht pas vajzës sime dhe vajza ime i thirri për herë të parë baba burrit të saj.

Ardit Gjebrea: Sa vjeç ishte vajza?

Elda: Vajza ka qenë 4 vjeçe kur e kam njohur.

Ardit Gjebrea: Dhe ti takove vajzën me shoqen tënde dhe me bashkëshortin e saj.

Elda: Po, aktualisht unë jetoj te familja e tyre tani. Ka tre vjet që jetojmë të gjithë bashkë, unë, vajza dhe bashkëshorti i saj.

Ardit Gjebrea: Po si, të ftuan që të jetoje me ta?

Elda: Po, ajo u lidh shumë shpirtërisht me vajzën time dhe më ftoi, “më tha do të vish të jetosh me ne” dhe unë pranova se ishin kushtet shumë ekstreme te familja ime.

Ardit Gjebrea: Kanë shtëpi të bollshme?

Elda: Kanë shumë shtëpi, 120 metra katrorë.

Ardit Gjebrea: Dhe ato e trajtojnë Amelian si të ishte vajza e tyre.

Elda: Po. Ata kanë 12 vjet martesë dhe nuk kanë fëmijë dhe vajzën time e trajton jo si vajzën e saj, por tepër vajzës së saj.

“Më tërhoqën sytë e saj”/ U bë nënë e dytë për vajzën e shoqes: Pa të s’jetoj!

Orestia është një nga shembujt sesi nënë nuk është vetëm gruaja që të lind. Pas surprizës nga Elda  në “Ka Një Mesazh Për Ty” nga “E Diela Shqiptare” në Tv Klan, ajo tregon më shumë për vogëlushen që i lidh fort  të dyja.

Elda dhe Orestia u njohën në Facebook tre vite më parë dhe gjetën një motër te njëra-tjetra. Kur Orestia njohu vajzën e Eldës, Amelia u ndie si ta kishte të sajën ndaj propozoi që të dyja të jetonin me të dhe bashkëshortin e saj. Tashmë Amelia ka dy nëna ndërsa bashkëshortin e Orestias e quan “baba”.

Ardit Gjebrea: Cili ishte momenti që vendose? Çfarë të tërhoqi ty? Të tërhoqi Elda, Amelia?

Orestia: Më tërhoqën sytë e Amelias që kishte nevojë jo për nënë të dytë, por më shumë për baba dhe ajo dashuria e një fëmije që kur të takon, të takon me krahë hapur, ajo ishte ndjesia më e bukur.

Ardit Gjebrea: Kjo ishte ndjesia kur takove Amelian. Sa vjeç ishte Amelia kur e takove?

Orestia: 4 vjeçe.

Ardit Gjebrea: Dhe pasi të tregoi historinë ty Elda, ju vendosët që…që në atë moment e menduat apo pasi takuat Amelian?

Orestia: Në atë moment e mendova, por pastaj kur takova Amelian ishte një fëmijë i voggël,  me flokë kaçurrelë,  sytë e bukur dhe thashë pse jo?  të bëhesh një nënë e dytë është mrekullia vetë.

Orestia shton se e kishte kuptuar që Elda kishte nevojë për ndihmë dhe ajo vendosi t’ia ofronte. Lidhja që ka me vajzën e Eldës është kaq e fortë sa do t’i ndiqte kudo të shkonin.

Orestia: Ajo e di shumë mirë se unë pa Amelian nuk jetoj.

Ardit Gjebrea: Kaq shumë je lidhur me të?

Orestia: Po. Pa Amelian nuk jetoj. Pa këtë mund të jetoj s’e kam problem, ama pa fëmijën tim kurrë në botë.

“Shihemi ne Gjyq” – Vëlla e motër në “luftë” për trashëgiminë

“S’e konsideroj më baba!” Premtimi i pambajtur tensionon familjen, djali i kërkon motrës të lërë studion 

Një premtim i pambajtur e ka sjellë Vangjelin në “Shihemi në Gjyq”. Ai ka kërkuar të përballet me të atin, por ndërmjetësja e rubrikës të së “Dielës Shqiptare” në Tv Klan, Eni Çobani shpjegon se Vangjeli nuk është në dijeni që do të gjendet përpara motrës, Parashqevisë.

Megjithatë, edhe babai, Andoni gjendet i pranishëm në studio. Sapo Vangjeli hyn dhe nis të prezantohet, ai shkon drejt tij por pritet nga fjalët e ashpra të djalit.

Andon: Kush je ti? Je im bir? Nuk ke turp, më bie para… nuk ke turp që më bie këtu?

Vangjel: Si s’kam turp? Ti premtimet që ke bërë pse s’i mban? Ka vite që më sorollat lart e poshtë.

Andon: Të kam bërë premtim për atë që s’e kam sot.

Vangjel: Ça s’ke sot?

Andon: Dje e kisha, sot s’e kam.

Vangjel: Çfarë s’ke sot?

Andon: Znj. Eni, ka një problem.

