Më shumë emigrantë dhe refugjatë po nisin udhëtime të rrezikshme nëpër Afrikë drejt brigjeve jugore të Detit Mesdhe, ku përballen me rrezikun në rritje të abuzimit, si rrëmbimi dhe vjedhja e organeve.

Rrugët që përshkojnë Saharanë drejt veriut nga Afrika Perëndimore dhe Lindore mendohet të jenë dy herë më vdekjeprurëse sesa rruga detare qendrore e Mesdheut, ku tashmë më shumë se 800 njerëz mendohet se janë mbytur këtë vit, thuhet në një raport nga OKB.

Vincent Cochetel, i dërguari i posaçëm për Mesdheun Perëndimor dhe Qendror për agjencinë e OKB-së për refugjatët (UNHCR), e cila bashkëprodhoi raportin prej 71 faqesh, ka deklaruar se një pjesë e konsiderueshme e dëshmive të emigrantëve citonin raste ku emigrantët janë braktisur nga kontrabandistët në shkretëtirë duke humbur jetën mes të nxehtit ekstrem.

Vicent Cochetel, i dërguari special për Mesdheun Perëndimor dhe Qendror: Ne kemi arsye shumë të forta për të ngritur zërin dhe për t’u zemëruar nga niveli i lartë i dhunës përgjatë kësaj rrugë kaq vdekjeprurëse. Disa prej tyre mund të adresohen dhe ne nuk mund të shkojmë në një rrezik zero, por duhet të ketë një përgjigje më të mirë, për menaxhimin më të mirë të kufirit, gjë që është bërë rruga e shkurtër që shumë shtete po përdorin për të thënë se është mënyra për ta rregulluar atë. Epo, menaxhimi më i mirë i kufirit nuk mund të jetë një justifikim për atë nivel dhune përgjatë rrugës. Duhet të vijë me referimin e duhur, shërbimet e duhura dhe llogaridhënien e duhur për ata që shkaktojnë atë dhunë përgjatë asaj rruge.

Studimi i bashkëshkruar nga Organizata Ndërkombëtare për Migracionin ka bërë të ditur se më shumë njerëz po udhëtojnë përgjatë muajve të fundit në krahasim me 3 vjet më parë, duke cituar të dhënat e UNHCR-së në Tunizi, të cilat treguan një rritje m ëshumë se 200% të mbërritjeve në vitin 2023.

Vincent  përmend konfliktet në pjesë të Sahelit dhe Sudanit si faktorë, si dhe ndryshimet klimatike dhe racizmin në rritje si faktorë nxitës të emigrimit.

Pothuajse një në pesë emigrantë (18%) thanë se kishin frikë nga rrëmbimi dhe një numër në rritje i frikësohej dhunës seksuale (15%), tregoi sondazhi. Qindra kanë rënë viktima të trafikantëve organet e të cilëve janë shitur.

Vicent Cochetel, i dërguari special për Mesdheun Perëndimor dhe Qendror: Dhuna fizike është rreziku kryesor i raportuar nga 38% e të anketuarve. Është mjaft interesante të shihet mënyra se si po shfaqen disa nga rreziqet e reja në këtë raport të dytë. Për shembull, më parë rreziku i vdekjes raportohej nga 14% e të anketuarve, tani është nga 20% e të anketuarve. Shumë njerëz na thonë se janë të vetëdijshëm për dikë që ka vdekur gjatë rrugës, ose normalisht më shumë në rrugët tokësore sesa në rrugët detare. Rreziku i dhunës seksuale me bazë gjinore është rritur gjithashtu në 15%. Në raportin e mëparshëm ishte 12.5%. Tani përmendet nga 18% e të anketuarve, pothuajse një në pesë pretendojnë se udhëtimi përfshinte rrezik për rrëmbime.

Ndërsa emigrantët përmendën kontrabandistët si ndër abuzuesit e tyre, ata theksojnë gjithashtu bandat kriminale dhe zyrtarë shtetërorë si policia dhe rojet kufitare që në disa raste kishin hedhur emigrantët në anën tjetër të kufijve të tyre, tha Cocheteli UNHCR-së.

