Ylli Shehu bëhet deputet, Basha heq dorë nga të kënduarit.

Sot në Tiranë u mbajt sërish edhe seancë parlamentare edhe protestë në ambientet e jashtme të Kuvendit. Në parlament bënë betimin 4 deputetë të rinj nga listat e LSI-së, mes të cilëve edhe këngëtari Ylli Shehu.Nga ana tjetër, jashtë sallës së parlamentit u përsërit rituali i protestës, por këtë herë me incidente të vogla e hedhje shashkash, pa përdorimin e gazit lotsjellës.

Punonjësi i Prokurorisë kërcënon drejtorin e shkollës, i coi gruan në trajnim.

Një konflikt verbal, që ka përfunduar në dyert e drejtësisë, është konsumuar në shkollën e mesme “Gramoz Palushi” në Babrru.

Drejtori i shkollës, Abaz Hoxha, brenda të gjitha rregullave, ka çuar për trajnim mësuesen Aurela Baca. Por pak minuta pas këtij komunikimi, i shoqi i Aurelës, Skënder Baca e telefonon drejtorin dhe e kërcënon, pasi i ka çuar të shoqen për trajnim, pa e pyetur.

Më pas Skënderi i shkon drejtorit edhe në zyrë, duke e thelluar kërcënimin, me tagrin e personit që punonte në Prokurorinë e Përgjithshme.

Biseda është e regjistruar dhe duket qartë kërcënimi i Skënderit, ndaj drejtorit të bashkëshortes.

Dy vjet pas kësaj situate, Abaz Hoxha shkon të bëjë denoncim dhe e gjen veten të denoncuar nga Skënder Baca.

Prokuroria në këto kushte lëshon urdhër pezullimi nga detyra për drejtorin e shkollës, por jo për punonjësin e saj, që e kishte kërcënuar në zyrë.

Pas një kalvari të gjatë, Gjykata e Apelit ktheu në detyrë drejtorin e shkollës e po kështu veproi edhe drejtoresha e ZA Kamëz, Ermioni Çekani.

“Në Pranverën e 2016-s, marr një njoftim nga Zyra Arsimore Kamëz për të zhvilluar trajnime të dy mësuesve për një projekt që kishte të bënte me hedhjen e të dhënave të nxënësve në sistem. Disa kohë më parë, 1 apo 2 muaj përpara kishin bërë trajnimin dy mësues, Valtin Nikolli dhe ish-mësuesja Aurela Baca. I jap njoftimin para sallës së mësuesve që këto dy mësues, ditën e hënë në orën 09:00 do të jenë në x vend për t’u trajnuar. Nuk kalon 2-3 minuta marr një telefonatë. Jam Skënder Baca, bashkëshorti i mësueses Aurela Baca, punonjës në Prokurorinë e Përgjithshme. Kush je ti që guxon të më çosh në trajnim bashkëshorten time, e di ç’të bëj unë, po më prit në zyrë se do ta tregoj se sa kohë do të jesh në atë detyre, etj. Më kërcënoi dhe nuk vonoi 10-15 minuta vjen në zyrën time. Pse e dërgon bashkëshorten time në këto trajnime? Unë duke ia argumentuar, ssepse duhet të shkojë kjo që e kishte nisur këtë trajnim dhe ishin disa kishte që duhet të shkonte ajo.. dhe vazhdoi me kërcënimet”, tregon për Stop, denoncuesi Abaz Hoxha, i cili shton: “I ndodhur në këtë presion bëra regjistrimin me një telefon fare të keq që m’u gjet”.

Punonjësi i Prokurorisë, Skënder Baca: Tani unë, kur çohet dikush, që çohet për trajnime, ose këto që e çojnë i ngarkuar me këto gjëra, duhet t’i marrësh dhe leje, mor zotëri! Zonjë, ti do shkosh? Mund të shkosh për këto punë apo jo?

Abaz Hoxha, drejtori i shkollës: Tani unë.., trajnimet m’i cakton tjetërkush. Nuk i caktoj unë.

Punonjësi i Prokurorisë, Skënder Baca: Po! Kam informacion të detajuar për ju. Kam informacion tepër të detajuar për ju dhe di shumë gjëra për ju. Prandaj të lutem shumë, mos më shqetëso!

Abaz Hoxha, drejtori i shkollës: M’i thuaj gjërat mo Skënder, m’i thuaj pa frikë!

