Pas dy fitoreve në Superkupën e Italisë, ndaj Juventusit dhe Interit, trajneri i Milanit, Sergio Conceicao pret 3 pikët e para në kampionat.

Në prag të sfidës me Cagliari-n në Serie A, tekniku kuqezi deklaroi se lojtarët nuk mund të kënaqen vetëm me fitimin e Superkupës.

Sipas tij, ata që ngopen vetëm me këtë sukses, nuk kanë vend te Milani.

“Unë mendoj se dikush që është i ngopur vetëm me një Superkupë nuk mund të punojë në Milano. Ne u kënaqëm shumë dhe e merituam atë trofe, por realiteti është që jemi 17 pikë larg kreut të tabelës. Një klub me historinë e Milanit, që ka fituar 19 tituj të Serisë A dhe 7 trofe të Champions League, nuk mund të kënaqet me kaq. Nga nesër, duhet të fillojmë të fitojmë dhe të bindim për të arritur objektivat më të larta”, u shpreh tekniku portugez.

Ndeshja Milan-Cagliari, do të luhet të Shtunën, duke nisur nga ora 20:45. /tvklan.al