PËRDITËSIMI I FUNDIT NË ORËN 19:56

Gjykata e Apelit të Tiranës vendosi këtë të premte që të rikthejë në Shkallën e Parë vendimin e dhënë nga gjykatësi Agron Zhukri dhe për të pranuar palën e Alibeajt, si palë në gjykim për vulën dhe logon e Partisë Demokratike.

Gazetarja Glidona Daci, e cila prej orën 11:00 të ditës së sotme ka ndjekur procesin nga afër tha se “vendimi i Gjykatës së Apelit nuk është se dha të drejtën për legjitimimin e Enkelejd Alibeajt në këtë proces, por Apeli tha se do të duhet që kjo çështje të rikthehet edhe njëherë për rigjykim në Shkallë të Parë ku do të duhet të shprehet kjo gjykatë, duke qenë se tashmë vendimi i dhënë nga gjyqtari Agron Zhukri është shpallur nul”.

Çfarë do të thotë vendimi i marrë këtë të premte?

Vula dhe logoja do të vazhdojnë t’i mbeten grupit të Enkelejd Alibeajt, deri në një moment të dytë, ku gjykata do të duhet të mblidhet edhe njëherë në Shkallë të Parë për ta gjykuar këtë çështje nga fillimi.
Palët tashmë do të duhet të nisin një betejë sërish nga e para, në Gjykatën e Shkallës së Parë.

Çfarë thoshte vendimi i gjykatësit Agron Zhukri

Gjykata e Tiranës me anë të vendimit të gjykatësit Agron Zhukri, e konsideroi të gjithë procedurën e ndjekur për thirrjen e Kuvendit Kombëtar të Partisë Demokratike nga anëtarët e saj në 11 Dhjetor 2021, si të rregullt dhe bazuar në statutin e kësaj force politike.

Në vendimin e tij më 25 Mars të këtij viti, gjykatësi përcaktoi detyrimin që të gjitha ndryshimet statutore dhe ato për riorganizimin e strukturave partiake deri në zgjedhjen e organeve të reja drejtuese të reflektohen në regjistrin e partive politike.

Kuvendi Kombëtar i 11 Dhjetorit vendosi ndër të tjera shkarkimin e Lulzim Bashës si kryetar i Partisë Demokratike dhe drejtimin e përkohësisht të saj nga Komisioni i Rithemelimit, deri në zgjedhjen e strukturave të reja drejtuese të forcës politike.

Ky vendim i Zhukrit u dërgua në Gjykatën e Apelit nga grupimi i Enkelejd Alibeaj.

Reagimet pas dhënies së vendimit

I pari që reagoi pas vendimit të Gjykatës së Apelit ishte Sali Berisha. Në një deklaratë për shtyp nga selia blu ai tha se vendimi është përgatitur në zyrën e Kryeministrit Edi Rama. (Lexo më shumë) Ndërsa Enkelejd Alibeaj reagoi në rrjetet sociale. Ai tha se vendimi i sotëm i gjykatës vjen si ogur i mirë për demokratët, por nuk është triumf për askënd. (Lexo më shumë)

Sefa: PD vazhdon të drejtohet nga organet legjitime të saj

Përfaqësuesi ligjor i grupimit Alibeaj, Indrit Sefa, tha në një prononcim për mediat pas vendimit se ankimimi i tyre u pranua dhe çështja do të kthehet në Gjykatën e Tiranës. Sipas tij, PD vazhdon të drejtohet nga organet legjitime të saj dhe do të regjistrohet të hënën në KQZ.

Indrit Sefa: Së pari dua t’ju falënderoj për prezencën tuaj dhe për këtë seancë maratonë. Sot Gjykata  e Apelit vendosi rikthimin e çështjes në Shkallë të Parë, me një tjetër trupë gjykuese, praktikisht ankimi ynë i grupimit Alibeaj u pranua nga Gjykata dhe çështja do kthehet në Gjykatën e Rrethit Gjyqësor Tiranë. PD vazhdon të drejtohet nga organet legjimite të saj, do regjistrohemi të Hënën në KQZ.

Sefa u shpreh se afatin e përcakton gjykata se kur do të shqyrtohet kjo çështje në Shkallën e Parë.

Endrit Sefa: Organet legjitime do të vazhdojnë të administrojë të gjithë infrastrukturën e Partisë Demokratike. PD ka vetëm një seli. Nuk është betejë për zyra, as për vula, por për legjitimitetin.

