#EDielaShqiptare nga #ArditGjebrea prej vitit 2008 në #TvKlan, programi më popullor në të gjitha familjet shqiptare çdo të dielë. Një program i cili përfshin një fashë orari maratonë, prej 6 orësh transmetim.

“Udha e Shkronjave” – Durim vs Miranda

“Kujdes Shëndetin”- Danilo Zichici

“Ka një mesazh për ty”- Një kuditë si Vasilika

Sëmundja i lidhi nënën në krevat, Rozi: U bëra zonja e shtëpisë në moshën 10-vjeçare

Rozi e ka filluar jetën me sfida të forta. Në një rrëfim në “Ka Një Mesazh Për Ty”, zonja e hijshme nga Shkodra rrëfen për një fëmijëri të lumtur derisa në moshën 10-vjeçare, nëna e saj u sëmur rëndë. Nga ai moment, shprehet Rozi në rubrikën e së “Dielës Shqiptare” në Tv Klan, ajo u bë zonja e shtëpisë që qëndronte zgjuar gjithë natën për t’u kujdesur për nënën.

Rozi: Fëmijërinë time e kam pasur të mrekullueshme deri në moshën 10-vjeçare. Jam rritur në një familje me dy prindër e dy vëllezër, duke qenë edhe vajzë e vetme më kanë dhënë shumë dashuri. Sapo mbusha 10 vjeçe, nëna ndjesë pastë, kaloi një sëmundje shumë të rëndë dhe mbeti në krevat. Kjo zgjati për 10 vjet. U bëra si zonjë shtëpie. Aty sinqerisht filluan edhe vuajtjet, si koha, fukarallëku, gjithçka që mungonte. Nëna që në atë kohë ushqehej vetëm me lëngje kjo ishte dhimbja më e madhe që kam përjetuar në jetën time. Kujdesesha për nënën, mësoja gjithë natën, shkoja në shkollë, shpeshherë në orën e gjashtë kur bënim 6 orë mësim mua më zinte gjumi në klasë ngaqë s’flija gjithë natën. Në vitin ‘86 na erdhi një gëzim në shtëpi. Vëllai i madh u martua. Nusja ishte shumë e re e unë kisha shumë dhimbje kur e shikoja ashtu, i kisha harruar ato gjërat e mia por ajo u bë një burim dashurie, mirësie, gëzimi për të gjithë familjen tonë.

“U laja këmbët burrave në shtëpi”, martesa e dhunshme e Rozit: Vjehrra ishte nxitësja më e madhe!

Pas martesës së vëllait, Rozi ndodhej pikërisht në moshën kur mendonte për të krijuar jetën e saj e të gjente princin e kaltër. Ajo u fejua me shkuesi dhe mendoi se gjithçka ishte rregulluar, por aty jeta mori kthesë tjetër. “Për mua filloi një tatëpjetë e madhe”, u shpreh ajo në “Ka Një Mesazh Për Ty” nga “E Diela Shqiptare” në Tv Klan. Në shtëpinë bashkëshortore e priste dhuna, përulja dhe skllavërimi.

Rozi: Që në ditët e para filloi për mua një jetë e tmerrshme, një jetë plot dhunë, kryesisht psikologjike. Fillimisht, më vonë, jo shumë vonë, filloi edhe dhuna fizike. Kjo ishte çështje mentaliteti, çështje formimi. Unë nga një vajzë e emancipuar, një vajzë e gjithanshme, me sportin, me artin, me punën, me gjithçka, u ktheva në një skllave, në një shtëpiake që duhet të përulesha përpara të gjithëve, që duhet t’i laja edhe këmbët burrave të familjes ose mysafirëve burra që vinin dhe gjithsesi vazhdova punën…

Ardit Gjebrea: Po e thua në mënyrë figurative apo prej vërteti?

Rozi: Jo, vërtet.

Ardit Gjebrea: Duhet t’u laje këmbët mysafirëve që vinin?

Rozi: Po, patjetër. Ishte një disnivel kulture, formimi, botëkuptimi. Ata vinin nga një fshat i Shkodrës dhe me vete kishin marrë edhe mentalitetin.

Ardit Gjebrea: Sa  vjeç ishe ti?

Rozi: Unë në atë kohë isha 25 vjeçe.

Ardit Gjebrea: Po pse duhej, duhej se s’bën të bëhej kjo gjë?

Rozi: Ose do bëje atë, ose përndryshe… (bën gjest me dorë për të treguar dhunën fizike).

Rozi shton me keqardhje se vjehrra e ndjerë ishte “nxitësja më e madhe e dhunës”. Pas njëfarë kohe, Rozi ishte e vetmja që sillte të ardhura në shtëpi duke punuar m 3 turne e duke u kujdesur për të gjithë. Njëkohësisht, përjetonte edhe dhunën por më shumë lodhej nga dhuna psikologjike.