Eni Çobani: Andon, të lutem. Vangjeli të pret përballë, nuk të pret aty ku je ulur. Pra, do të ulesh sot përballë apo ke sjellë njeri tjetër?

Andon: Jo, kam prurë çupën se jam dy herë i operuar, në dy vjet jam operuar dy herë dhe nuk ia dal dhe ky zotëria e di.

Vangjel: Unë thirra z. Andon Capo, nuk kam thirrur çupat e tij.

Eni Çobani: Ja ku e ke, mirë është t’i thoni baba, por ju i thoni në  emër, s’ka problem.

Vangjel: Ka qenë baba, por sot unë nuk e konsideroj më baba.

Andon: Kush ta ka dhënë edukatën të më thuash zotëri mua ti?

Vangjel: Zotëri je tani.

Andon: Kush flinte në kapanon poshtë duke punuar dhe ti ktheheshe nga piceria në orën 3 të mëngjesit? A flija unë? Të kam çuar në shkollë ty dhe motrat e mia?

Vangjel: Po premtimet kujt ia ke bërë?Mua apo atyre?

Andon: Premtimet kur të zgjidhet çështja.

Vangjel: Ka vite që thua i zgjidh unë problemet.

Edhe ndaj Parashqevisë, Vangjeli nuk kursehet pasi i drejtohet vazhdimisht si “zonjë” dhe i kërkon të dalë nga studioja.

Vangjel: Ti duhet të ikësh, ai duhet të vijë këtu.

Parashqevi: Ik ulu atje!

Vangjel: Nuk ulem!

Parashqevi: Si guxon ti më kap me dorë mua?

Vangjel: Moj, nuk ulem! Ik andej, dil nga kjo studio!

“Pasuria i ngelet djalit!” Vangjeli kapet pas ‘traditës’ për të marrë pronën: Kam gjak shqiptari!

Vangjeli ka ardhur në “Shihemi në Gjyq” të kërkojë pronën që pretendon se ia ka premtuar i ati, Andoni. Ai ka kërkuar që të përballet me të në rubrikën e së “Dielës Shqiptare” në Tv Klan, por për shkak të gjendjes shëndetësore të Andonit, përpara tij është motra e madhe, Parashqevia. Andoni ndodhet i pranishëm në studio për të dëgjuar fëmijët e tij.

Vangjeli nis të thotë se bëhet fjalë për një deklaratë nga i ati përmes së cilës ai i ka premtuar se do të marrë shtëpinë që kanë në lagjen “Mangalem” në Berat. Por ndërsa parashtron kërkesat e tij, Vangjeli bën edhe një deklaratë të habitshme se siaps traditave, prona i takon atij.

Parashqevi: Po çfarë deklarate?

Vangjel: Moj nga e di ti çfarë deklarate? Apo vini këtu ju dhe kërkoni gjëra që s’ju takojnë? Ai zotëria që është ulur aty…

Eni Çobani: Është babai juaj ai zotëria.

Vangjel: Ka qenë, më ka premtuar që para 10 vitesh…

Parashqevi: Ore Vangjel çfarë po thua?

Eni Çobani: Ore ta lëmë Parashqevi ta dëgjojmë, të lutem tani!

Vangjel: Rri urtë aty dhe mos flit fare! S’ke fare pjesë!

Eni Çobani: Të lutem, Vangjel! Ku është prona të lutem? Sqaro pronën.

Vangjel: Prona është… nuk ishte në gjendje të mirë dhe më premtoi që ajo pronë do të ishte imja.

Eni Çobani: Ku është prona se je shumë i emocionuar, ku ndodhet prona?

Vangjel: Prona ndodhet në lagjen “Mangalem”, Berat.

Eni Çobani: Po, në lagjen “Mangalem”, këtë na sqaro. E kujt është prona? Ju jeni Parashqevi Capo, motra e madhe.

Parashqevi: Po, kemi një motër tjetër, Vjosana.

Eni Çobani: Zotëria është i treti?

Parashqevi: Ky është i treti, është i vogli fare dhe vjen e na kërkon neve llogari.

Eni Çobani: Një vëlla ke?

Parashqevi: Po, një vëlla.

Eni Çobani: Një vëlla shyqyr që e ke, me dashuri të lutem.

Vangjel: Moj ça je, je shqiptare apo italiane? Sipas traditave shqiptare, pasuria…

Parashqevi: Ça tradite shqiptare Vangjel? Po sa vite? Ke 20 vite në Itali, po nuk të vjen turp?

Vangjel: Gjakun e kam shqiptar unë! More vesh? Mora!

Parashqevi: Ke 20 vite dhe thotë toka është e djalit, po ç’është kjo moj znj. Eni? Ne jemi të tre fëmijët e Andonit!

Eni Çobani: Kush ta ka thënë këtë që prona i kalon djalit? Ma thuaj këtë dhe jemi në rregull.

Vangjel: Të tërë shqiptarët e dinë.

Eni Çobani: Pse vajzat kush i bën? Vajzat s’i bën Andoni?

Parashqevi: Na ka bërë lopa neve!

