Partia Demokratike reagoi pasi SPAK mori të pandehur kryebashkiakun e Mallakastrës, Qerim Ismailaj dhe dërgoi dosjen në gjykatë për gjykim. Sekretari i Përgjithshëm i PD-së, Gazment Bardhi, thotë se ky është një akt i mirëpritur drejt pastrimit të politikës.

“Marrja si i pandehur i uzurpuesit ilegjitim të Bashkisë së Mallakastrës është një akt i mirëpritur drejt pastrimit të politikës. Me kallëzimin tonë në SPAK, pasi treguam me dokumente se mandati i tij ishte i paligjshëm, PD bëri vetëm detyrën ndaj qytetarëve. Ne i qendrojmë bindjes sonë se mund të ecim përpara drejt zhvillimit pa politikanë të korruptuar e të lidhur me krimin”, shkruan Bardhi.

Për sekretarin e Përgjithshëm të PD-së të zgjedhurit në parlament, qeveri dhe bashki duhet të jenë shërbëtorë të qytetarëve ndërsa Rama ka futur në politikë modelin e politikanit gangster. Kjo sipas Bardhit zhbëhet përmes vettingut në politikë, për të cilën selia blu ka propozuar një nismë në Kuvend.

“Të zgjedhurit në parlament, në qeveri dhe në bashki duhet të jenë shërbëtorë vetëm të interesave të qytetarëve. Edi Rama futi në politikë modelin e politikanit gangster, që rri në pushtet në aleancë me krimin. Ky model duhet zhbërë përmes vetingut në politikë. Shqiptarët meritojnë të qeverisen nga politikanë me integritet”, tha Bardhi./tvklan.al

SPAK mbyll hetimet për kryebashkiakun e Mallakastrës, dërgohet dosja në gjykatë