Rozi: Shkoja në punë, si çdo femër që ndryshon, herë i lidhja flokët, herë s’i lidhja, i lëshoja. Për këtë dhunohesha. “Pse i lidhi flokët sot, pse i lëshoi dje, pse veshi sot pardesy, pse veshi dje pallto?” Pra disa gjëra që sot duken shumë qesharake, por prej këtyre gjërave unë jam dhunuar, jam dhunuar sistematikisht.

“Heroina ime!”, Rozi emocionohet gjatë rrëfimit për “kuditën”

Martesa nuk ishte një oaz lumturie për Rozin. Me shumë dhimbje e trishtim, ajo ndau në “Ka Një Mesazh Për Ty” detaje nga jeta martesore që konsistonte në dhunë sistematike fizike e psikologjike. Ardhja e djalit në jetë nuk e ndihmoi aspak familjen dhe ajo mori vendimin për t’u larguar.

Gjatë gjithë kësaj kohe, Rozi ka patur një mbështetje. Në fillim të rubrikës së programit “E Diela Shqiptare” në Tv Klan, ajo tha se kur u martua vëllai, nusja e re ishte “burim dashurie, mirësie e gëzimi”. Rozi e quan “kuditë” gruan që nuk e la kurrë në baltë.

Ardit Gjebrea: Kush është kujdesur për ty gjatë kësaj kohe?

Rozi: Ajo që është heroinë, heroina ime! Ajo që është për mua nënë, motër, vajzë, shoqe, ishte nusja e vëllait, ajo që u martua para se të martohesha unë.

Ardit Gjebrea: Kunata jote.

Rozi: Kunata ime. Unë nuk i them kunatë, unë i them kuditë. Ne kështu e thërrasim njëra-tjetrën. Ajo është heroinë për mua, jo nusja e vëllait. Thashë ajo është nënë, motër që s’e pata kurrë, vajza që s’e pata kurrë, është mikja ime më e mirë.

Ardit Gjebrea: Çfarë bënte ajo  për ty?

Rozi: Megjithëse ishte shumë më e vogël se unë, ajo më ndihmonte mua për gjithçka. Kur çoja  unë djalin te shtëpia, ishte ajo që anashkalonte djalin e vet e merrej me djalin tim. Vinte atje te puna, unë kam punuar në uzinën e telave, kabllove elektrikë në Shkodër, e linte djalin aty dhe vinte vrap të më sillte mua të haja bukë dhe ky ritual përsëritej çdo ditë.

Me sytë që i shkëlqejnë, Rozi ndan historinë e dashurisë me bashkëshortin 9 vite më të ri: Më ka ndryshuar jetën

Pas shumë stuhive në jetën e saj, pas një martese pa dashuri e me shumë dhunë dhe divorcit, Rozi nisi të rindërtonte jetën. 13 vite më parë, krejt papritur, fati solli në rrugën e saj dikë për të cilin kur rrëfen në “Ka Një Mesazh Për Ty, i shkëlqejnë sytë.

Pavarësisht kërkesës së tij, Rozi vendosi të qëndronte te djali i saj në Francë por personi që e priste kishte bërë plane të tjera. Megjithatë, Rozi kishte disa dyshime për bashkimin e tyre të cilat i kujton në rubrikën e së “Dielës Shqiptare” në Tv Klan.

Rozi: Ai kishte marrë numrin tim të telefonit, kishte marrë edhe numrin e djalit. Merrte djalin në telefon, më merrte mua. Përveç asaj që unë isha djegur nga martesa e parë, kishte edhe nja dy gjëra të vogla që mua më bënin konfuze.

Ardit Gjebrea: Për shembull?

Rozi: Po, ai i përkiste një besimi tjetër që në Shkodër pavarësisht se ne kemi një bashkëjetesë të mrekullueshme, te disa njerëz akoma ekziston ajo që “jo po mysliman, jo po katolike”…

Ardit Gjebrea: Pra ti katolike, ai mysliman.

Rozi: Kjo ishte e para. E dyta, ishte edhe kjo tjetra që për mua ishte shumë thelbësore.

Ardit Gjebrea: Që?

Rozi: Që ai ishte shumë më i ri se unë. Ai është 9 vjet më i vogël nga unë.

Ardit Gjebrea: Po kur thua “shumë vite” unë thashë sa ishte.

Rozi: Po shumë janë!

Ardit Gjebrea: Por nuk ju kanë penguar.

Rozi: Jo.

Sot ata kanë 13 vite bashkë që për Rozin ka qenë një kthesë totale në jetën e saj. Me shumë dashuri, ajo nis të rendisë të gjitha arsyet për të cilat ai ka marrë zemrën.

