Pas shtytjes së presidentit amerikan Donald Trump për negociata mbi luftën në Ukrainë, Polonia thotë se partnerët e BE-së mund të takohen të hënën për konsultime në Paris.
“Presidenti francez Emmanuel Macron ka ftuar krerët e shteteve dhe qeverive evropiane në një samit të Ukrainës”, shkroi ministri i Jashtëm i Polonisë Radoslaw Sikorski, vendi i të cilit mban Presidencën e Këshillit të BE-së. “Ne duhet të tregojmë forcën dhe unitetin tonë”, shtoi ai.
Trump pati një bisedë telefonike gati një orë e gjysmë me presidentin rus Vladimir Putin të mërkurën, ku ranë dakord për të filluar negociatat për një paqe mes Ukrainës dhe Rusisë.
Kjo ngjalli frikën midis aleatëve perëndimorë se Ukraina dhe partnerët e saj evropianë do të përjashtoheshin nga bisedimet për Ukrainën. Qeveria e SHBA më vonë e bëri të qartë se Kievi duhet të përfshihej në bisedime. Në Konferencën e Sigurisë së Mynihut të premten, nënpresidenti i SHBA JD Vance foli gjithashtu në favor të pjesëmarrjes evropiane në negociata.
/tvklan.al
