Kryeministri i Sllovakisë, Robert Fico, ka kërcënuar se do të shkurtojë mbështetjen financiare për më shumë se 130,000 refugjatë ukrainas, pas një mosmarrëveshjeje me Ukrainën për furnizimet me gaz rus.

Kryeministri sllovak Robert Fico në një video-mesazh të postuar në Facebook deklaroi se partia e tij Smer do të konsideronte ndërprerjen e furnizimit me energji elektrike në Ukrainë.

“Unë deklaroj se partia ime është gati të debatojë për ndalimin e furnizimeve me energji elektrike dhe për uljen e ndjeshme të mbështetjes për qytetarët ukrainas në Sllovaki. E vetmja alternativë për një Sllovaki sovrane është rinovimi i marrëveshjes së tranzitit të gazit ose kërkesa për mekanizma kompensimi që do të zëvendësojnë humbjen në financat publike prej afro 500 milionë euro”, tha ai.

Eksportet e gazit rus nëpërmjet tubacioneve të epokës sovjetike që kalonin përmes Ukrainës u ndalën në ditën e Vitit të Ri, duke shënuar fundin e dekadave të dominimit të Moskës mbi tregjet e energjisë evropiane, pasi kontrata e tranzitit midis Rusisë dhe Ukrainës skadoi.

Sllovakia ka furnizime alternative me gaz, por Fico, i cili i ka dhënë fund ndihmës ushtarake për Ukrainën dhe ka kërkuar marrëdhënie më të mira me Moskën, thotë se Sllovakia do të humbasë të ardhurat e veta nga tranziti dhe do të paguajë tarifa shtesë tranziti për të sjellë  në vend gazin jo-rus. Ai ka thënë gjithashtu se çmimet evropiane të gazit dhe energjisë do të rriten si rezultat i veprimeve të Ukrainës.

Zelenskiy akuzoi Ficon javën e kaluar për hapjen e një “fronti të dytë energjetik” kundër Ukrainës me urdhër të Rusisë. Polonia është ofruar të mbështesë Kievin në rast se Sllovakia ndërpret eksportet e saj të energjisë elektrike, furnizime që janë thelbësore për Ukrainën, termocentralet e së cilës sulmohen rregullisht nga Rusia.

Qeveria e Polonisë e quajti mbylljen e furnizimit me gaz rus nga ana e Ukrainës “një fitore tjetër” kundër Moskës, ndërsa Komisioni Evropian tha se BE-ja ishte përgatitur për ndryshimin. Moldavia, e cila nuk është në BE, po vuan tashmë mungesa. Rusia ende mund të dërgojë gaz në Hungari, Turqi dhe Serbi përmes tubacionit TurkStream përmes Detit të Zi.

Klan News