Rozi: Të them të drejtën më ka ndryshuar jetën totalisht. Është njeri i jashtëzakonshëm,  ka një familje të mrekullueshme.

Ardit Gjebrea: Çfarë tha familja e tij në momentin e parë?

Rozi: Të jem e sinqertë, në fillim pleqtë hezitonin se normale, edhe unë e vë veten në pozitën e tyre.

Ardit Gjebrea: Bashkëshorti aktual nuk ka qenë i martuar më përpara?

Rozi: Jo, asnjëherë. Ai ka jetuar në Itali.

Ardit Gjebrea: Ndaj edhe familja e tij kishte pak paragjykime le të themi, fillimisht.

Rozi: Normale, për mua është krejt normale sepse të martohet një djalë që s’ka qenë asnjëherë i martuar, të marrë një grua që në finale është e divorcuar, me një fëmijë. Unë në atë kohë djalin e kisha 22 vjeç, sot është 35.

Ardit Gjebrea: Ai ishte rreth 40 në mos gaboj?

Rozi: Ai ka qenë 41 në atë kohë, unë isha 49 kur e kam njohur kështu që e justifikoja, asnjë mendim të keq s’kam patur për ta, asnjë paragjykim.

Ardit Gjebrea: Si kaloni sot?

Rozi: Sot jemi të lumtur aty ku nuk shkon më. Është njeri i jashtëzakonshëm, është njeri i mrekullueshëm që e vlerësoj më shumë jo për atë që tregon ndaj meje se më ka zgjedhur vetë, por ai ka një dashuri të pakufishme për djalin tim, për familjen time, e respekton shumë nusen time  megjithëse edhe ajo e do, e respekton por unë e vlerësoj më shumë te kjo: te dashuria që ka për djalin tim.

Dashuri kuditash! Me fjalët më të bukura e të sinqerta, Rozi surprizon Vasilikën

Ndonjëherë njerëzit më të afërt e më pranë teje nuk janë gjaku yt. Rrëfimi i Rozit në “Ka Një Mesazh Për Ty” ishte për sfidën, vështirësinë, dhunën por edhe për dashurinë, kurajën e mirësinë. Ajo tregoi se si qëkur ishte fare e vogël e kujdesej për nënën e sëmurë, në shtëpi erdhi kunata, Vasilika që ishte një shoqe për të ndaj e quan “kuditë”.

Ajo i ka qëndruar pranë edhe në vitet e vështira të një martese të dhunshme, edhe kur u dashurua sërish dhe për Rozin, është një heroinë. Mirënjohja për Vasilikën nuk mjafton, ndaj Rozi ka vendosur që ta surprizojë kuditën në rubrikën e së “Dielës Shqiptare” në Tv Klan.

Rozi: E kam menduar prej kohësh moj zemra ime! Kaherë kam menduar të ta bëj, megjithëse kam harruar ta cek: unë që kam atë mirënjohjen që nuk gjej fjalë t’ia them, e kam jo për atë që ka bërë për mua, por atë që ka bërë Vasilika, kudita ime, zemra ime, shpirti im për nënën time, atë që vazhdon të bëjë për babain tim e dashurinë që më jep kjo motër, kjo nënë, kjo vajzë, kjo mike, kjo dashuri që është për mua, është vështirë ta gjej diku tjetër prandaj zemra ime, në mënyrë publike, edhe si surprizë se e di që ti ke pasur qejf të vish te Arditi, me thënë të drejtën, ke pasur shumë qejf, thashë ku është vendi më i bukur e ku mund të gjendet një ambient më fantastik se të të shpreh dashurinë, mirënjohjen? Nuk gjej fjalë të ta them. Ti moj motër je heroinë, je super heroinë!

Vasilika: Faleminderit! A mund të them diçka… në familjen e këtyre kam ardhur pothuajse fëmijë, jam martuar 17 vjeçe por sa më ka ndenjur kjo afër, ato për mua kanë qenë momente shumë të vështira, prej një vendi tjetër, por kjo më  ka ndenjur gjthmonë afër dhe i jam mirënjohëse tërë jetën, nuk ia harroj.

Ardit Gjebrea: Pra edhe Rozi të ka mirëpritur.Vasilika:Shumë, edhe në momentet e vështira, për mendimin tim kur je në momentet e vështira nuk duhet t’i harrosh se kur je mirë, s’ke nevojë për askënd.