Bram Frouws, drejtor i qendrës së emigrimit: Edhe pse nuk kemi shifra plotësisht të sakta, dhe në të vërtetë është një nënvlerësim, që të tjerë vdesin në rrugët tokësore deri në bregdetin e Mesdheut, ndoshta edhe më shumë se në det. Pra, ky është me të vërtetë një nocion i rëndësishëm nga ky raport i ri që do të doja të theksoja, është se ne nuk duhet të harrojmë atë që po ndodh në rrugët tokësore, në këto rrugë nëpër shkretëtirë. Dhe ne me të vërtetë duhet të rrisim kapacitetin tonë për kërkim dhe shpëtim në shkretëtirë në këto rrugë tokësore.

Në raportin e OKB-së ndër të tjera thuhet se disa kontrabandistët janë arrestuar por ende kërkohet progres pasi më shumë ardhje masive emigrantësh po ndodhin çdo muaj në Mesdhe, kryesisht në Spanjë, Greqi, Qipro dhe Itali.

Në vitin 2023, miliona njerëz u zhvendosën me forcë për shkak të përkeqësimit të sigurisë dhe konfliktit në grupin e vendeve që shtrihen nga Afrika Perëndimore në Lindje dhe Briri i Afrikës. Efektet e ndryshimeve klimatike kanë përkeqësuar më tej zhvendosjen e detyruar.  Pjesa më e madhe e zhvendosjes së re u shkaktua nga shpërthimi i konfliktit në Sudan në prill 2023, i cili solli luftime të gjera, kriminalitet dhe kolapsin e bankave, shëndetësisë, telekomunikacionit dhe shërbimeve të tjera bazë.

Më shumë se 6.5 milionë sudanezë u zhvendosën brenda vendit, pothuajse 1.3 milionë të tjerë kërkuan strehim në vendet fqinje, veçanërisht në Çad, Egjipt dhe Sudanin e Jugut, ndërsa 506,000 refugjatë sudanezë të Jugut u detyruan të kthehen në vendin e tyre në kushte të pafavorshme. Kjo shtoi ndjeshëm nevojat tashmë të mëdha humanitare në rajon.

Më 10 prill 2024, Parlamenti Evropian votoi në favor të rregullave të reja për migracionin, të ndjekur nga miratimi zyrtar i tyre nga Këshilli i BE-së, më 14 maj 2024, duke i lejuar BE-së të trajtojë çështje komplekse me vendosmëri dhe zgjuarsi. Kjo do të sigurojë që Bashkimi të ketë kufijtë jashtë me të fortë dhe të sigurt, të garantohen të drejtat e njerëzve dhe që asnjë vend i BE-së të mos mbetet vetëm nën presion.

Lufta në Lindjen e Mesme dhe mundësia e rikthimit në pushtet nga Donald Trump në Shtetet e Bashkuara do të çonin në flukse të mëdha njerëzish, ka bërë të ditur Qendra Ndërkombëtare për Zhvillimin e Politikës së Migracionit me bazë në Austri (ICMPD). 

Pas përshkallëzimit të luftës në Ukrainë, miliona fëmijë dhe familje u detyruan të  largoheshin nga shtëpitë e tyre. Ndërsa lufta vazhdon pa pushim, rreth 6 milionë refugjatë ukrainas mbeten në Evropë. Privimi, varfëria ekstreme, fatkeqësitë e shkaktuara nga klima, lufta dhe konflikti në vendet e origjinës, udhëtimet e rrezikshme dhe ndonjëherë vdekjeprurëse nëpër vendet tranzit, ekspozimi ndaj dhunës dhe abuzimit dhe pasiguria e zgjatur kanë efekte katastrofike në shëndetin fizik dhe mendor të fëmijëve në  lëvizje.

Rreziku i abuzimit, shfrytëzimit, trafikimit dhe dhunës vazhdon kur fëmijët mbërrijnë në Evropë, shpesh i nxitur nga diskriminimi dhe stigma.

Klan News