Gjykata e Lartë në Spanjë ka bllokuar aplikacionin e mesazheve, Telegram. Vendimi erdhi pas një ankese të organizatave mediatike se kjo platformë po lejonte përdoruesit të ngarkonin materiale pa lejen e tyre. Spanjollët janë lënë pa akses në aplikacion të paktën për momentin pasi Gjykata e Lartë e urdhëroi diçka të tillë si masë paraprake.

Katër grupet më të mëdha mediatike në vend, Mediaset, Atresmedia, Movistar dhe Edega, u ankuan se në aplikacion shpërndahej pa autorizim përmbajtje e krijuar prej tyre dhe e mbrojtur nga e drejta e autorit.

Telegrami është aplikacioni i katërt më i përdorur i mesazheve në Spanjë dhe tashmë që prej të Hënës nuk do të jetë më në dispozicion të qytetarëve. Gjyqtari i çështjes kërkoi që kompania që zotëron aplikacionin të dërgojë informacione në kuadër të kësaj dosje. Por Telegrami nuk iu përgjigj kërkesave të Santiago Pedraz dhe ky i fundit urdhëroi bllokimin e aplikacionit.

Siç shkruajnë mediat ndërkombëtare ky vendim është i përkohshëm dhe do të zgjasë vetëm disa ditë. Shumë përdorues të aplikacionit kritikuan vendimin. Megjithatë gjyqtari tha se vendimi erdhi si pasojë e mungesës së bashkëpunimit nga kompania.

Spanja nuk është vendi i vetëm që ka bllokuar Telegramin. I pari që e çaktivizoi ishte Kina në vitin 2015 pasi u përball me shumë mesazhe që kundërshtonin regjimin komunist. Për të njëjtat arsye një vendim të tillë kanë marrë edhe vende si Tajlanda, Pakistani, Irani dhe Kuba. /tvklan.al