“Ka një mesazh për ty”- Premtimi i Jehonës

Historia që nisi nga “Ka Një Mesazh Për Ty”, babai tregon si vajza i realizoi ëndrrën e futbollit

Azemi dhe Klesta, babai dhe shoqja e Jehonës hynë në “Ka Një Mesazh Për Ty” me atlete dhe një top futbolli në duar. Dy objektet simbolizojnë një ëndërr të madhe të Azemit që sot është realizuar përmes vajzës së tij. Ai nis të tregojë në rubrikën e së “Dielës Shqiptare” në Tv Klan se qëkur kryente shkollën e lartë në Shkodër dhe shkonte të ndiqte ndeshjet, ëndërronte që një nga fëmijët e tij të ishte në fushën e blertë.

Azem: Ëndrra ishte që një nga fëmijët  e mi të bëhej futbollist.

Ardit Gjebrea: Dhe ti sa fëmijë ke?

Azem: Dy çuna dhe Jehonën.

Ardit Gjebrea: Kur thua “një nga fëmijët e mi” mendoje për dy çunat”, s’mendoje për vajzën.

Azem: U bë Jehona futbolliste.

Qëkur Jehona ishte e vogël, babai dhe vëllezërit e merrnin të luante me ta dhe kështu nisi pasioni i saj për futbollin. Momenti që do të përcaktonte rrugëtimin e saj do të ishte një episod i “Ka Një Mesazh Për Ty” disa vite më parë, ku protagoniste ishte Cyme Lulaj.

Azem: Historia e futbollit te ky televizion ka lindur, tek “E Diela Shqiptare”. Në vitin 2017 duke ndjekur “Kam Një Mesazh Për Ty”, këtu paraqitet Cyme Lulaj.

Ardit Gjebrea: E mbaj mend shumë mirë Cymen.

Azem: Dhe unë nuk e dija që në Shqipëri kishte një kampionat vajzash të them të drejtën, por duke nxjekur emisionin, Jehona e kishte parë me vëmendje dhe pas emisionit, i kishte shkruar në Facebook-un tim që “a mund të takohemi?” dhe pas dy ditësh më telefonin Cymja dhe më thotë “jam filania, më ka shkruar Jehona për futbollin, a je dakord që të vini e të provohet vlen apo s’vlen?”

Ardit Gjebrea: Ti nuk dije gjë fare.

Azem: Jo, unë nuk e dija.                 

Disa muaj më vonë, Cyme Lulaj bën të mundur federimin e Jehonës në ekipin e Kinostudios dhe nga ai moment, vajza u zhvendos në Tiranë. Megjithatë, jo të gjithë familjarët ishin dakord.

Azem: Fillimisht, unë isha dakord, unë isha me Jehonën ndërsa bashkëshortja dhe çuni i madh jo.

Ardit Gjebrea: Po pse?

Azem: Jo, s’është futbolli për vajza, e kemi larg nga shtëpia. Por sidoqoftë, Jehona ia doli vetë.

Ardit Gjebrea: Cila ishte pritshmëria jote në momentin që Jehona filloi në këtë rrugë?

Azem: Jehona është një vajzë shumë luftëtare, ka vullnet të jashtëzakonshëm sepse ne atje jetojmë  në fshat, kurse fëmijët jetojnë në Tiranë, gjithçka me forcat e veta, as ndërhyrje në mënyrë absolute, ka ndjekur gjithçka të kombëtares nga U-15 deri tani vetë.

3 prilli që ndryshoi gjithçka, babai rrëfen dëmtimin e vajzës: Dëgjoja klithmat përmes televizorit

Jehona është vajza që ka arritur të realizojë ëndrrën e të atit dhe të vetën për t’u bërë futbolliste. Prej disa vitesh tashmë, ajo luan në kombëtaren e vajzave, njëkohësisht ndjek edhe shkollën dhe dukej gjithçka kaq premtuese deri para pak kohësh.

Babai i saj, i cili ka ardhur në “Ka Një Mesazh Për Ty” i shoqëruar nga shoqja e ngushtë e së bijës, Klesta, tregon për rubrikën e së “Dielës Shqiptar”  në Tv Klan se 3 prilli ishte dita që ndryshoi gjithçka. Gjatë një ndeshjeje, Jehona pësoi një dëmtim të rëndë dhe ai dëgjonte klithmat e saj nëpërmjet televizorit.

Azem: 3 prilli ishte si të them unë, sikur m’u prenë shpresat se po e shihja ndeshjen në televizor, ‘live’. Ishte me Qipron, ishte një rast i bukur për gol, një vertikalizim i shoqes së vet dhe del përpara portieres, por topi ishte në ajër. Kjo kap topin me këmbën e djathtë dhe këmba e majtë nuk ishte në ekuilibër. U rrëzua keq, unë e pashë që diçka e rëndësishme ka ndodhur dhe dëgjoja klithmat e saj nëpërmjet televizorit që po qante dhe e fika televizorin pastaj.