Punonjësi i Prokurorisë, Skënder Baca: Do të shkosh edhe për ndjekje penale!

Abaz Hoxha, drejtori i shkollës: Mua për ndjekje penale?

Punonjësi i Prokurorisë, Skënder Baca: Unë të thërras për ndjekje penale!

Abaz Hoxha, drejtori i shkollës: Ouu..

Punonjësi i Prokurorisë, Skënder Baca: Nuk i di ti denoncimet më mirë sesa unë. S’ke shanse për denoncime! Harroje!

Abaz Hoxha, drejtori i shkollës: S’të kuptoj ty, ç’do me thënë ti?

Punonjësi i Prokurorisë, Skënder Baca: Të lutem..!

Abaz Hoxha, drejtori i shkollës: Ministria e Arsimit…

Punonjësi i Prokurorisë, Skënder Baca: Ore, zotëri..!

Abaz Hoxha, drejtori i shkollës: Ministria e Arsimit më ka sjellë mua këtu.

Punonjësi i Prokurorisë, Skënder Baca: Sillu në rregull me arsimtarët zotëri! Mos u sill si ta do qejfi ty! Ky është i njerkës, ky është i asaj…, je në vete apo…?!

Por historia nuk mbaroi me kaq. 2 vjet më vonë, Drejtori Hoxha e gjeti veten të paditur në prokurori për shpërdorim detyre, nga bashkëshortja e punonjësit të Prokurorisë.

“Dy vite më vonë, unë e pashë veten i akuzuar në Prokurorinë e Rrethit Gjyqësor Tiranë. I akuzuar nga bashkëshortja e Skënder Baçit, punonjës i Prokurorisë së Përgjithshme, për shpërdorim detyre. Që do të thotë që unë kisha zhdukur dokumente nga dosja e konkurrimit të zonjës Baça, edhe përfitim financiar.”

“Në fund të vitit shkollor që sapo kaloi për shkak të rënies së numrit të nxënësve, ra edhe numri i klasave, të 12 dhe të 11-ta. Për shkak të rënies së numrit të klasave do të kishte dhe shkurtim të numrit të mësuesve, sepse ndryshoi edhe kurrikula e klasës së 12-të dhe u shkurtuan mësues. Një mësues Anglishteje, një mësues Bio-Kimie dhe një mësues Fizike. Për këtë unë i drejtohem Komisionit të Vlerësimit të Dosjeve të Zyrës Arsimore Kamëz dhe ai më kthen përgjigje duke më renditur sipas pikave, mësuesit që do të shkurtohen. Dhe sipas pikëve, mësuesi më me pak pikë për lëndën Fizikë, ishte bashkëshortja e zotit Baca, Aurela Baca. Duke qenë se unë ndihesha i kërcënuar vazhdimisht për shkak të pozicionit të punës së bashkëshortit të saj, i cili dy vite më parë edhe më kishte kërcënuar. Dhe shpifjeve që ajo vazhdonte të bënte herë pas herë, në letrat e saj, unë iu drejtova Prokurorisë së Rrethit Gjyqësor Tiranë, më 17 Dhjetor 2018. Çuditërisht kur unë shkoj në Prokurori thirrem nga oficeri i Policisë Gjyqësore. A më thotë që ju nuk jeni vetëm kallëzues, por jeni edhe i kallëzuar. Nga bashkëshortja e zotit Baca isha kallëzuar për shpërdorim detyre. Prokuroria lëshon urdhrin për pezullim për një periudhë 3 mujore, për të punuar në poste publike. Pas këtij rasti unë iu drejtova Gjykatës së Apelit Tiranë. Gjykata e Apelit më dha të drejtë, duke më hequr masën e sigurisë dhe më dha të drejtën për rikthim në detyrë.”

“Ngarkesa psikologjike e imja ishte aq e madhe sa po them që, nga ajo ditë, orët me gjumë të miat kanë qenë shumë të kufizuara”.

Gazetarja e Stop bisedoi edhe me Drejtoreshën e Zyrës Arsimore Kamëz, Ermioni Çekani, e cila tha se i gjithë konflikti ishte artificial.

