Përmbytjet në Spanjë kanë sjellë një bilanc tejet tragjik: Të paktën 95 të vdekur dhe dhjetra të zhdukur. Ekipet e emergjencës po vijojnë kërkimet për personat që dyshohen të zhdukur pas përmbytjeve që goditën Spanjën jugore.
Qindra ushtarakë janë vendosur në Valencia, në një nga zonat më të goditura për të ndihmuar në përpjekjet e shpëtimit, ndërkohë që në disa zona mund të arrihet vetëm me helikopter. Ndërkohë, Departamenti i Emergjencave në Spanjë ka lëshuar paralajmërime për motin në pjesën më të madhe të vendit.
Dhjetra njerëz janë ende të zhdukur në të gjithë rajonin, ndërsa ata që mbijetuan kanë përshkruar se janë të pafuqishëm përballë shkatërrimit të tmerrshëm.
“Ne pamë dy makina duke u rrëmbyer nga rryma dhe nuk e dimë nëse kishte njerëz brenda. Nuk kishim parë kurrë diçka të tillë.”
“Kur uji filloi të ngrihej, erdhi si një valë. Ishte si një cunam.”
“Një shi shumë i fortë erdhi nga lart shumë papritur… dhe uji u ngrit një metër ose një metër e gjysmë në pak minuta.”
Valencia është nën një alarm të kuq në pjesën më të madhe të saj. Një paralajmërim i kuq i paraprin ngjarjeve ekstreme ose të pazakonta të motit dhe është alarmi më ekstrem i departamenteve. Paralajmërimet e verdha tregojnë mot me rrezik më të ulët.
Disa zyrtarë lokalë kanë thënë se paralajmërimet për përmbytjet erdhën shumë vonë, ndërsa Kryeministri Pedro Sanchez u shpreh dje se të prekurit nuk do të braktiseshin. Ai shprehu ngushëllimet e tij për ata që kishin humbur të dashurit e tyre, teksa tha: E gjithë Spanja qan me ju.
Ekziston frika se numri i të vdekurve do të rritet më tej, ndërsa në Spanjë është shpallur 3 ditë zie. Ekspertët thonë se përmbytjet që prekën të mërkurën Spanjën shënojnë fatkeqësinë natyrore më të madhe që ka goditur ndonjëherë vendin./tvklan.al