Ardit Gjebrea: Si është për një baba të dëgjojë vajzën duke qarë në televizor?

Azem: Të them të drejtën, e përjetuam shumë keq si familje, shumë keq e përjetuam.

Ardit Gjebrea: Domethënë atë e nxorën jashtë fushe me siguri…

Azem: Jashtë fushe, me barelë.

Ardit Gjebrea: E çuan në spital.

Azem: Kreu një ndërhyrje kirurgjikale në gju, kishte këputur ligamentin kryesor të këmbës së majtë.

Veç gjendjes fizike që do të kërkojë minimalisht 6 muaj fizioterapi për t’u shëruar, Jehona nuk është shumë optimiste. Azemi u shpreh se që në fillim thoshte se “nuk do të kthehej më në fushë” ndërsa Klesta ndan diçka prej bisedave të tyre.

Klesta: I janë prerë shpresat që në momentin që ndodhi dëmtimi dhe thotë gjatë gjithë kohës që “nuk do të kthehem më në atë gjendje që isha” se ishte në kulmin e karrierës së saj dhe normalisht, ajo do mbështetje. Nga ne shoqet mund ta gjejë, prandaj jemi edhe këtu sot.

Azem: E sheh si fundin atë ditën 3 prill, e sheh si fundin e futbollit.

Ardit Gjebrea: Mjekët çfarë thonë?

Azem: Mjekët janë optimistë, por Jehona në vetvete është pak poshtë, edhe nga ana psikologjike.

“Mendoja se nuk do të ecja më”, historia e patreguar e Ardit Gjebreas: Si e gjeta forcën për të triumfuar

Prej 3 prillit, Jehona nuk mundet të hyjë në fushën e blertë së cilës i ka kushtuar shumë mund e përkushtim. Këputja e ligamentit e ka lënë për disa kohë jashtë saj derisa të rikuperohet. Më i vështirë sesa dëmtimi, është gjendja e saj emocionale që ka pësuar një tronditje të fortë.

Por sot, në “Ka Një Mesazh Për Ty”, forca nuk vjen vetëm nga ata që e kanë ftuar, babai dhe shoqja e ngushtë. Moderatori i programit “E Diela Shqiptare” në Tv Klan, Ardit Gjebrea shkon pranë saj për të ndarë një histori personale të patreguar më parë.

Njësoj si Jehona, Gjebrea rrëfen se ka pësuar një sfidë shëndetësore me këmbën. Fillimisht ecte me paterica dhe mendonte se nuk do të ecte dot. Pas operacionit, nisi trajtimi me fizioterapi por mbi të gjitha, rrugëtimi për t’i dhënë vetes kurajë e optimizëm se gjithçka do të kalonte.

Ardit Gjebrea: Do të të tregoj një histori shumë të shkurtër nga jeta ime. Papritmas një ditë fillova të kisha dhimbje në këmbë dhe nuk ecja dot dhe fillova të kisha vështirësi të cilat shtoheshin, shtoheshin, shtoheshin. Kjo është një histori që nuk e kam treguar asnjëherë. Mendoja që ishte nervi shiatik, por jo. Një moment më thonë të ka mbledhur kocka ujë dhe më pas, pasi bëra të gjitha analizat kisha probleme me kokën e femurit dhe ecja me paterica dhe me paterica futesha edhe në det që ishte një nga gjërat që akoma dhe sot e dua më shumë.

Vij në një moment që mendova që s’do të ecja më. Më thonë duhet të operohesh. U operova, por operacioni është një moment, fizioterapia është sekreti i mëpasshëm. Edhe, teksa shkoja për të bërë fizioterapi shikoja njerëzit që ecnin dhe unë thoja, a e dinë këta njerëz sa të lumtur janë që ecin? Pra ajo gjë që ne na duket e zakonshme, vetëm kur na ndodh një gjë, atëherë e kuptojmë sesa e rëndësishme është jeta, shëndeti dhe çdo gjë. Ata që nuk shikojnë thonë “a e dinë ata që shikojnë sa mirë janë” etj.

Në atë moment fillova fizioterapinë dhe isha shumë i dëshpëruar, por në një moment thashë “ej po Ardit ku je, prit se do ia dalësh”. Fillova, me gjithë dhimbjet që kisha, me gjithçka, luftova dhe 3 muaj shumë të forta fizioterapie pa u sforcuar, me shumë kujdes. Unë çdo mëngjes ngrihesha dhe thosha “Ardit, ti do ia dalësh, ti do ecësh prapë” dhe gjeta forcën te njerëzit që më rrethonin, te shqoëria, familja ishte aty çdo ditë që të më mbështeste, por unë gjeta forcën tek  Arditi, atë forcë që ti duhet të gjesh te Jehona. Unë dua që përmes kësaj dore të të jap ty gjithë energjinë e mirë timen duke ta treguar këtë histori për të të thënë që zgjohu çdo mëngjes me gëzim, e lumtur dhe unë do ia dal sepse gjithçka është vetëm këtu.

