“Është frymëzim pa pranga“

E ftuar në emisionin “Rudina” në Tv Klan, Eranda Libohova ka folur edhe për dy vëllezërit e saj. Ajo ka treguar se me vëllain që jeton në SHBA, Zamirin, ka një marrëdhënie shumë të ngushtë dhe speciale, madje e konsideron edhe si shok. Zamiri ka qenë zëri i saj në familje, e ka mbështetur gjithmonë dhe nuk e ka gjykuar apo ta shohë nga pozitat e vëllait të madh.

Ai e ka surprizuar të motrën me një videomesazh gjatë emisionit, ku shpreh dashurinë dhe respektin e madh që ndjen për të. Zamiri tregon se është shumë krenar për të dhe uron që të mos ndryshojë kurrë.

“Eranda dhe unë u rritëm bashkë, kjo më dha mundësi që të kuptoj sukseset, përjetimet dhe zhgënjimet e Erandës. Unë jam rritur më dy motra artiste në shtëpi dhe tani ndoshta po rris një artiste të ardhshme, vajzën time Noa. Ndonjëherë nëpër shtëpi harroj dhe e thërras vajzën time Eranda. Eranda simbolizon kuptimin e një artisti të vërtetë, nuk ka komplekse, ka një zemër kaq shumë të madhe saqë dikush dhe mund të humbë aty, por mbi të gjitha Eranda është e pavarur dhe një frymëzim i çliruar dhe pa pranga. Për këto cilësi unë e dua dhe e respektoj motrën e vogël dhe shpresoj që të mos ndryshojë”, është shprehur Zamiri. /tvklan.al