Ministri i Shëndetësisë i Kroacisë, Vili Beros, është shkarkuar të premten, pasi u arrestuar nën dyshimin për korrupsion, tha kryeministri i vendit, Andrej Plenkoviç. Avokatja e Beros, Laura Valkoviç, tha për media vendëse se klienti i saj i mohon akuzat.

Komentet e kryeministrit erdhën pasi Zyra për Luftimin e Korrupsionit dhe Krimin e Organizuar e Kroacisë (USKOK) tha se po kryente disa arrestime.

Gjithashtu, Zyra e Prokurorit Publik Evropian (EPPO) tha se ka nisur një hetim ndaj tetë personave, përfshirë Berosin dhe drejtorët e dy spitaleve në Zagreb, nën dyshimin për ryshfet, abuzim të detyrës dhe pastrim parash.

Prokurori i Shtetit i Kroacisë, Ivan Turudiç, zyra e të cilit bashkëpunon ngushtë me USKOK-un, tha se po kryhen dy hetime paralele për dyshimet rreth këtyre veprave penale dhe se prokurorët evropianë nuk e kishin njoftuar zyrën e tij ose USKOK-un për hetimin e tyre.

EPPO-ja deklaroi se një grup kriminal, i cili kërkonte të siguronte financim për shitjen e pajisjeve robotike mjekësore në disa spitale, dyshohet se u kishte dhënë ryshfet zyrtarëve për të fituar kontrata për projekte, duke përfshirë ato të financuara nga BE-ja.

EPPO-ja konfirmoi në një deklaratë për Reuters se nuk i kishte njoftuar autoritetet kombëtare kroate për hetimin që e kishte nisur në Korrik, duke shtuar se kishte kërkuar nga Zyra e Prokurorit të Shtetit (DORH) që të transferonte dosjen e saj tek EPPO.

Turudiç tha se Beros akuzohet për ndikim të paligjshëm. Ai tha se dy persona të tjerë janë arrestuar dhe një subjekt juridik do të hetohet për veprën penale të marrjes së ryshfetit.

Personat e arrestuar do të dalin para një gjykatësi hetues, i cili do të vendosë për ndonjë masë paraburgimi, tha Turudiç në një konferencë për shtyp.

“Ajo që është e qartë është se bëhet fjalë për vepra penale të korrupsionit“, tha Plenkoviç.

“Në emër të Qeverisë, dua të them se agjencitë e autorizuara për ndjekje penale duhet të hetojnë gjithçka”, shtoi ai./REL