Edhe protesta e 13 e opozitës para Bashkisë së Tiranës, nisi me hedhjen e molotovëve.

Me thirrjet për dorëheqjen e kryebashkiakut Veliaj, qytetarët protestuan për më pak se 1 orë, ndryshe nga protestat e tjera.

Molotovët e hedhur nga protestuesit në disa raste nuk shpërthyen pasi shërbimi zjarrfikës i parandaloi.

Nga kokteji i molotovëve një punonjës policie mori lëndime të lehta.

Ndryshe nga protestat e shkuara, policia hoqi kangjellat metalike. Në vend të tyre qëndruan efektivët e rendit.

Këtë herë nga protestuesit nuk pati përpjekje për të hyrë në ambientet e bashkisë.

Përfaqësuesit e opozitës dhe aleancës për mbrojtjen e teatrit u larguan pasi lajmëruan që protesta e radhës do të jetë të premten e ardhshme.

Pas tyre u larguan edhe efektivët, për t’i lënë vendin kolegëve të tyre të tjerë për të mbledhur prova në vendin e ngjarjes.

Klan News