Një në pranga e 3 të proceduar penalisht në Lezhë, për shpërndarje kanabisi. Sipas policisë, të rinjtë u kapën teksa lëviznin me makinë tip “Golf”. Sasia e kanabisit u gjet poshtë sediljes ku ishte ulur njëri prej tyre.

“Lëviznin në qytet, me sasi Cannabisi në automjet, për ta shitur në doza, arrestohet 1 shtetas dhe procedohen penalisht 3 të tjerë. Sekuestrohen lënda narkotike dhe automjeti me të cilin lëviznin këta shtetas. Gjatë kontrolleve të kryera 24/7, nga Forca e Posaçme “Shqiponja” e DVP Lezhë, me qëllim parandalimin, evidentimin dhe goditjen e paligjshmërive, si dhe për garantimin e rendit dhe sigurisë publike, në lagjen “SMT”, është ndaluar automjeti tip “Golf”, i cili drejtohej nga shtetasi K. B., 22 vjeç dhe kishte pasagjerë shtetasit S. K., 19 vjeç, K. B., 22 vjeç dhe S. Sh., 23 vjeç, të katërt banues në Mamurras.

Nga kontrollet, nën sediljen ku ishte ulur 19-vjeçari, është gjetur një sasi lënde narkotike Cannabis Sativa, e cila dyshohet se posedohej me qëllim shitjen. Në përfundim të veprimeve procedurale për rastin, specialistët e Seksionit për Hetimin e Narkotikëve të DVP Lezhë arrestuan shtetasin S. K. dhe referuan materialet në Prokurori, ku nisi procedimi në gjendje të lirë, për 3 shtetasit e tjerë. Materialet procedurale i kaluan Prokurorisë pranë Gjykatës së Juridksionit të Përgjithshëm  Lezhë, për veprime të mëtejshme, për veprën penale “Prodhimi dhe shitja e narkotikëve”, thotë Policia.

/tvklan.al