Male spektakolare, lugina të pacenuara, lumenj të egër…Në Shqipëri, një arratisje e egër. Kështu nis reportazhi i prestigjiozes franceze “Le Figaro” për Shqipërinë.

Artikulli i francezes përshkruan me detaje peripecitë e historisë shqiptare që mbajtën një pjesë të mirë të vendit larg zhvillimit për gati gjysmë shekulli në kohën e diktaturës. Por sot vendi po hapet dalëngadalë drejt udhëtimeve aventureske, duke ofruar një eksperiencë unike për të gjithë dashamirët e natyrës.

Kur dy shqiptarë takohen në një shteg malor, përshëndesin njëri-tjetrin me një shprehje si “O Shqipe!, “O Shqiptarë” që mund të përkthehet edhe si “O shqiponjë” pasi është e njëjta rrënjë dhe shqiptarët e quajnë veten bij e bija të shqiponjës, shkruan Le Figaro.

Nga viti 1945 deri në vitin 1985, vetë diktatori Enver Hoxha e bëri Shqipërinë një burg të madh të izoluar nga bota e jashtme dhe i dorëzoi njerëzit e saj në turpësitë e Sigurimit të shtetit.  Edhe sot brezi i vjetër vazhdon të pëshpërisë diktaturen, por kur regjimi ra në vitin 1991, Shqipëria mori një kthesë ndryshimesh. E vendosur në Evropën Juglindore, Shqipëria, me 70% të territorit të mbuluar nga relieve të egra, ende nuk i ka zbuluar të gjitha sekretet e saj. A e dini se ky vend ka më shumë se 3000 lloje bimësh, 273 lumenj dhe jo më pak se 15 parqe kombëtare? Male mbi 2,500 m mbi nivelin e detit, lugina të paprekura nga asnjë qytetërim, lumenj të pazbutur…Të gjitha këto mrekulli janë grupuar së bashku në një vend. A guxoni të zhyteni në këtë arratisje të egër? Kjo është ajo që ju ftojmë të zbuloni, shkruhet ne artikullin e dedikuar vendit tone nga francezja “Le Figaro”.

Shqipëria, një vend pak i njohur, por me pasuri të jashtëzakonshme natyrore. Shqipëria është një perlë ende e panjohur për publikun e gjerë në aspektin turistik. Kjo tokë autentike dhe e egër, e vendosur në zemër të Ballkanit, fsheh thesare natyrore mahnitëse që tërheqin gjithnjë e më shumë turistë çdo vit në kërkim të aventurës dhe ndryshimit të peizazhit.

Në brendësi të artikullit të prestigjiozes “Le Figaro” kemi edhe detaje mbi lumenjtë. Vjosa, krenaria e Shqipërisë, është një lumë i lirë dhe i jashtëzakonshëm që gjarpëron përgjatë territorit shqiptar. Sot ai përbën një simbol dhe një element flamuri të trashëgimisë natyrore të vendit, veçanërisht falë statusit të tij si park kombëtar.  Më pas në vëmendje për lexuesit janë edhe Parku kombëtar i Thethit, Zona e Korab-Koritnikut dhe parku kombëtar i Llogarasë, si tre pika tepër të rëndësishme për ata që duan peisazhet e bukura dhe aventurën.  

Përveç bukurive natyrore, Shqipëria ka edhe një trashëgimi të pasur dhe të larmishme kulturore, shkruan “Le Figaro”. Kështjellat, manastiret dhe vendet e tjera arkeologjike të panumërta dëshmojnë për një trashëgimi të bollshme mijëravjeçare. Duke përmendur qytetin e Beratit, të ashtuquajtur si qyteti i “një mbi një dritareve “ me ndërtesa osmane dhe bizantine, apo nga zbulimi i mbetjeve antike të qytetit të famshëm të Apolonisë. Në përmbyllje të reportazhit për Shqipërinë, “Le Figaro” shkruan se përballja me fluksin në rritje të vizitorëve afirmon dëshirën e saj për të zhvilluar turizmin e përgjegjshëm, në dobi të trashëgimisë natyrore dhe kulturore që zotëron.

Duke u fokusuar në zhvillimin që respekton ekosistemet, traditat lokale dhe komunitetet e fshatrave turistike, Shqipëria synon të pajtojë ekoturizmin dhe ruajtjen e karakterit të saj autentik. Kështu përfundon reportazhi i francezes “Le Figaro” që u sugjeron lexuesve që ta vendosin Shqipërinë në listën e vendeve që duhen vizituar me patjetër këtë vit.

Klan News