Bylykbashi: Vendim për përjashtimin e opozitës nga zgjedhjet

Oerd Bylykbashi u shpreh se vendimi i sotëm i Sjykatës së Apelit ishte i paralajmëruar dhe i marrë nën presion. Sipas deputetit demokrat, vendimi përjashton opozitën nga zgjedhjet.

Oerd Bylykbashi: Vendim i marrë haptaz nën presionin e Edi Ramës, vendimi i paralajmëruar, presion mbi Gjykatën dhe sot në sallë, është vendim për përjashtimin e opozitës nga zgjedhjet, haptazi ka thyer çdo rregull që deri më sot ka vendosur jo vetëm legjislatori duke pranuar ankimin e një pale qe nuk përbën as minorancë, por i ka shërbyer përpjekjes së Edi Ramës që të mos ketë përballë një opozitë të vërtetë. PD ka treguar për më shumë se një vit vullnetin e qartë për të mos qenë palë me Ramën, sot Gjykata 11 Dhjetorin, atë Kuvend të jashtëzakonshëm, të gjithë vullnetin e demokratëve e përsëris, shënon një ditë të zezë për drejtësinë dhe politikën shqiptare. 32 vite pas themelimit të pluralizmit, pluralizmi u vra sot. Unë bëra komentin lidhur me vendimin, çdo hap tjetër do merret nga instancat e zgjedhura të PD-së, jo ato të Kryeministrit Rama. Do marrin vendime organet e partisë, dhe sigurisht populli opozitar ishte sot në shesh, përpjekjet tona do vazhdojnë.

Berisha pas vendimit të Apelit: Gjykatësit lexuan vendimin e shkruar në zyrën e Ramës

Kryetari i Partisë Demokratike, Sali Berisha, doli në një deklaratë për shtyp nga selia blu pas vendimit të Gjykatës së Apelit që ktheu për rigjykim çështjen për vulën dhe logon e PD.

Ai u shpreh se vendimi ishte i paralajmëruar dhe i përgatitur kohë më parë në zyrën e Kryeministrit Edi Rama. Kryedemokrati theksoi se ky vendim ka për synim të likujdimin e opozitës dhe pluralizmit politik në Shqipëri.

“Mirëmbrëma! Të dashur demokrate dhe demokratë, mbështetës të PD-së, qytetarë shqiptarë. Sot, në darkë Edi Rama komunikoi vendimin e tij me të cilin ka një synim, likuidimin e opozitës shqiptare dhe pluralizmit politik në Shqipëri, sot tre gjykatës në një proces të pashembullt kundër pluralizmit lexuan vendimin e përgatitur kohë më parë në zyrën e Ramës, të paralajmëruar kohë më parë trupit diplomatik ose ambasadorëve të caktuar, të akredituar në Tiranë.

Të paralajmëruar në Parlament. Por, sot gjithashtu jemi në një orë, në një kohë prove të vërtetë. Dhe unë kam besimin më të madh se demokratët shqiptarë janë të vendosur të mbrojnë me çdo kusht pluralizmin dhe partinë. Vazhdimi i skenarit të filluar me tradhtarin e kombit amerikan, të kaluar në një seri etapash, sot konkludoi me një vendim të pashembullt në historinë e Europës dhe të botës. Në procesin e sotëm gjyqësor dua të informoj shqiptarët se ata të cilët kishin kërkuar zyrtarisht të shpalleshin palë i thanë gjykatës se nuk kemi qenë palë në proces, por gjykatësit lexuan vendimin e shkruar në zyrën e Edi Ramës dhe anuluan 3 ditë pasi e mbajtën 9 muaj, anuluan 3 ditë para skadimit të afatit të regjistrimit në zgjedhje vetëm e vetëm se ishte urdhëruar nga Rama“, deklaroi Berisha.

Vendimi i Apelit, Berisha: Do të marrim të gjitha vendimet e duhura për të vazhduar misionin tonë

Sali Berisha, reagoi menjëherë pas vendimit të Gjykatës së Apelit që ktheu për rigjykim çështjen për vulën dhe logon e selisë blu. Ai u shpreh se PD-ja është sot një parti më e fuqishme dhe paralajmëroi se së shpejti do të mblidhen të gjitha forumet e saj. Mbi bazën e vendimit të sotëm, të cilin Berisha e konsideron si armiqësor dhe asgjesues nga qeveria, shtoi se do të merren të gjitha vendimet e duhura për të vazhduar misionin opozitar edhe më fuqishëm.