“Shihemi në gjyq”- Kunata fle në një dhomë me mua, dua të ikë

“Më thonë burrë me dy gra!”, 80-vjeçari ‘përzë’ kunatën nga shtëpia: Ik zhduku, llafazane e m*tit!

Tefiku ka sjellë  në “Shihemi në Gjyq” kunatën e tij, Beshiren. Në insertin e tij prezantues të rubrikës së “E Diela Shqiptare” në Tv Klan, ai u shpreh i revoltuar duke thënë se  kunata do që t’i zaptojë shtëpinë. Pasi hyn në studio, 80-vjeçari thotë se prej 10  vitesh mban edhe kunatën në shtëpi.

Tefik: Unë kam ardhur këtu për atë kunatën time që më zapton shtëpinë, ka 10 vjet. Ajo është qelbësirë! Ka mundësi që një burrë të marrë dy gra? Nuk ka mundësi, unë s’i mbaj dot.

Ardit Gjebrea: Po pse dy gra? Ti mban gruan dhe kunatën.

Tefik: Po, tani ajo të më zhduket sa më parë nga shtëpia mua se ajo ka 10 vjet tek unë, e kam mbajtur sa e kam mbajtur, tani unë s’kam mundësi më. Unë jam 80 vjeç burrë, nuk i dal zot gruas time, jo më asaj.

Ardit Gjebrea: Sa vjeç je ti?

Tefik: 80 vjeç.

Ardit Gjebrea: Nuk dukesh fare!

Tefik: Nuk dukem, por mosha bën të vetën.

Pas transmetimit të insertit të Beshires, ku kjo e fundit thotë “kaq ta bëjë dhëmbin, unë nuk iki”, Tefiku përsërit kërkesën e tij. Me hyrjen e kunatës në studio, nis një debat i ndezur mes tyre ku Tefiu i kërkon vazhdimisht të largohet, ndërsa Beshirja kundërshton. Tefiku i thotë se për shkak të saj e quajnë “burrë me dy gra” e madje shpërthen në ofendime.

Tefik: Ke qëndruar 10  vjet tek unë!

Beshire: Nuk të dal nga shtëpia!

Tefik: Më unë nuk të mbaj!

Beshire: Edhe 10 vjet, edhe 20 vjet!

Tefik: I ke dokumentet?             

Beshire: I kam.

Tefik: Merr tokën atje, truallin tënd atje, bëj shtëpi a kasolle a ç’do bësh ti atje, nga unë të zhdukesh!

Beshire: Kasollen do ta bëj! Po e mora do ta bëj!

Tefik: Të të mbaj edhe ty unë se je grua e mirë ti! Do më bësh me dy gra mua ti, më thotë bota mua “me dy gra!”

Beshire: Do ta shikojmë!

Tefik: Ik moj, zhduku! Llafazane e m*tit!

Ardit Gjebrea: Jo! Jo me këtë fjalor, të lutem!

Beshire: Unë jam llafazane apo ti? S’ke turp, burrë 80 vjeç!

Tefik: Turp të kesh ti moj!

Beshire: Ti të kesh, jo unë!

Tefik: Të kam mbajtur 10 vjet moj! Çfarë do më ti?

Beshire: Të më mbash se më rrite, më bëre! Të kam mbajtur kalamajtë!

“Ti fle me mua moj!”/ Kunata refuzon largimin, Tefiku: S’mbaj dot gruan time, do të të mbaj ty!

Tefiku i kërkon kunatës në “Shihemi në Gjyq” nga “E Diela Shqiptare” në Tv Klan që të largohet nga shtëpia e tij ku jeton prej 10 vjetësh. 80-vjeçari është i prekur nga fjalët në vendin ku jeton që e përshkruajnë si “burrë me dy gra”. Kunata, Beshirja refuzon kategorikisht largimin sepse ka qenë vetë Tefiku ai që i ka ofruar të qëndrojë në shtëpinë e tij.

Ky i fundit përmend edhe një detaj tjetër nga bashkëjetesa me kunatën në shtëpi: flenë në të njëjtën dhomë.

Ardit Gjebrea: Beshire, ti je e martuar?

Beshire: Jam martuar.

Ardit Gjebrea: Je me gjithë burrin te shtëpia e kunatit?

Beshire: Kam vite që… 10 vjet që..

Ardit Gjebrea: U ndave  me burrin.

Beshire: U ndava me burrin dhe vajta te ky, më tha ”rri”. Tani çfarë faji kam unë që më nxjerr nga shtëpia?

