Pas 48 orësh në arrati, policia ka arrestuar Azgan Mërnicën, vrasësin e efektivit Novruz Cenalia. Ky i fundit, efektiv i forcave “Shqiponja”, u vra mesditën e të hënës në fshatin Baltëz të Fierit nga 23-vjeçari Mërnica.

23-vjeçari u vetëdorëzua pas negociatave të policisë dhe babait e dajës së autorit.

Forcat RENEA e kishin lokalizuar Azgan Mërnicën në një banesë në fshatin Dërmenas dhe kërkuan nga familjarët e tij që të negocionin për t’u vetëdorëzuar, ose do të neutralizohej. Atij ju la afat për vetëdorëzimin ose do të ndërhyhej nga ana e RENEA-s.

Krimi i rëndë ndodhi pas një konflikti se kush kishte të drejtën për të kaluar me makinë në rrugën e fshatit.

Të dy debatuan me fjalë e më pas dolën nga mjetet përkatëse. Në këtë moment, Azgan Mërnica qëlloi me 1 plumb pistolete në kokë efektivin që po shkonte në punë të merrte shërbimin.

Autori ka qenë me të ëmën në makinë në momentin e ngjarjes. Ai u arratis dhe braktisi mjetin tek shtëpia e dajës për t’u arratisur më pas në këmbë për t’u kapur mbrëmjen e të mërkurës.

NJOFTIMI I POLICISË SË FIERIT:

Forcat Speciale RENEA, Forcat Kombëtare të Sigurisë dhe shërbimet e Drejtorisë Vendore të Policisë Fier, në drejtimin e Drejtorit të Përgjithshëm të Policisë së Shtetit, kanë vijuar pa ndërprerë veprimet operacionale në terren me qëllim kapjen e autorit të vrasjes së punonjësit të Policisë Novruz Cenalia.

Veprimet Operacionale u shtrinë në një perimetër shumë të gjerë në zonën ku ndodhi ngjarja, duke përdorur dronë të cilësisë së lartë, të cilët kanë monitoruar zonën gjatë gjithë kohës. Po në kuadër të veprimeve operacionale, u ngritën pika kontrolli në gjithë akset rrugore, u forcuan shërbimet në pikat e kalimit, në kufirin jeshil dhe blu.

Paralel me veprimet operacionale në terren, policia ka zhvilluar negociata me familjarët e autorit për t’u vetëdorëzuar.

Në pamundësi për tu larguar, familjarët kanë vetëdorëzuar në Polici autorin e vrasjes së punonjësit të Policisë shtetasin Azgan Mernica, 23 vjeç, i cili aktualisht ndodhet në ambientet e Drejtorisë Vendore të Policisë Fier.

Grupi hetimor, në drejtimin e Prokurorisë, po vijon veprimet hetimore dhe procedurale me autorin e dyshuar, Azgan Mernica.

/tvklan.al