Nisin gjobat për ata që lëvizin pa autorizim

E enjtja ka shënuar edhe ditën e dytë të kufizimit të lëvizjes. Të vetmit që sheh në rrugë janë automjetet që kanë marrë leje tek portali e-Albania, si dhe forca të shumta policie që bëjnë kontrollin e automjeteve dhe drejtuesve për autorizimin e lëvizjes.

Ora shënon 22:30 minuta dhe asnjë automjet apo qytetar nuk lejohet që të qarkullojë, sipas vendimit të qeverisë. Po ashtu edhe baret, restorantet dhe lokalet e natës janë të mbyllur

Ndryshe nga nata e parë, prej mbrëmjes të së enjtes individët dhe drejtuesit e automjeteve që lëvizin pa autorizim gjatë kohës së izolimit ndëshkohen me gjoba nga uniformat blu.

Ndërkohë që të gjithë ata që kanë arsye shëndetësore, emergjenca të ndryshme apo i duhet të shkojnë në punë gjatë natës, mund të aplikojnë për autorizim pranë portalit e-Albania.

Portali ofron dy kategori lejesh, për ata që duan të lëvizin për shkak të punës dhe ata që lëvizin për arsye të tjera, me ose pa makinë. Në rastet e lejes për punë, sistemi gjeneron vendin e punës dhe leja ju vjen me email.

Në rast të lejes së domosdoshme, duhet të shkruani arsyen, datën dhe orën e lëvizjes. Leja e domosdoshme mund të merret për shkaqe mjekësore, raste emergjencash, apo për të shkuar në aeroportin e Rinasit.

Si të merrni leje

– Identifikohuni si qytetar në portalin e-Albania;

– Zgjidhni shërbimin “Leje për dalje”

– Klikoni butonin “Përdor”

– Përzgjidhni llojin e lejes që ju nevojitet

 Në rast se ju nevojitet leje për punë:

– Përzgjidhni opsionin “Leje për punë”

– Përzgjidhni mënyrën e qarkullimit “Me mjet” ose “Pa mjet”

Në rast se ju nevojitet leje për arsye të domosdoshme:

– Përzgjidhni opsionin “Leje për arsye të domosdoshme”

– Shkruani saktë datën dhe arsyen e lëvizjes

Tv Klan