Lajme, #edicioniinformativ ora 19:30 data 3 Korrik 2024 #TvKlan #klanlajme

Spiker: Redi Prifti

Headlines 3 Korrik 2024

Lamtumirë Ismail Kadare! Përcillet me nderime gjeniu i letrësisë shqipe

U përcoll sot me nderimet më të larta shtetërore gjeniu i letrave shqipe Ismail Kadare. Ai do të qëndrojë përkohësisht në varrezat e Tufinës, pasi kryeministri Edi Rama zbuloi se për të, do të ketë një vend të posaçëm të prehjes në të ardhmen.

Hapet të premten tuneli i Llogarasë. Balluku: Nga Tirana në Dhërmi, për 1 orë e 45 minuta

Hapet të premten tuneli Llogarasë, më i gjati në Shqipëri. Ministrja Belinda Balluku thotë se ai është një gurë kilometrik në infrastrukturën moderne shqiptare dhe do të shkurtojë në afro 1 orë 45 minuta distancën nga Tirana në Dhërmi.  

Ekstradohet nga Greqia, Laert Haxhiu. I dënuar përjetë për masakrën e Lushnjes

Ekstradohet nga Greqia, Laert Haxhiu, i arrestuar në vendin fqinj më shumë se një vit më parë. 32-vjecari është i dënuar me burgim të përjetshëm për masakrën e Lushnjës të 2017-ës ku mbetën të vrarë 2 persona dhe u plagos një tjetër.

“Shkrihet” policia e Korçës, pezullohen 19 efektivë. Përfitonin para përmes faturave fiktive

19 efektivë të Policisë së Korçës dhe asaj kufitare të këtij qarku janë pezulluar detyra me vendim të Gjykatës së Korçës. Ata dyshohet se nëpërmjet faturave fiktive kanë përfituar shuma të konsiderueshme parash si dieta dhe shpenzime akomodimi.

Arrin në 11.4% numri i familjeve me panele diellore. Ekspertët: Të nxiten me subvencione

Censi i popullsisë zbuloi se ka arritur në 11.4% numri i familjeve shqiptare qe kanë instaluar panele diellore në banesat e tyre. Ekspertët e shohin si tendencë pozitive investimin për të kursyer energji, teksa rendisin përfitimet që marrin qytetarët.

1 në 3 demokratë kërkon zëvendësimin e Biden. Mbështetësit, të zhgënjyer pas debatit me Trump

Demokratët duken në panik pas performancës së dobët që presidenti Xho Bajden pati në debatin përballë rivalit të tij Donald Tramp. Sipas sondazheve, 1 në 3 demokratë kërkon që Bajden të zëvendësohet me një kandidat tjetër.

Përcaktohen çiftet çerekfinaliste të  “Euro 2024”. Sfida të forta në Tv Klan

Janë përcaktuar tashmë të katërta sfidat çerekfinale të “Euro 2024”. Spanjë – Gjermani,  Portugali – Francë, Angli – Zvicër dhe Holandë – Turqi premtojnë emocione të forta në ekranin e Tv Klan dhe në Klan Plus.

/tvklan.al