Ju mund të ndodheni në mes të një takimi apo ngjarjeje serioze dhe ndjeni dëshirën për të shkuar në tualet. Të qenit në situata të tilla ju detyron të mbani urinën për një kohë të gjatë. Ndonjëherë është në rregull, por mos e bëni shumë shpesh. Mbajtja e urinës për një kohë të gjatë mund të çojë në disa probleme serioze.

Një fshikëza urinare e shëndetshme mund të mbajë midis 400 deri në 500 mililitra urinë, ose rreth 2 gota. Urologët rekomandojnë zbrazjen e fshikëzës urinare çdo tre orë gjatë ditës, pavarësisht nëse ndjeni dëshirën për të urinuar apo jo.

Është normale të shkoni në tualet pesë ose gjashtë herë në ditë nëse pini 6-8 gota lëng. Kjo gjë ndryshon me ndryshimin e moshës. Për shembull të moshuarit kanë tendencë të bëjnë më shumë urinë gjatë natës.

Rreziqet që shkakton mbajtja e urinës

Mbajtja e urinës për periudha shumë të gjata kohore mund të dobësojë muskujt e fshikëzës dhe të çojë në probleme të tilla si mosmbajtja e urinës, që do të thotë rrjedhje e pavullnetshme e urinës. Gjithashtu mund të shkaktojë shumimin e baktereve, të cilat mund të çojnë në infeksione të traktit urinar (UTI).

Nëse nuk e zbrazni fshikëzën tuaj mirë ose nëse nuk kaloni urinë në intervale të rregullta, kjo mund të rrisë rrezikun e sëmundjes së veshkave. Veshkat filtrojnë mbeturinat dhe toksinat nga gjaku dhe formojnë urinë. Urina kalon përmes uretrave, mblidhet në fshikëz dhe më pas excretohet përmes uretrës. Nëse e mbani urinën, kjo mund të shkaktojë anomali metabolike dhe çështje të elektroliteve, të cilat mund të çojnë në dështim afatgjatë të veshkave.

Në raste të rralla, urina mund të kthehet në veshka dhe të çojë në një infeksion. Mbajtja e urinës për një kohë të gjatë mund të çojë edhe në shpërthimin e fshikëzës – një gjendje që mund të jetë vdekjeprurëse. Sidoqoftë, kjo është një dukuri shumë e pazakontë.

Mbajtja e urinës mund të jetë akute ose kronike. Individët që vuajnë nga mbajtja akute e urinës mund të ndiejnë dëshirën për të urinuar, por kur shkojnë në tualet nuk zbrazen dot. Megjithëse ndodh përkohësisht, mund të jetë kërcënuese për jetën pasi mund të çojë në këputje të fshikëzës. Përveç kësaj, kjo shkakton shqetësim ose dhimbje në pjesën e poshtme të barkut. /tvklan.al