“PD është sot një parti më e fuqishme se kurrë. Ajo do mbledhë këto ditë forumet e saj dhe mbi bazën e këtij qëndrimi armiqësor, asgjesues të shpallur nga narkoshteti dhe Edi Rama do të marrë të gjitha vendimet e duhura për të vazhduar misionin e saj në mënyrën më të fuqishme”, tha Berisha.

Berisha u shpreh besimplotë se demokratët do të kapërcejnë çdo pengesë dhe vështirësi. Akuza pati për kryeministrin Rama ku tha se vendimi është shkruar në zyrën e tij.

“Ata (gjykatësit) kishin në sirtar vendimin e shkruar në zyrën e Edi Ramës për të ndëshkuar opozitën politike. Ky vendim vjen në një kohë kur opozita është e angazhuar në një revolucion demokratik, paqësor, me të cilën ajo është e betuar të përmbysë monizmin e Edi Ramës, është e betuar t’u rikthejë shqiptarëve votën e lirë. Në këtë kontekst unë u bëj thirrje anëtarëve dhe simpatizantëve të PD-së të ngrihen në lartësinë e misionit të tyre historik, misionit të shpëtimit të pluralizmit, të demokracisë, të shoqërisë shqiptare dhe Shqipërisë. Çdo shqiptar sot më shumë se kurrë pret nga guximi ynë, nga qëndrimi ynë, realizimin e këtij misioni. Unë kam besim të madh se siç kapërcyem në mënyrën më legjitime, më të vendosur, të gjitha kurthet, të gjitha përpjekjet, për asgjesimin tonë, ne do të kapërcejmë çdo pengesë dhe vështirësi. Opozita, është mision i lartë moral. Të mendosh të diktosh me tre gjykatës të cilët i gjen dhe urdhërojnë të lexojnë një vendim të parapërgatitur në zyrat tua mban të gjitha përgjegjësitë dhe dëshmon se je njëlloj si baba yt biologjik, njëlloj si daja yt biologji, një xhelat i normave demokratike, i lirisë dhe meriton çdo ndëshkim”, tha Berisha.

Vendimi i Apelit, Alibeaj: Të jemi më të bashkuar përballë Ramës, të lëmë mënjanë mosmarrëveshjet

Pas vendimit të Gjykatës së Apelit për Partinë Demokratike reagoi edhe Enkelejd Alibeaj. Ai u shpreh se vendimi i sotëm vjen si një ogur i mirë për demokratët. Sipas tij, kjo është dita kur të gjithë demokratët duhet të jenë më të bashkuar se kurrë për t’u përballur me kryeministrin Edi Rama dhe për të lënë mënjanë grindjet dhe mosmarrëveshjet.

“Vendimi i sotëm i Gjykatës së Apelit vjen si një ogur i mirë për demokratët, që prej më shumë se 1 viti po kalojnë një periudhë të vështirë. Kjo është dita kur të gjithë ne, demokratët duhet të jemi më të bashkuar se kurrë për tu përballur me regjimin e Edi Ramës dhe të lëmë mënjanë grindjet dhe mosmarrëveshjet mes nesh të shkaktuara nga mentaliteti i vjetëruar i politikës shqiptare”, tha Alibeaj.

Në reagimin e tij, ai fton të gjithë demokratët që të lënë mënjanë pakënaqësitë dhe të jenë së bashku në përballjen për zgjedhjet vendore më 14 Maj.

“Ftojmë të gjithë demokratët që të lenë mënjanë pakënaqësitë dhe të jemi bashkë në përballjen e 14 Majit. Me kandidatët më të mirë që nuk vendosin interesin personal të askujt mbi interesin e demokratëve. Nuk është ditë triumfi për askënd. Është ditë reflektimi i thellë, për ato që kemi kaluar dhe për te përballuar të ardhmen, që nuk është e thjeshtë, por as e pamundur. Për t’u dhënë shqiptarëve ditë më të mira”, tha Alibeaj.

Vendimi i Apelit për PD-në, Meta: Akt i paralajmëruar i Ramës përmes gjykatës së kapur

Kreu i Partisë së Lirisë, Ilir Meta, thotë se “Akti i paralajmëruar i Edi Ramës përmes gjykatës së kapur nuk e ndryshon dot fatin e tij”.

Reagimi i ish-Presidentit vjen pas vendimit të Gjykatës së Apelit të Tiranës që riktheu për rigjykim çështjen e vulës dhe logos së Partisë Demokratike.

