Jamarbër Malltezi është arrestuar mbrëmjen e sotme në Aeroportin e Rinasit. Lajmi konfirmohet nga Klan News. Burime për gazetaren Glidona Daci, bëjnë me dije se një masë e sigurimit personal është vendosur edhe ndaj ish-Kryeministrit të vendit Sali Berisha, e më konkretisht masa shtrënguese detyrim paraqitje, si dhe ndalim për të dalë jashtë vendit.

Detyrim për t’u paraqitur me dyshimet e përfshirjes në korrupsion, u caktua nga gjykata edhe për biznesmenin Fatmir Bektashi, ndërtues dhe bashkëpronar i ndërtimeve të bëra në ish-Kompleksin “Partizani”.

Sipas të njëjtave burime, Prokuroria e Posaçme Kundër Korrupsionit dhe Krimit të Organizuar ka ngritur 3 akuza; korrupsion pasiv, fshehje pasurie dhe pastrim parash.

Mësohet se Jamarbër Malltezi ishte duke u kthyer nga një vend i Bashkimit Europian kur u ndalua nga autoritetet. Sipas gazetares Daci, me urdhër të SPAK janë vënë nën sekuestro edhe disa pasuri të Malltezit, ndërsa më herët hetuesit e posaçëm kishin ushtruar kontroll në zyrën e tij.

Në cilësinë e personave që kanë dijeni për çështjen në fjalë, gazetarja raporton se SPAK ka marrë në pyetje disa ish-zyrtarë, mes të cilëve Genc Rulin, Gazmend Oketën, Fatmir Mediun, Isa Tolën dhe Vladimir Qirjazin.

Hetimet për privatizimin e kompleksit “Partizani”, nisën pas një kallëzimi penal të bërë më 17 nëntor 2020, nga Taulant Balla, në atë kohë kreu i grupit parlamentar të PS. Bëhet fjalë për një pronë me rreth 10 000 m2 në qendër të Tiranës, e cila në vitin 2008 është privatizuar me një vlerë prej 100 000 dollarësh. Klubi sportiv “Partizani” ishte në pronësi të Ministrisë së Mbrojtjes, ndërsa sot mbi të janë ngritur 17 kulla.

Akuzat penale të ngritura nga SPAK:

Sali Berisha – Korrupsioni pasiv i funksionarëve të lartë shtetërorë  kryer në bashkëpunim, (neni 260 ) dhe 25 i K.Penal

Jamarbër Malltezi – Korrupsion pasiv në bashkëpunim (neni 260) dhe Pastrimi i produkteve të veprës penale ose veprimtarisë kriminale, (neni 287) i K.Penal;

Fatmir Bektashi -Korrupsion aktiv  dhe Pastrimi i produkteve të veprës penale ose veprimtarisë kriminale,= (neni 287) i K.Penal;

Vendimi i GJKKO që mban firmën e gjyqtares Irena Gjoka