“Është një konflikt artificial do të thosha unë, ku nuk ka fare konflikt. Abaz Hoxha ka zbatuar të gjithë legjislacionin pikë për pikë, ashtu siç duhet të ndodhë në arsim. E gjithë kjo dosja këtu, me të gjithë dokumentacionin, është dosja e Aurelës, është komunikimi që ajo ka pasur, duke filluar ankimimet me Zyrën Arsimore, me Ministrinë e Arsimit, etj. I kemi kthyer përgjigje rast pas rasti, ajo ka bërë ankesë edhe në Ministrisë e Arsimit. Pas ankimit të saj na ka ardhur një grup inspektimi nga Ministria e Arsimit, tek gjimnazi “Gramoz Palushi” dhe në Zyrën Arsimore Kamëz. Po ashtu jemi inspektuar edhe nga Drejtoria Arsimore Rajonale e Qarkut Tiranë dhe gjithçka ishte sipas ligjit. I gjithë dokumentacioni ishte në rregull, nuk ishte bërë asnjë shkelje dhe Aurela duhet të vazhdonte punën në një nga shkollat që ne i kishim ofruar. Por Aurela nuk donte dhe ende sot nuk ka filluar. Ne na ka ardhur një shkresë nga Prokurorinë e Tiranës, në fakt dhe ne jemi habitur, sepse ishte hera e parë që ndodhte një gjë e tillë, që prokuroria merrej me këtë… Dhe në momentin që është vendim gjykate, ne jemi të detyruar që ta zbatojmë dhe ta respektojmë. Sapo na erdhi vendimi i gjykatës morëm të gjitha masat për të bërë pezullimin e drejtorit të shkollës, duke e zëvendësuar me një tjetër që puna të vazhdojë, derisa Abazi të fitojë gjyqin.”

Pasi u njoh me vendimin e marrë nga Gjykata e Apelit, zonja Çekani tha se sapo të vijë vendimi në fjalë, zoti Hoxha do të rikthehet në detyrë.

“Ne presim shkresën që të na vijë që ta rikthejmë në vendin e punës. Ai është në vendin e tij. Vendimi i gjykatës ashtu siç erdhi që do të pezullohet, do të vijë dhe vendimi i Gjykatës së Apelit që ai ka dalë i pafajshëm dhe hiqet masa e pezullimit.”

VKM, që kundërshtojnë njëra-tjetrën, ndryshojnë listat e ekselencës.

Studentët e juridikut denoncojnë në “Stop” ndryshimin e listave të studentëve të ekselencës. Në mes të Janarit u publikua një listë emërore, e cila më pas u ndryshua. Studentët e ekselencës marrin 100 mijë lekë të vjetra në muaj dhe nuk paguajnë për vitin akademik.

Punonjësja e sekretarisë në universitet pranon se listat janë ndryshuar. Sipas saj, VKM-ja e parë kërkonte mesatare aritmetike, ndërsa e dyta mesatare të ponderuar. Si pasojë shumë studentë janë hequr nga listat e ekselencës.

Gazetarja e “Stop”:Jemi pranë Fakultetit të Juridikut, ku studentët e ekselencës, të mesatares 9 dhe 10 janë drejtuar në emisionin “Stop”, pasi çuditërisht në javën e parë të muajit Shkurt 2019 janë përjashtuar nga kjo listë. Çfarë ka ndodhur? Në mes të Janarit të këtij viti është publikuar një listë e studentëve të ekselencës, ku përllogaritja është bërë në mënyrë aritmetike, ndërsa në javën e dytë të muajit shkurt kjo listë ka ndryshuar, duke penalizuar kështu një numër të konsiderueshëm të studentëve. Nuk dihet se çfarë ka ndodhur dhe studentët kërkojnë të drejtën e tyre, pasi kjo listë i penalizon. Çka do të thotë se humbin të drejtën për marrjen e bursës me vlerë 100 mijë lekë të vjetra në muaj, në total 900 mijë lekë të vjetra, si edhe bëhet fjalë për të mos paguar të gjithë vitin akademik. E vetmja listë që nuk ka ndryshuar është ajo e vitit të parë, pasi të dhënat kanë ardhur nga ministria e Arsimit dhe sportit duke iu referuar maturës shtetërore. Ndërsa në vitin e dytë të Fakultetit të Juridikut, janë hequr 14 emra të studentëve të cilësuar ekselentë, duke u zëvendësuar me tre emra të rinj, në vitin e tretë të bachelorit janë hequr 13 emra duke u zëvendësuar me 10 emra të rinj. Për këtë arsye në jemi pranë sekretarisë mësimore të këtij fakulteti dhe do të pyesim se çfarë ka ndodhur.

