Kryetari i Bashkisë së Tiranës, Erion Veliaj ka reaguar për herë të dytë nga qelia një ditë pas arrestimit.

Në Facebookun e tij, Veliaj shkruan se çështja penale ndaj tij dhe bashkëshortes është një histori, sipas tij, e sajuar nga prokurori i dosjes, të cilin e konsideron individ pervers.

Në lidhje me akuzën e SPAK ndaj Ajola Xoxës ku ndër të tjera thuhet se ka shpenzuar mbi 600 mijë Euro për blerje online, Erion Veliaj shprehet se janë shumë herë më të vogla në vlerë dhe janë të deklaruara për shfaqjet artistike të fondacionit kulturor që drejton bashkëshortja.

Veliaj thotë se në banesën e tyre, agjentët e BKH nuk kanë gjetur as fustanet apo varëset e shtrenjta që pretendohet.

Në lidhje me këto hetime, Erion Veliaj ka masën e sigurisë arrest në burg, bashkëshortja e tij arrest në shtëpi, biznesmeni Elman Abule arrest në burg, ndërsa 5 biznesmenë të tjerë (Gentian Sula, Meriman Palushi, Fatmir Bektashi, Sokol Kryeziu, Shkëlqim Fusha) kanë masën detyrim paraqitje.

Prokurorët e dosjes së Erion Veliajt janë Olsi Dado dhe Altin Dumani.

Reagimi i Erion Veliajt:

Të dashur miq,

Natën e parë në qeli, i marrë forcërisht larg familjes dhe me idenë që sot në mëngjes im bir nuk do të shkonte në shkollë as me mua, as me të ëmën, e kam kaluar pa gjumë në sy. I vetmi ngushëllim ishte që nuk mund të shihja dhe as dëgjoja qenërinë, që me siguri më është vërsulur mbrëmë në studiot e kafshimeve dhe jargëve televizive.

Ndjesë për çfarë ju kanë dëgjuar veshët dje deri vonë dhe sot që në sabah në ato kanale gjirizi. Por, dua të jini të sigurt se historia që po më tregon mua si një kriminel të korruptuar, i cili ka fshehur pasuri dhe pastruar para bashkë me të shoqen, është e sajuar nga një individ pervers, prokurori i çështjes tonë.

Ai, për shembull, ka shkruar në akt-akuzën haluçinante se ime shoqe ka harxhuar mbi gjysëm milionë euro për blerje online fustanësh dhe bizhuterish. Ky pervers, që më pyeste mua për fustanet e gruas dhe më tregonte gjatë marrjes në pyetje se si shkonte kontrollonte gruan e tij në punë, nuk ka dashur t’ia dijë për shpjegimet e mia dhe të sime shoqeje. Blerjet online janë të gjitha të deklaruara dhe në një shumë disa herë më të vogël, janë bërë për shfaqjet artistike të fondacionit kulturor të sime shoqeje. Faturimi i asaj shume në një akt-akuzë, si një lumë parash i derdhur për luks, është një perversitet kriminal.

Kur i thosha se kjo ishte e vërteta dhe kur në fakt, në shtëpinë tonë nuk ka gjetur as fustane mijëra eurosh, as bizhuteri me ndonjë vlerë të veçantë, ai zvarranik si i dalë nga qenefët e dikurshëm të Sigurimit të Shtetit zgërdhihej dhe më tregonte se si i binte violinës kur ishte i vogël.

A ju duket rastësi që në të gjithë historinë e gojës së kërmës Sali, ky violinist i mbetur në tentativë është i vetmi individ që pasi e ka akuzuar si kriminel një ditë më parë, Saliu i ka kërkuar falje të nesërmen? Mua jo, se që të të kërkojë falje Saliu, do duhet realisht t’i bësh një shërbim të pamundur. Po kjo s’është akuzë, është vetëm një opinion.

Kalofshi mirë sot miq dhe kujt më beson i jam falenderues, kujt s’më beson i jam mirëkuptues.

/tvklan.al