Të ftuar: Diola Dosti, Sokol Marsi, Suela Demiri, Olga Kalimera

Rrëfehet Diola Dosti: Romanca me sipërmarrësin nga Kosova, pushimet çift në Bali

Edhe këtë të martë ritakohemi për të diskutuar tema të bukura, sigurisht edhe me personazhe interesante. Do të ftojmë në këtë pjesë të parë nutricionisten e njohur Diola Dosti, e cila do të na japi disa këshilla të rëndësishme në lidhje me shëndetin, por sigurisht do të na rrëfeje dhe të rejat e saj më të fundit nga jeta private.

Historia e dashurisë: 

Diola është njohur me biznesmenin Erolld Belegu në një koncert recital të këngëtares së njohur Vesa Luma (11 shkurt 2024). Një imazh nga ky koncert i përvitshëm është ndarë tashmë nga vetë Vesa në profilin e saj në Instagram, ku me nostalgji dhe dashuri ajo zbulon se ishte aty ku lindi dashuria mes Erolldit dhe Diolës. Biznesmeni është 58 vjeç, ndërsa Diola 37. Diola Dosti është nënë e 3 vajzave me ish-partnerin e saj, gjinekologun nga Kosova, Dardan Baftiu.

Shkëndija dashurie, Diola Dosti: Për herë të parë vendosa të ndjek zemrën

Diola Dosti sapo është kthyer nga pushimet ekzotike në Bali, Indonezi prej të cilit ka postuar video  e foto fantastike, plot ngjyra e natyrë duke mos harruar të ndajë edhe këshillat e saj me ndjekësit. Megjithatë, këshillat nuk kanë qenë e vetmja gjë që janë bërë pjesë e postimeve.

Prej pak kohësh, nutricionistja po jeton një histori të bukur dashurie me biznesmenin nga Kosova, Erolld Belegun. Në bisedën në “Rudina” në Tv Klan, ndërsa flet me sytë që i ndrisin, Diola e përshkruan si një surprizë të paparashikuar.

Diola Dosti: Pushimet ishin shumë të bukura dhe ne, le të themi, e kemi gjetur paqen dhe qetësinë me njëri-tjetrin dhe besoj që kjo edhe reflektohet. Ndonjëherë duket që ne bëjmë plane dhe Zoti qesh me ne, kështu që nuk i dihet asnjëherë, gjithçka e paparashikueshme, e paplanifikuar por ndoshta është më bukur kur gjërat ndodhin kështu, kur të surprizon vetë Zoti.

Njohja e tyre ka ndodhur në koncertin e Vesa Lumës ku krejt rastësisht karriget e tyre ishin pranë dhe duket se kjo afroi edhe zemrat.

Diola Dosti: Ka qenë një ftesë e Vesës që më bëri për koncertin e saj. Unë me thënë të drejtën, atë ditë isha me dy mendje dhe madje u thashë vajzave që mami nuk do të vonohet sot, edhe pse koncerti ishte në darkë, nuk do të vonohem sepse po shkoj t’i bëj qejfin Vesës sepse nuk isha në gjendje shumë të mirë për të dalë. Kur shkova, aty pashë që ishte i shoqëruar me Isida Mollaymerin dhe ndërkohë më thotë për t’u ulur, i kishim karriget afër me njëri-tjetrin dhe aty ka filluar komunikimi i parë, ka qenë pikërisht në shkurt. Duket sikur çdo gjë erdhi krejtësisht natyrshëm, ishte një kimi, e ke parasysh ato gjërat e bukura që nuk gjen fjalë për t’i përshkruar, kam emocione tani.

Një tjetër rastësi vijoi pasi të dy kishin marrë të njëjtën ftesë për një tjetër koncert,  kësaj here në Kosovë. Si fillim, pati një takim mes tyre që tregoi shkëndijën e parë e cila do  të kthehej në një fishekzjarr dashurie në një vallëzim gjatë mbrëmjes në Gjakovë.

Diola Dosti: Jemi takuar të nesërmen sepse ai qëndroi një natë në Tiranë, “mund të hamë mëngjesin bashkë?” Po i them, dakord në rregull dhe numrat deri aty nuk i kemi shkëmbyer.

Rudina Magjistari: Pra pati një shkëndijë që në atë moment.

Diola Dosti: Sigurisht. Zhvilluam një lloj bisede që kishin kaluar 4 orë dhe nuk e pamë, jemi takuar në orën 8 dhe vajti ora 12, pamë që thjesht koha kishte fluturuar. Në atë koncertin e radhës që mbahej në Gjakovë për 17 Shkurtin dhe aty më duket që ishte ajo shkëndija më e fortë. Ishte madje një moment shumë i bukur që askush nuk po kërcente dhe u çuam vetëm ne të dy dhe më thotë që “shiko tek ai ekrani aty na kanë kapur vetëm neve” dhe unë shikoja vetëm Erolldin dhe s’më interesonte, shikoja vetëm ‘blur’ pjesën tjetër, nuk shikoja asnjë lloj gjëje. Aty e kuptova, thashë Diola, po ndodh një gjë e madhe dhe thjesht e kam lënë veten se unë gjithmonë në këto raste kam qenë shumë e tërhequr, kam menduar në forma të ndryshme, por për herë të parë vendosa të ndjek zemrën.