Meta shprehet se Rama është tmerruar nga zgjedhjet. Ai thekson se opozita do të dalë fitimtare përballë tij më 14 Maj dhe do të jetë shumë më e motivuar dhe e organizuar se më parë.

“Edi Rama ky frikacak i tmerruar nga zgjedhjet do ta ketë opozitën fitimtare përballë tij në 14 maj shumë më të motivuar dhe shumë më të organizuar se kurrë më parë. Fitorja nuk ndalet”, shprehet Meta.

Vendimi i Apelit, Këlliçi: Sot u dha një goditje ndaj pluralizmit, Rama dhe Veliaj kanë frikë nga vullneti i qytetarëve

Kandidati i PD-së për bashkinë e Tiranës Belind Këlliçi ka reaguar pas vendimit të sotëm të Gjykatës së Apelit për vulën dhe logon e Partisë Demokratike.

Përmes një postimi në Facebook, Këlliçi thotë se vendimi tregon se pala tjetër (referuar grupimit të Alibeajt) është e dëshpëruar, aq sa i duhet të përdorë marifete për të manipuluar zgjedhjet.

“Sot u dha një goditje ndaj pluralizmit. Ata kanë frikë nga vullneti i qytetarëve, sepse Veliaj ka lënë pas dore banorët e Tiranës. Kudo që shkoj në qytetin tim, njerëzit janë të bindur se ka ardhur koha për ndryshim.”, thotë Këlliçi në reagimin e tij, krahas videos së Kuvendit të 11 Dhjetorit 2021.

Reagimi i plotë:

Sot u dëshmua që Edi Rama dhe Erion Veliaj po lëvizin çdo gur, çdo instrument që kanë në dorë, për të mos lejuar zgjedhje të lira dhe garë të ndershme. Ata kanë frikë nga ju, nga vota e lirë.

Vendimi i sotëm tregon se pala tjetër është e dëshpëruar përderisa i duhet që të përdorë marifete të pista për të manipuluar zgjedhjet. Sot u dha një goditje ndaj pluralizmit. Ata kanë frikë nga vullneti i qytetarëve, sepse Veliaj ka lënë pas dore banorët e Tiranës. Kudo që shkoj në qytetin tim, njerëzit janë të bindur se ka ardhur koha për ndryshim.

E dënoj me forcë këtë akt të shëmtuar. Gjithashtu garantoj demokratët dhe qytetarët që kjo pengesë e re nuk do të na ndalojë dot në betejën tonë për votën, për lirinë e zgjedhjes, për kthimin e Bashkisë së Tiranës në shinat e ligjshmërisë dhe në funksion të interesit publik.

Nuk ka pushtet, regjim, nuk ka dhunë e para, që të mund të ndalë vullnetin e qytetarëve dhe banorëve të Tiranës, për ndryshim.

Një forcë politike nuk e bën vula. Atë e bën fryma, shpirti dhe njerëzit. Prandaj unë sot jam më i motivuar se kurrë, bashkë me ju më i fortë dhe i vendosur, për t’ia rikthyer Tiranën qytetarëve të saj.

*Ora 18:53 – Gjykata e Apelit ka vendosur që të kthejë në Shkallë të Parë vendimin e dhënë nga gjykatësi Agron Zhukri për vulën dhe logon e Partisë Demokratike.

Gazetarja Glidona Daci, e cila prej orën 11:00 të ditës së sotme ka ndjekur procesin nga afër tha se “vendimi i Gjykatës së Apelit nuk është se dha të drejtën për legjitimimin e Enkelejd Alibeajt në këtë proces, por Apeli tha se do të duhet që kjo çështje të rikthehet edhe njëherë për rigjykim në Shkallë të Parë ku do të duhet të shprehet kjo gjykatë, duke qenë se tashmë vendimin i dhënë nga gjyqtari Agron Zhukri është shpallur nul”.

Të gjitha zhvillimet në Gjykatën e Apelit prej orës 11:00

Ora 16:33 – Ka përfunduar seanca gjyqësore për vulën dhe logon e Partisë Demokratike. Gazetarja e Klan News Glidona Daci raporton se shyqrtimi gjyqësor përfundoi pas 5 orëve dhe se trupa gjykuese e Apelit është tërhequr për të marrë vendimin.

“Trupa gjykuese është tërhequr për vendim, por ende nuk kanë caktuar një orë se kur do dalin nga Dhoma e Këshillimit”, u shpreh Daci.

