Austin FC, një nga klubet në rritje të Major League Soccer, bëri bujë me interesimin për Myrto Uzunin. Raportohet se amerikanët kanë pranuar që t’i paguajnë Granadës 12.3 milionë Dollarë, duke e konsideruar lojtarin si atë që do t’i çojë drejt lavdisë.

Uzuni mund të mos jetë një emër i njohur për tifozët amerikanë por te Granada, ai është kthyer në një nga lojtarët kryesorë me një nuhatje për gola dhe aftësitë që mund ta ndryshojnë lojën në mënyrë të menjëhershme.

29-vjeçari shqiptar është pikërisht ai lloj sulmuesi që nuk i shmanget rreziqeve. Ai është i shpejtë, kreativ dhe di se si të bëjë gol, cilësi që kërkohen te lojtarët nga çdo skuadër.

Transerimi i Uzunit dërgon një mesazh të qartë në MLS: Austin nuk është ekipi vetëm për pjesëmarrje në kampionat. Ata duan kreun.

Por hedhja e kaq shumë parave për një lojtar që ende duhet të provojë veten në MLS, mund të konsiderohet si një lëvizje e rrezikshme, pothuajse e dëshpëruar.

Megjithatë, kjo marrëveshje flet gjithashtu për rritjen e kampionatit amerikan. Gjithnjë e më shumë, ekipet janë të gatshme të hapin arkat e tyre për të sjellë talente ndërkombëtare. Dhe kjo është një shenjë e mirë. Kjo tregon se liga po bëhet më konkurruese dhe se klubet duan të rrisin nivelin e lojës.

Në mediat amerikane shkruhet gjithashtu se Austin FC do t’i paguajë Myrto Uzunit 2.1 milionë Euro në sezon. Lojtari donte të qëndronte në Granada për 1 milion Euro, por klubi nuk i plotësoi kërkesat e tij.

Kontrata e ofruar sulmuesit të Kombëtares Shqiptare është për tre sezone me një opsion rinovimi për sezonin e katërt.

Klan News