Ekipi Olimpik Shqiptar ka nisur pjesën më të rëndësishme të stërvitjes para garave.

Të gjithë sportistët janë në gjendje të mirë, përfshi mundësin Sahit Prizreni, i cili pati ditët e fundit probleme me gjurin.

Sipas lajmeve që vijnë nga Pekini flamurmbajtësi i ekipit shqiptar do të jetë në formën e tij më të mirë ditën e ndeshjes.

Sportistët tanë janë ambientuar me ndryshimin e orarit dhe të gjithë po stërviten, përfshi peshëngritësit, të cilët mbërritën të fundit në fshatin olimpik.

Probleme me pistoletën e garës ka Lindita Kodra, pasi armës i mungojnë dy vida në pjesën e saj mbajtëse.

Kjo sipas sekretarit të KOKSH-it, Stavri Bello, nuk përbën pengesë për të, pasi qitësja jonë po stërvitet me një armë tjetër, ndërsa pjesët që i duhen do të mbërrijnë para 10 Gushtit, dita kur ajo të jetë në poligon për garën e 10 metrave pistoletë ajër./tvklan.al