Sot do të trajtojmë rastin e një shqiptari, i cili jeton prej vitesh në Itali, por në Shqipëri ka lënë problemin e pronës.

Ilirjan Manushi tregon se ka një shtëpi në një fshat të Kavajës, të ndërtuar në tokën e babait të tij.

Motrave ua ka blerë pjesët e tyre dhe donte që të nxirrte certifikatën e pronësisë. Përmes një miku të tij njihet me Dilaver Xhafën, i cili vazhdimisht i kërkonte para për pagesa të ndryshme.

Qytetari pretendon, se Dilaveri i ka marrë 9 mijë Euro. Sipas tij, ai është prezantuar sikur punon në Kadastër. Së fundmi i ka kërkuar edhe 1000 euro të tjera.

Dilaveri i tha, se certifikata do të dilte për 4-5 muaj, por kanë kaluar 5 vjet dhe ai vetëm kërkon shuma të tjera e certifikata nuk ka ndërmend të dalë, që nga viti 2015.

Ilir Manushi: Jam Ilir Manushi, nga fshatrat e Kavajës, Shardushk. Kam ndërtuar një shtëpi, tek toka e babës tim, gjyshit tim. Motrat e mia më kanë dhuruar pjesën e tyre. Një miku im më njohu me Dylaver Xhafën, sot e 8 vjet. I filloi letrat  të gjitha, komplet. I bëri letrat e tokës.  Më duhen, tha, 4000 Euro. Morëm noterin tek shtëpia, firmosëm të gjitha letrat. Më tha, e shumta për 4-5 muaj do dali. Kanë 5 vjet. Ka që në 2015-ën.

Gazetarja: Ky personi çfarë profesioni kishte?

Ilir Manushi: Punonte në kadastër. Nuk e di, çfarë…Punoj këtu brenda thoshte. Herën e parë kërkoi 4000 e ca euro. Pastaj filloi, duhen 500, duhen 300, duhen 800, duhen 1000. Pastaj herën e fundit tha 1500.

Gazetarja: Sa ishte totali që ke paguar?

Ilir Manushi: Ka shkuar tek 9000 euroshi.

Gazetarja: Për çfarë duheshin kaq shumë lekë?

Ilir Manushi: Për të bërë letrat.

Gazetarja: Si t’i shpjegonte?

Ilir Manushi: Më duhen 1000 euro, se i duan këto të Kadastrës thoshte. Më tha mua, nga data 15-16 shkurt janë të fundit. I ke të marra letrat. Më mori pastaj, tha duhen 1000 Euro të tjera, që të dali certifikata. Pastaj s’durova dot më dhe ju mora juve.

Dilaver Xhafa thotë se është jurist dhe inxhinier, por e ushtron profesionin në një qendër interneti.

Dilaver Xhafa: Qysh je? Si ia ke cu? Me shëndet? Burrë i fortë?

Stopi: Kjo është zyra jote?

Dilaver Xhafa: Po, po!

Stopi: Po ti je noter vetë?

Dilaver Xhafa: Jurist edhe inxhinier. Në objekt janë bërë dy aplikime. Mirëpo aplikimi i parë është bërë Avdyl. Të regjistrohet Ilirjan, sepse kur regjistrohet Ilirjan, ka detyrime financiare më të vogla.

Stopi: Po pse s’ta bëjnë ata?

Dilaver Xhafa: E bëjnë ata, por janë procedurat ligjore, që vonojnë.

Stopi: Më tha i dhashë nja 10 mijë Euro…

Dilaver Xhafa: Jo, jo nuk ka dhënë 10 mijë Euro. Ai ka dhënë aq sa ka dhënë.

Stopi: Kështu tha.

Dilaver Xhafa: Po pse do bëjmë inventarin ne, a si? 2600 ka gjithsej për shtëpinë. Në këtë formë, që të kalojnë pa taksa, se me taksa shkon tek 12-13 milionë Lekë.

Stopi: Një fotokopje të aplikimeve!

Dilaver Xhafa: Duhet ta marr tek Arkiva. Në mënyrë shoqërore, sepse aplikimi më i vogël, afatin më të shkurtër, e ka 8 ditë.

Dilaver Xhafa: Tek agjencia e autobusave 1500 euro më ke sjellë. Nga 2600, 1500 më ke sjellë.

Ilirjan Manushi: Ato 500, që të solla më përpara?

Dilaver Xhafa: Kanë qenë në llogarinë e 3600 euroshit të tokave.

Ilirjan Manushi: Po këto 3600 euro ti i more përnjëherë.

Dilaver Xhafa: Të tokave, pra!

Ilirjan Manushi: Të kam sjellë edhe 500 euro, t’i solli ai fshatari im ato.

Dilaver Xhafa: Kush fshatar?

Ilirjan Manushi: Ai me kamion.

Dilaver Xhafa: Për llogari të pasurive bujqësore, të ndarjes së pronave me motrat.

Ilirjan Manushi: Kur më vdiq nona, që më kërkove edhe 500 Euro? Më the duhen edhe 500 Euro, të fillojë procesi tjetër aty. Po ato, ku hynë?

Dilaver Xhafa: Po pra, certifikatën e pate marrë, por nuk e pate kthyer tek personat. 423 Euro janë paguar vetëm për llogari të motrës.

Stopi: Do i jap 1000 euro tha, por ca do bëjë?

Dilaver Xhafa: Do i regjistroj shtëpinë. Do i jap certifikatën e shtëpisë. Unë të jap mandatin, që ke paguar kaq lekë.

Stopi: Po tek hipoteka, mos duan edhe ata ndonjë kafe?

Dilaver Xhafa: Jo, jo! Ato janë detyrat e mia. Tani në proces kam fut 5 dosje përnjëherë. T’ju çoj një peshqesh dhe vras 5 zogj. I mbyll të pestë me një peshqesh të mirë. Të kam thënë 2600 Euro dhe është mbyll ai muhabet.

Stopi: Për vete nuk marrin ata?

Dilaver Xhafa: Marrin, 300-400 euro për vete e mbajnë.

Shuma e fundit, që Dilaver Xhafa kërkoi ishte 1000 Euro, por “vuri dorën në zemër” e pranoi 973 Euro.

Stopi: S’janë 1000 Euro total, se nuk e lejonte banka.

Dilaver Xhafa: Po mirë, e shkruajmë 1000. Do korrigjojmë letra ne për 20 euro. Ca problemi kishte banka?

Stopi: Nuk dërgon dot 1000 euro, se s’të lënë këta.

Dilaver Xhafa: E di!

Stopi: 100, 200, 300, 400, 500, 600, 700, 800, 970, 973…

Dilaver Xhafa: Po ik me gjithë treshat…Do rrimë do merremi me…

Stopi: Numëroji njëherë vetë ti! Faturat, që ke paguar në hipotekë, i ke?

Dilaver Xhafa: Janë në sistem. Ikin me sistemin. Qershor, mesi i korrikut, e ke të mbaruar.

Stopi: E dua me saktësi!

Dilaver Xhafa: Unë po të them kështu tani. Po të kaloi 31 Korriku, më thuaj…!/tvklan.al