Manchester City e ka seriozisht për Andrea Cambiason. Klubi anglez, që prej kohësh e ndjek mbrojtësin e krahut të Juventusit, ka gati një ofertë prej rreth 65 milionë Eurosh për kartonin e tij, për më tepër që ka përparuar në negociata me futbollistin, raporton Sport Mediaset.

Për lojtarin është gati një ofertë 5-vjeçare. Por te Juventusi nuk duan që të nxitojnë sa i përket të ardhmes së futbollistit.

Drejtori sportiv Xhuntoli synon që të rrisë ofertën nga klubet e interesuara, e si objektiv ka shifrën 80 milionë Euro, duke pasur parasysh edhe konkurrencën që ekziston në Evropë për lojtarin, me Bajern Mynihun, që gjithashtu e ka në krye të listës.

Cambiaso, pavarësisht tensionit në javët e fundit, konsiderohet si një lojtar kyç nga trajneri Thiago Motta dhe drejtuesit e Juventusit, të cilët nuk kanë ndërmend që ta largojnë aq thjesht.

Mendja e tyre mund të ndryshojë vetëm në rast të një oferte joshëse.

Në këtë sezon, mbrojtësi 24-vjeçar është aktivizuar në 25 takime ku ka shënuar dy gola dhe ka dhënë edhe dy asiste.

Klan News