Mijëra njerëz janë evakuuar nga shtëpitë e tyre në Costa del Sol, një rajon në jug të Spanjës pasi shirat e fuqishme kanë nisur të shkaktojnë përmbytje. Meteorologët janë shprehur se Malaga dhe verilindja e rajonit të Katalonjës janë në alarm për shira të fuqishme që pritet të zgjasin deri të premten.

Zona e Malagës, duke përfshirë resortet turistike të Marbejas, Velezit dhe Esteponës, pritet të goditen më fort nga fenomeni ekstrem i motit i njohur si “Dana”.

Disa rajone të tjera të Spanjës ndërkohë përgatiten për më shumë shira dhe temperatura të ulëta, vetëm pak javë pasi vendi u godit nga disa përmbytje që lanë të vdekur më shumë se 220 persona.

Në Katalonjë, për 12 orë pritet të bjerë 180 milimetra shi. Moti i keq do të shoqërohet me vetëtima. Shkollat në të gjithë provincën e Malagës nuk janë hapur, ndërsa edhe supermarketet nuk i ngritën qepenët.

Siç raportojnë mediat, zonat më të populluara të qytetit janë boshatisur si pasojë e ujit që ka mbushur rrugët. Rreth 3 mijë personave që jetojnë pranë lumit Guadalhorce, u është thënë të largohen nga shtëpitë.

“Nuk kemi evakuuar të gjitha fshatrat, por zona specifike që lidhen me shtratin e lumit. Ky vendim i është komunikuar qeverisë së Spanjës në mënyrë që të kemi bashkëpunim nga forcat shtetërore të sigurisë”, tha Antonio Sanz, ministër i qeverisë rajonale./tvklan.al