Mësohet se përfaqësuesi ligjor i Enkeled Alibeajt, Indrit Sefa ka kërkuar prishjen e vendimit të gjyqtarit Agron Zhukri, kthim për rigjykim ose pushim të çështjes, ndërkohë pala tjetër pretendon se grupimi Alibeaj nuk janë të ligjshëm.

Ora 16:28 – Gjykata tërhiqet për vendim

-Ivi Kaso thotë se nuk duhet të legjitimohet në ankim pala dhe kërkoi rrëzimin e ankimit të cilin e konsideron të pabazuar në ligj dhe në prova.

-Indrit Sefa kërkon prishjen e vendimit të Shkallës së Parë, pushimin e gjykimit ose kthimin për gjykim në Shkallë të Parë.

Ora 16:26 – Mbyllet shqyrtimi gjyqësor i çështjes

Ora 15:35 – Caktohet pushim, seanca rifillon në orën 16:00.

-Përfaqësuesi i grupit Alibeaj, Indrit Sefa, nisi fjalën e tij në seancën në themel.

-Gjykata vendosi në Dhomë Këshillimi që të shprehet në fund për të gjitha kërkesat.

–Gjykata e Apelit tërhiqet për vendim të ndërmjetëm për t’u shprehur për kërkesën paraprake të bërë nga Ivi Kaso për moslegjitimimin e grupit Alibeaj.

-Indrit Sefa: Dua t’i bëj ca pyetje palës kërkuese. E para, pala pretendoi faktin që nuk është përdorur nga PD asnjë mjet procedurial për të ndëhyrë në gjykim. Neni 189: Kushdo mund të ndërhyjë në një proces gjyqësor kur pretendon, duke ngritur padi.

-Ivi Kaso kërkon që të mos legjitimohet grupimi i Enkelejd Alibeajt dhe të rrëzohet kërkesë-padia.

-Ivi Kaso: Enkelejd Alibeaj nuk është konfirmuar asnjëherë në detyrë. Pasi nuk është mbledhur Këshilli Kombëtar i Partisë Demokatike për ta zgjedhur atë kryetare. Alibeaj është komanduar në detyrë përmes një deklarate nga Sekretari i Përgjithshëm i cili është shkarkuar nga Kuvendi i 11 Dhjetorit.

-Ivi Kaso: Nuk duhet të ishte pranuar ankimi i deputetit Enkelejd Alibeaj duke qenë se personi që ka paraqitur ankimin nuk ishte palë në proces.

-Indrit Sefa: Ky nuk është momenti për të bërë këto kërkesa, pasi nuk jemi në këtë fazë proceduriale. Gjykata duhet t’i shqyrtojë të gjitha elementet në tërësinë e saj. Komisioni i Rithemelimit nuk ka autoritetet juridik dhe duhet të ketë prokurë të posaçme që në momentin e parë që i është drejtuar gjykatës. Edhe Shkalla e Parë ka gabuar kur është legjitimuar Ivi Kaso për të paraqitur padinë në Shkallën e Parë. Ka një konfondim, a ka legjitimitet Komisioni i Rithemelimit?

-Ivi Kaso kërkesë paraprake: Gjykata të konstatojë mospranim e ankimit, pasi gjykata është investuar nga një palë që nuk legjitimohet. Sipas nesh vendimi gjyqësor që e ka lejuar ankuesin është marrë në kundërshtim të ligjit.

-Ivi Kaso: Gjykata është investuar nga një palë jo legjitime në këtë proces.

–Ivi Kaso: Kërkoj që gjykata të mos e pranojë padinë sepse gjykata është vënë në lëvizje nga një palë që nuk është pjesë e procesit.

-Përfaqësuesit ligjorë të Enkelejd Alibeajt kërkojnë prishjen e vendimit ose kthimin e çështjes për rigjykim në Shkallë të Parë.

***

Treshja e gjyqtarëve Elona Mihalin, Irida Kacerja dhe Astrit Kalaja do të vendosë sa i përket ankimit të Partisë Demokratike ndaj vendimit të 25 Marsit 2022 të gjyqtarit të Shkallës së Parë, Agron Zhukri.

Grupi i Sali Berishës përfaqësohet nga Ivi Kaso, Oerd Bylykbashi dhe Ledina Mandia.

Grupi Enkelejd Alibeajt përfaqësohet nga Indrit Sefa dhe Rezart Kthupi.

/tvklan.al