Vangjel: Traditat janë tradita dhe traditat mbahen. Përveç traditave, unë tek ajo shtëpi atje, unë qëkur kam qenë i vogël çdo lek që kam marrë, i kam hedhur tek ajo shtëpi, më shumë se 30 mijë euro i kam hedhur unë atje dhe lekët e tjera i ka hedhur ai.

“Ajo është gjilpërë me kokë!” Vangjeli fajëson motrën dhe fyen babain: Nuk je burrë!

Konflikti familjar që shpaloset në “Shihemi në Gjyq” mes Vangjelit, motrës së tij të madhe, Parashqevisë dhe babait, Andonit përshkallëzohet me disa fyerje prej djalit. Vangjeli pretendon se i ati s’ka mbajtur premtimin për t’i dhënë shtëpinë e madje thotë se i takon sepse është djalë i vetëm.

Ndërsa ai debaton me motrën për këtë, Andoni ngrihet nga vendi ku është ulur në studion e së “Dielës Shqiptare” në Tv  Klan dhe thotë se përtej premtimit, i ka njësoj fëmijët. Në këtë pikë, Vangjeli nis të akuzojë motrën se i ka ndryshuar mendjen babait dhe s’ia kursen ca fjalë të ashpra as të atit.

Andon: Unë kam djersë dhe gjak si për ato, edhe për këtë.

Vangjel: Nuk është e vërtetë! Ai ma ka premtuar mua! Ajo atje, është një gjilpërë me kokë ajo që e shpon babanë dhe ia ka ndryshuar mendjen.

Parashqevi: Ore si më ofendon ti mua?

Eni Çobani: Ç’është kjo gjilpërë me kokë i thua motrës së madhe?

Vangjel: Ashtu është. Ore ik andej, ulu atje!

Andon: Ta pres kokën!

Vangjel: Nuk je burrë ti që s’mban fjalën!

Parashqevi: Znj. Eni, ato shtëpi janë të të treve. Është e kotë që ky vazhdon gjilpëra me kokë, të ketë turp. Unë jam motra e madhe, ti duhet të më dëgjosh fjalën…

Eni Çobani: Po pse je i bindur që ia ka ndërruar mendjen babait?

Vangjel: Po se ai deri dje më thoshte shtëpia është jotja, shtëpia është jotja.

Parashqevi: Ore me pëlqimin e vajzave. Si do të na linte ai neve jashtë? Pse, neve kush na ka rritur?

Djalit apo vajzave, babai gjendet mes dy ‘zjarreve’ dhe merr vendimin për shtëpinë

Në fund të “Shihemi në Gjyq”, nuk ëhtë gjetur gjuha e përbashkët mes Vangjelit dhe motrës së madhe, Parashqevisë për shtëpinë e tyre në lagjen “Mangalem” në Berat. Gjatë debatit të tyre në studion e së “Dielës Shqiptare” në Tv Klan u kuptua se shtëpia rezulton pa adresë dhe në emër të së afërmes së tyre.

Vangjeli kërkoi që ta ndiqte ai gjyqin ndërsa Parashqevia nuk pranon. Ai thotë se shtëpia i takon vetëm atij sepse ia ka premtuar i ati, Andoni. Ky i fundit ndodhet i pranishëm në studio dhe ngrihet për të thënë fjalën e fundit lidhur me gjithë situatën.

Andon: Unë nuk të jap të drejtën të vish të ndjekësh gjyqin! Nuk ia jap të drejtën! Pse? Sepse e njoh djalin tim!

Eni Çobani: Ore po themi kur të bëhesh me dokumente, kujt do t’ia japësh?

Andon: Kur të bëhem, është i pari ai pastaj vijnë ato.

Eni Çobani: Djalit do t’ia japësh?

Andon: Jo.

Parashqevi: O znj. Eni po si do t’ia japë djalit ai, po neve kush na ka bërë?

Andon: Një minutë të flas! Siç i kam marrë vendimet, jo sot… para një muaji siç i kanë marrë vendimet të pestë sepse është edhe gruaja ime, ashtu do t’i merrni vendimet.

Vangjel: Boll patët kohë ju! Në qoftë se znj. Eni më ndihmon…

Eni Çobani: Unë s’ia marr dot me zor.

Vangjel: Deklaratën.

Eni Çobani: Po, pra deklaratën s’ia marr dot me zor.

Andon: Para se të ndodhte kjo ato po thoshin ty do të t’i japim shtëpitë. Ato s’duan të futen në mes.

Eni Çobani: Po pse ndërrove mendje?

Andon: Nuk ndërrova mendje.

Eni Çobani: Do t’ia japësh?

Andon: Të shoh çfarë do të bëjë Perëndia.

Parashqevi: Posi!

Eni Çobani: Ia ke dhënë fjalën djalit tani. Në momentin që do të marrësh dokumentet po them…

Andon: Patjetër!

Eni Çobani: Si patjetër? Djalit apo vajzave?

Andon: Të treve!

“Kënga Magjike” – Java 9 #musicistheanswer