“Nuk e kam ditur ç’është dashuria”, Diola Dosti përshkruan romancën me Erolld Belegun

Romanca e bukur me biznesmenin Erolld Belegu ka sjellë një ndjenjë të re dhe të ëmbël në jetën e Diola Dostit. Pasi ndau me “Rudina” në Tv Klan historinë e tyre të njohjes e cila ka filluar në muajin shkurt, nutricionistja tregoi edhe për të përbashkëtat që gjejnë te njëri-tjetri. Diola u shpreh se i duket që e njeh prej një jete dhe se më parë nuk e ka ditur se ç’është dashuria.

Diola Dosti: Më pëlqen fakti që më jep shumë paqe. Dukshëm nga mënyra se si jeton Erolldi, nga gjërat të  cilat ai ka ndërtuar, unë kam një natyrë që jam pak më e thjeshtë dhe në pamje të parë, duket sikur s’kemi asnjë gjë të përbashkët, por janë ca pika të përbashkëta që nuk i përshkruajnë dot fjalët. Emëruesi i përbashkëtështë fakti që ne kemi gjetur një qetësi te njëri-tjetri. Më duket sikur kur them madje që kam që në shkurt që e njoh, por jo, kam një jetë që e njoh dhe me thënë të drejtën, shikoj veten, shikoj gjithë situatat dhe them që nuk e paskam ditur çfarë është dashuria sepse nuk është dashuria ajo çfarë unë mund të kem imagjinuar, por vërtet është një ndjenjë, një emocion që realisht nuk mund ta përshkruaj dot me fjalë, është qetësia që të jep, është lumturia që të jep.

Nutricionistja shtoi se duket se gjithçka ka ardhur kur edhe ajo ishte më e pjekur, e aftë për të përballuar situata të ndryshme me dikë që e pranon me autenticitetin e saj.

“Mendoj që ishte momenti i duhur në kohën e duhur me njeriun e duhur”, përmbylli Diola.

“S’kishim dëgjuar kurrë për njëri-tjetrin”/ Diola Dosti tregon planet për lidhjen me Erolld Belegun

Një takim i rastësishëm në koncertin e Vesa Lumës ndezi shkëndijat e para mes Diola Dostit dhe Erolld Belegut. Romanca që çifti po jeton prej pak kohësh është një prej më të përfolurat e momentit sepse kurioziteti për të mësuar çdo detaj nuk mungon.

Diola na e plotësoi dëshirën në programin “Rudina” në Tv Klan dhe tha se pavarësisht se të dy janë personalitete në fushat e tyre, nuk dinin asgjë për njëri-tjetrin e madje as emrin.

Rudina Magjistari: Ai ndërkohë të njihte ty më herët?

Diola Dosti: Jo, kjo ishte më e bukura. Unë nuk kisha dëgjuar fare për Erolldin edhe pse është shumë e çuditshme për t’u thënë sepse unë kam jetuar 14 vite në Kosovë dhe në përgjithësi shoqëria ime, miqësia ime i përkasin profilit të Erolldit, por nuk kisha dëgjuar kurrë, asnjëherë as emrin, jo më si personalitet që s’e kisha takuar, por as emrin, gjithashtu edhe ai për mua, kjo ishte më e bukura dhe kjo është gjëja që mua më pëlqen më shumë në këtë raport sepse është ndryshe kur e njeh dhe mund ta shikosh tjetrin, ndoshta edhe nga fjalët që mund të ketë thënë dikush tjetër, pra mund të kesh një lloj ndikimi, deshe, s’deshe ndikohemi. Kurse tek unë ishte totalisht një njeri i ri me botën e vet të re dhe kjo ndoshta ishte edhe gjëja që mua më bënte më shumë për vete se dua unë që ta eksploroj, nuk dua që të eksploroj një person me fjalët e dikujt tjetër.

Pas pushimeve ekzotike në Bali prej të cilave sapo janë kthyer, rrezet e dashurisë do të vijojnë të ndriçojnë rrugën e tyre drejt njohjes dhe zbulimit të njëri-tjetrit.

Diola Dosti: Në momentet që flasim plani jonë është që të njohim njëri-tjetrin, domethënë ne vijmë nga dy botë të ndryshme, kemi karaktere të ndryshme, kemi gjetur paqen dhe qetësinë te njëri-tjetri por kemi nevojë që të eksplorojmë njëri-tjetrin, ta njohim më mirë sepse njeriu dhe jetëgjatësia e një raporti duket sesa ti di të përballosh në momente të vështira personin që ke në krah./tvklan.al

“Këngët e Atdheut tim”/ Koncerti në nder të Lefter Çipës, “Princi i polifonisë shqiptare”

Në këtë pjesë të dytë do të ndalemi te një koncert shumë i bukur, “Këngët e Atdheut tim”, që u mbajt dje në nder të poetit ose siç njihet ndryshe “princi i polifonisë shqiptare”, Lefter Çipa. Koncerti në nder të Mjeshtrit të Madh të Penës dhe Polifonisë së Jugut, Lefter Çipa, “Nderi i Kombit”, erdhi mjaft bukur nga Ansambli i Këngëve dhe Valleve Popullore dhe shumë të ftuarve special.

Pashkët Ortodokse/ Ja disa ide si ti dekoroni këtë vit

Në këtë pjesë të programit do të flasim për zbukurimet e vezëve të pashkëve ortodokse, të cilat festohen më 5 maj. Për të krishterët ortodoksë një nga traditat më të vjetra të Pashkëve janë vezët e lyera në ngjyrë të kuqe. Ne do të jemi me Olgën e cila na e ka zbukuruar tavolinën me vezët e zbukuruara dhe do të na tregojë edhe si mund t’i zbukurojmë kaq bukur.

/tvklan.al