Ardit Gjebrea: O Tefik, më fal. Është motra e nuses apo jo?

Tefik: Po.                               

Ardit Gjebrea: Vetë i ke thënë  “rri”.

Tefik: Dëgjo, unë do të them të drejtën. Ajo më rriti kalamajtë mua.

Ardit Gjebrea: T’i rriti kalamajtë.

Tefik: Po, m’i rriti. Nuk ia hedh poshtë, por ama…

Beshire: Po tani pse më nxjerr jashtë o maskara? Pse më nxjerr jashtë?

Tefik: Dëgjo moj këtu çfarë po të them unë, dëgjomë mua ti! Të kam mbajtur 10  vjet!

Beshire: Më ke mbajtur dhe do më mbash!

Tefik: Jam me nuse, jam me djem, jam me të gjitha në shtëpi, dhoma nuk kam…

Beshire: Më ke edhe mua në kurriz!

Tefik: Ti fle me mua moj!

Ardit Gjebrea: Si, si?!

Tefik: Ajo fle aty me mua bashkë!

Ardit Gjebrea: Fle me ty?!

Beshire: Nuk të dal nga shtëpia!

Tefik: Turp të kesh moj! Unë s’mbaj dot gruan time, do të të mbaj edhe ty!

Ardit Gjebrea: Moj  Beshire, pse ti me Tefikun fle?

Tefik: Në një dhomë.

Ardit Gjebrea: Domethënë, në një dhomë flini ju?

Tefik: Në një dhomë o në një dhomë!  Thuaj të vërtetën, mos gënje!

Ardit Gjebrea: Ju flini në një dhomë?

Beshire: Po ka dy dhoma ore!

Tefik: Moj dhoma, janë çunat, janë nuset atje!

Beshire: Po ti s’më lë fare te dhoma!

“Në rrogoz me ty do fle!”, Beshirja merr ‘ofertën’ nga kunati: Do t’ju mbaj të dyjave?

Debati mes kunetërve, Tefikut e Beshires nuk resht aspak në seancën e “Shihemi në Gjyq”. Tefiku i kërkon të largohet nga shtëpia e tij ku ajo jeton prej 10 vitesh pas ndarjes nga burri, Beshirja refuzon.  Tefiku nuk dëshiron të quhet “burrë me dy gra” dhe as që ajo të flejë në të njëjtën dhomë me të, Beshirja sërish këmbëngul se do të rrijë në shtëpi. Madje, ajo ka ankesa që ai grindet me motrën e saj.

Beshire: Ore ti s’je për gruan tënde, do bësh për mua! Nuk të vjen zor ore!

Tefik: Jam 80 vjeç burrë unë tani! S’ka më! Kur isha, isha unë!

Beshire: Turp të kesh ore! 80 vjeç plak!

Tefik: Mirë kur isha, po s’do më shikosh ti ku fle unë me gruan time se jemi burra ne…

Beshire: Zor të të vijë që më thua mua ashtu, zor të të vijë!

Tefik: S’do më shikosh mua aty ti!

Beshire: Nuk të iki nga shtëpia!

Tefik: U zura njëherë me gruan time, u hodhe ti, çfarë kishe ti, ajo është gruaja ime!

Beshire: Ashtu je ti, s’të mbyllet ty! Nuk të mbyllet goja!

Tefik: Dëgjo këtu, llafazane e m*tit!

Beshire: Ore s’të mbyllet goja! Sa herë je zënë me motrën time ti?

Tefik: Disa herë.

Beshire: Epo pse para meje? Çfarë jam unë?

Tefik: Ik moj mbushu!

Beshire: Atje do rri!

Tefik: Jo, nuk rri ti!

Beshire: Ja të më shikosh!

Tefik: Pse do flesh atje me mua ti?

Beshire: Atje do fle!

Tefik: Nuk fle dot me mua ti moj!

Beshire: Në rrogoz do fle dhe ti të pëllcasësh!

Gjebrea i shpjegon Beshires se është krejt normale që mes një çifti të ketë edhe keqkuptime,  por ndërkohë afrohet Tefiku. Në një moment, ai i bën kunatës një ‘ofertë’ interesante.

Tefik: Je dakord ti e? T’i mbaj të dyja unë edhe ty, edhe atë?

Beshire: Çfarë the?

Tefik: Do ti do?

Ardit Gjebrea: “Do ti”, thotë?

Beshire: Jo!

Tefik: Do moj?

Beshire: Jo.

Tefik: Epo mirë, meqë ashtu, do ta pranoj pastaj unë! Ik moj, turp të kesh!

