Policia e Modena-s në Itali ka sekuestruar 172 kilogramë kokainë me një vlerë tregu 25 milionë Euro. Tre shqiptarë janë vënë në pranga. Mes tyre motër e vëlla, 27 e 20 vjeç dhe një burrë 42 vjeç.
Autoritetet italiane thonë se aksioni për kapjen e drogës erdhi pas bashkëpunimit me policinë shqiptare. Këta të fundit kanë shkëmbyer informacione me kolegët italianë për mundësinë e arritjes në Modena të një makine me dy qytetarë shqiptarë brenda.
Shanset ishin që ata të takoheshin me një korrier për të përfunduar një marrëveshje të rëndësishme kokaine. Makina, ku ndodheshin në fakt motër e vëlla, e që sipas mediave italiane ishte nisur nga Shqipëria, u ndoq nëpër provincën e Reggio Emilia-s.
Mjeti tip Renault i tyre ndaloi në zonën e Rubiera-s ku agjentët e policisë vëzhguan edhe ardhjen e një kamioni dhe shkëmbimin e një çante të verdhë mes shoferit dhe dy të rinjve.
Në këtë moment, hetuesit vendosën të ndërhyjnë dhe arrestuan tre shqiptarët.
Brenda çantës u gjetën 15 pako kokainë me një peshë totale prej 16.3 kilogramësh kokainë. Por zbulimi më i madh do bëhej në rimorkion e kamionit. Atje ishte krijuar një hapësirë boshe ku u gjetën 145 pako të tjera. Bëhej fjalë për 156 kilogramë kokainë.
Por ajo që bën përshtypje është paketimi i drogës. Siç mund të duket, pjesa më e madhe e tyre mban logon e klubit të futbollit shqiptar, Tiranës.
Disa të tjera kanë një paketim të verdhë, disa imazhin e një kacabuni të kuq dhe disa të tjera me flamurin e Brazilit./tvklan.al
