Komisioni i Posaçëm i Apelimit vendosi këtë të premte pezullimin nga detyra të gjyqtarit të Kolegjit të Posaçëm të Apelimit, Luan Daci. Vendimi vjen një ditë pasi SPAK e mori Dacin të pandehur.

“Pas vënies në dijeni nga vetë gjyqtar Luan Daci, për marrjen e tij në cilësinë e të pandehurit nga Prokuroria e Posaçme kundër Korrupsionit dhe Krimit të Organizuar, në Kolegjin e Posaçëm të Apelimit u zhvillua sot Mbledhja e Gjyqtarëve, e cila, me vendimin nr. 14, datë 24.07.2020, në zbatim të nenit C, pika 3 e Aneksit të Kushtetutës, të nenit 128, pika 3, germa “b”, të nenit 179, pika 7, si dhe të nenit 179/b, pikat 5 dhe 6 të Kushtetutës së Republikës së Shqipërisë, vendosi: Pezullimin nga detyra të gjyqtarit të Kolegjit të Posaçëm të Apelimit, z. Luan Daci”.

“Kolegji i Posaçëm i Apelimit, në funksion të ushtrimit të veprimtarisë normale të tij, duke respektuar pavarësinë dhe paanësinë e organeve proceduese, si dhe parimin e prezumimit të pafajësisë për gjyqtarin Luan Daci, u kërkon organeve proceduese të vijojnë me një proces të shpejtë, në përputhje me parashikimet e ligjit“, thuhet në njoftimin e KPA.

Luan Daci akuzohet për falsifikim dokumentesh, pasi ka fshehur vendimin për largim nga puna, kur u zgjodh anëtar i Kolegjit të Posaçëm të Apelimit. Të enjten, avokatët e tij u shprehën se ka një vendim të Gjykatës së Apelit se Luan Daci nuk ka bërë vepër penale./tvklan.al