I shërben gruas së sëmurë, 80-vjeçari: I bëj kafen e mëngjesin çdo ditë

Pasi votimi i publikut i dha tërësisht të drejtë Tefikut për situatën me kunatën, Beshiren, ai shprehet  në “Shihemi në Gjyq” se e vetmja gjë që do, është të jetojë i qetë me bashkëshorten. Siç ka deklaruar përgjatë gjithë seancës së rubrikës të së “Dielës Shqiptare” në Tv Klan, ai mendon se 10 vitet e qëndrimit të Beshires në shtëpinë e tij, në të njëjtën dhomë ku fle çifti duhet të marrin fund.

Tefiku do që së bashku me Xhemilen, e cila vuan nga probleme me shikimin e dëgjimin, të kujdesen për njëri-tjetrin. Ai përshkruan edhe sesi sillet me bashkëshorten, edhe pse vetë është në moshën 80-vjeçare.

Tefik: Unë i bëj hyzmet asaj që nuk ka njeri në botë!

Beshire: Ti edhe unë bashkë!

Tefik: Prit moj, zagare e m*tit! Unë ngrihem në mëngjes në orën 6, 6 e gjysmë apo 7, ajo ngrihet një çikë më vonë se nuk shikon, nuk dëgjon etj.

Beshire: Po të ishe ti në vend të asaj çfarë do bënte?

Tefik: I bëj kafen në mëngjes, ia çoj me tabaka, i bëj bukën, i them çfarë  do për të ngrënë? “Po, dua qumësht, dua kos, dua vezë, dua këtë”…

Ardit Gjebrea: Ia bën të gjitha.

Beshire: T’ia çosh se e ke grua!

Tefik: “Çfarë do?, këtë”, vete, kam fuqi, s’kam fuqi, vete poshtë…

Beshire: T’ia çosh se e ke grua! E ke grua! 

Me këtë fjali, Beshirja shkon afër Tefikut dhe kap bastunin e tij duke vazhduar të grindet.

Beshirja i ‘merr’ zemrën me të mirë kunatit, Gjebrea bën të njëjtën gjë me Eni Çobanin

Për 10 vite, Tefiku e ka mbajtur të hapur derën e shtëpisë së tij që kunata, Beshirja të jetonte aty. Jo vetëm kaq, por ajo ka fjetur në të njëjtën dhomë me kunatin e motrën, Xhemilen. I lodhur, Tefiku   80-vjeçar kërkoi zgjidhje në “Shihemi në Gjyq” që kunata të largohet, të marrë tokën e saj dhe të ndërtojë një shtëpi por kjo e fundit nuk pranon.

Ndërmjetësja e rubrikës të së “Dielës Shqiptare” në Tv Klan, Eni Çobani e këshillon Beshiren që të kërkojë ndjesë ndaj Tefikut dhe t’i shprehë mirënjohjen. Për ndjesën, Beshirja e ka mjaft të vështirë e madje ‘ngrin’ në vend pa mundur ta shqiptojë.

Beshire: Te ty do fle, te ty!

Eni Çobani: O zonjë, unë po të them gjë tjetër! Merrja zemrën me të mirë! O Beshire, merrja zemrën me të mirë, jo me të keq! Me të keq nuk është zgjidhje!

Tefik: Nuk të pranoj!

Beshire: Do më mbash edhe nja dy muaj? Po mora truallin, do të bëj një shtëpi me kallamë e do të shpëtosh njëherë e mirë.

Eni Çobani: Po mirë, “faleminderit”  nuk i thua dot?

Ardit Gjebrea: Do t’i thotë.

Beshire: I them, faleminderit o Tefik!

Çobani shton se do të kujdeset që ta ndihmojë Beshiren për të marrë dokumentacionin e nevojshëm të truallit dhe i premton Tefikut se ajo do të largohet nga shtëpia e tij e ai do të mund të jetojë i qetë me gruan. Nga ana tjetër, nxit Beshiren që t’i afrohet e ta përqafojë kunatin për zemërgjerësinë e treguar dhe kjo shkakton edhe një situatë gazmore.

Beshire: Faleminderit!          

Tefik: Pse erdhe këtu?

Beshire: Po të më mbash edhe nja dy muaj.

Tefik: Dy muaj ama!

Beshire: Dy, dy.

Tefik: Se ti s’e meriton, ja ta them unë!

Beshire: Dy. Po do të marr tokën unë, çfarë të bëj tani? të rri aty? Nuk të rri më, jo!

Tefik: Si thua zonja Eni?

Eni Çobani: Po përqafoje tani se në një dhomë flini ju kështu që detyrimisht…

Ardit Gjebrea: Edhe ne në një studio jemi zonja Eni!

Seanca mbyllet me dy përqafime, atë të Tefikut e Beshires dhe Gjebreas e Çobanit.

“Të Panjohurit” – Edison Gjoni

/tvklan.al