Amerika zgjedh Presidentin, Donald Trump shpall fitoren (Të gjitha zhvillimet)

Siç po shkojnë zgjedhjet në Shtetet e Bashkuara të Amerikës, Donald Trump pritet që të fitojë edhe në votë popullore. Këtë gjë ai nuk e arriti as në 2016.

Kujtojmë se Trump ka bërë paralajmërime për dëbime të mëdha të emigrantëve të paligjshëm, më shumë tarifa për tregtinë e jashtme dhe se do t’i japë fund luftën në Ukrainë dhe Lindjen e Mesme.

Donald Trump iu drejtua mbështetësve të tij pasi Fox News e shpalli fitues të zgjedhjeve.

“Zoti ma kurseu jetën për një arsye”, tha Trump duke iu referuar atentatit ndaj tij.

“Dhe kjo arsye është që të shpëtoj vendin tonë dhe të rikthej Amerikën madhështore. Tashmë do ta realizojmë këtë mision sëbashku”, shtoi ai.

Pasi deklaroi fitoren e postit presidencial, Donald Trump iu referua Elon Musk si ylli i ri i Partisë Republikane. “Ai është një njeri i mrekullueshëm”, u shpreh Trump.

Ka shpërthyer festa në kampin republikan! Donald Trump ka mbërritur në West Palm Beach të Florida-s bashkë me bashkëshorten e tij, Melanie. Ai është ngjitur në podium, si presidenti i 47-të i Shteteve të Bashkuara.

“Është fitore e madhe politike! Dua t’i falenderoj të gjithë shtetasit e Shteteve të Bashkuara për besimin e madh. Do punoj për ju, familjet tuaja, me çdo frymëmarrje të trupit tim. Do ndërtoj një të ardhme që meritoni ju në Shtetet e Bashkuara. Ta bëjmë Amerikën sërish të madhe! E dua shumë Karolinën e Veriut, Wisconsin…Kemi fituar në shumë shtete të tjera, rezultate të jashtëzakonshme për ne.“

“S’kishte rrugë tjetër përveç fitores! Kemi një votë popullore shumë të madhe”, tha ai në fjalimin e fitores… Lexo më shumë

Trump pritet që t’i drejtohet mbështetësve të tij në Florida. Në momentin që Fox News e projektoi fitimtar kandidatin republikan simpatizantët e tij shpërthyen në festë.

“Duam Trump! Duam Trump”, thërriste turma që pret një fjalim nga Trump.  

Donald Trump shumë pranë postit presidencial të Shteteve të Bashkuara, për herë të dytë. Siç thotë CNN, projeksionet e tregojnë fitues edhe në Pensilvani.

Bazuar në projeksionet e Fox News, ish-presidenti Donald Trump ka fituar 277 vota elektorale ndërsa Zëvendëspresidentja Kamala Harris ka 226 vota elektorale.

Media amerikane, Fox News thotë se fitues i zgjedhjeve në SHBA do të jetë Donald Trump bazuar në projeksionet e saj. Në këtë mënyrë, republikani Trump do të bëhet President i 47 i Shteteve të Bashkuara të Amerikës.

Pritet që Trump të fitojë në Wisconsin, një shtet në të cilin humbi shumë ngushtë katër vite më parë ndaj Joe Biden. Ai do të bëhet president i dytë në historinë e SHBA-së që fiton një mandat të dytë jo të njëpasnjëshëm. I pari ishte Grover Clevelend.

Partia Republikane do të marrë edhe kontrollin e Senatit amerikan, sipas një projeksioni të CBS.

Ende vijon numërimi i votave, por duket e qartë sipas mediave amerikane se Demokratët do të humbin shumicën me 1 senator më shumë që kishin.

Sipas asaj që shkuan BBC demokratët kanë dështuar që të mundin senatorin Ted Cruz në Teksas.