Në një lidhje në Skype për programin “ Historia ime” në Tv Klan ishte psikotraumatologia Besarta Taçi. Ajo shpjegoi se shoqata që ajo drejton ka hapur një linjë këshillimi psikologjik për bluzat e bardha. Në situatën që po përballemi si pasojë e pandemisë është mjaft e rëndësishme edhe këshillimi për mjekët.

Taçi shprehet se bluzat e bardha jo vetëm që përjetojnë stresin që kjo situatë mbart, por edhe rëndesën e ritmeve të punës.

Besarta Taci: Nuk është se ne kemi ndalur mbështetjen me të gjithë qytëtarët, por krahas kësaj pune më qytetarët e kemi zgjeruar mbështetjen tonë edhe ndaj atyre që janë në linjë të parë, që janë personat e parë që rrezikojnë jo vetëm veten e tyre, por edhe të familjarëve. Kështu që flitet për te gjithë mjekët, infermierët dhe për gjithë personelin mjekësor. Jemi shumë optimistë në këtë drejtim sepse edhe Qendra Kombëtare e Urgjencës Mjekësore na ka mbështetur duke publikuar nismën tonë. Shumë infermierë, madje jo vetëm infermierë që punojnë në Shqipëri, por edhe infermierë që punojnë jashtë Shqipërisë dhe që ndodhen në situata shumë delikate, për sa i përket ndihmës që japin në urgjencë.

Mirela Milori: Ka patur telefonata ose kontakt nga staf mjekësor?

Besarta Taci: Ka pasur telefonata nga disa infermierë, që duke qenë se janë në ritme pune, këtë duhet ta themi absolutisht goxha intensive në këtë periudhë, jo vetëm që përjetojnë stresin që është natyrshëm që të jetë i tillë në këtë periudhë, por vështirësia më e madhe është kur ata kthehen në shëtëpi dhe janë shumë të frikësuar për sa i përket ndonjë lloj infektimi edhe ndaj familjarëve të tyre.

Mirela Milori: Janë të rënduar psikologjikisht? Si i sheh në rrëfimet e tyre, në atë që tregojnë?

Besarta Taci: Rëndesa që vihet re jo vetëm në profesionistët shqiptarë, por edhe tashmë në gjithë globin, rëndesa është disi normale fiziologjike sepse ka të bëjë jo vetëm me rëndesën e ritmeve, pra të turneve të punës, por me një rëndesë që ka të bëjë me numrin e të infektuarve, por edhe të vdekjeve. /tvklan.al