Gazetarja: Ka ndryshuar lista e ekselentëve, për këtë jam.

Punonjësja e sekretarisë: Ka ndryshuar, sepse ka ndryshuar edhe VKM-ja. VKM-ja e parë thoshte, që detyrimet e dy viteve për studentët e vitit të tretë, duhet t’i kenë shlyer të gjitha dhe tani thotë duhet të kenë shlyer vetëm detyrimin e vitit paraardhes, që janë, domethënë të vitit të dytë, jo edhe të vitit të parë. Fillimisht ka qenë një VKM, që thoshte, gjithmonë bëhet fjalë te studentët e vitit të tretë, se te studentët e vitit të dytë, nuk ka shumë ndryshime.

Gazetarja: Ishin 3 emra, ishin hequr 14 dhe ishin shtuar 3.

Punonjësja e sekretarisë: Po pra, janë shtuar 3, sepse ne VKM-ja e parë thoshte: duhet të kenë shlyer detyrimet dhe të vitit të parë dhe të vitit të dytë. VKM-ja 40 thotë: duhet të kenë shlyer vetëm detyrimet e vitit paraardhës, do të thotë, që viti 2.

Gazetarja: Po pra, po kjo nuk e penalizon atë, që të iki nga lista?

Punonjësja e sekretarisë: Jo, jo penalizon një student dhe shton një tjetër, që ka shlyer detyrimet e vitit të dytë. Në listat e para, që na u kërkua si informacion, ka qenë me aritmetike të thjeshtë, se thoshte mesatare aritmetike vjetore, nuk e përcaktonte të ponderuar dhe financa ka marrë listat, që kishim ne dhe i ka çuar në Bord. Me atë, fillimin e protestës, u kërkua një informacion shpejt, shpejt dhe ishin listat gati me aritmetike të thjeshtë. Por që kjo është e vërteta dhe kështu qëndron, domethënë janë ndryshuar nga VKM-të, që na i kanë sjellë.

Gazetarja e “Stop”: Me pushimin e protestës së studentëve, një VKM e datës 23 Janar 2019 ka ndryshuar përllogaritjen e mesatares, nga aritmetike, në mesatare të ponderuar dhe kështu penalizohen studentët.

Në lidhje me problematikën në fjalë, duke qenë se Fakulteti i Juridikut është pjesë e Universitetit të Tiranës, “Stop” iu drejtua administratorit të Universitetit të Tiranës. “Por, për fat të keq nuk arritëm ta takojmë pasi ai është gjithmonë nëpër takime.”

Gazetarja: Si jeni? Për Administratorin?

Punonjësi i sigurisë: Administratori? S’është këtu…ëëë? Ka ik, ka nja një orë e ca.

Punonjësi: Për momentin jo, se është në takim nëpër fakultete.

Më pas gazetarja iu drejtua edhe Ministrisë së Arsimit. “Në përgjigjen e ardhur me email duhet thënë se na janë cituar aq shumë VKM sa nuk dimë nga t’ia fillojmë. Megjithatë, po citojmë vetëm VKM-në e fundit, atë të datës 23 Janar 2019. Në shkronjën B të pikës së parë thuhet se “studentët duhet të kenë shlyer të gjitha detyrimet e vitit paraardhës akademik, për të cilin llogaritet nota mesatare vjetore e ponderuar.”

Dhe në fund “dopio gjashta” i kalon sërish Universitetit të Tiranës, ku citohet neni 49 i rregullores së këtij universiteti: “Në përfundim të programit të studimit, studentëve u njehsohet nota mesatare e ponderuar që merr në konsideratë edhe kreditet respektive, për çdo disiplinë apo veprimtari tjetër formuese.”

Gazetarja e “Stop”: Por kujtojmë që kjo VKM erdhi pikërisht pasi u qetësua vala e protestave të studentëve pasi në kulmin e kësaj proteste duhet thënë që janë çuar lista me përllogaritje të mesatares aritmetike. Dhe ndryshimi që ndodhi në këtë VKM penalizoi studentët, sidomos ata që ishin në kufi të mesatares 9, 9.1, 9.2, të cilët automatikisht zbritën më poshtë kësaj mesatareje duke mos përfituar nga të gjitha benefitet e bursës vjetore akademike.