Kryetari i Bashkisë së Tiranës, Erion Veliaj, bashkëshortja e tij Ajola Xoxa dhe gjashtë biznesmenë kanë dalë sot para gjykatës për t’u njohur me masën e sigurisë. Seanca u ndërpre për disa orë, por ka rinisur prej orës 13:30.
Siç raporton gazetarja Bleona Metushi, fillimisht në seancë fjalën e kanë pasur prokurorët e çështjes përballë gjyqtarit të hetimit paraprak Erion Bani, i cili ka lëshuar edhe masat në mungesë për të hetuarit e kësaj çështjeje.
Në momentin që raportoi gazetarja në Gjykatën e Posaçme ishte momenti i fjalës së personave nën hetim.
“Konkretisht kryebashkiaku Erion Veliaj ka pasur fjalën e tij dhe është duke mbajtur pretendimet kundër akuzave të ngritura nga SPAK. Pas tij do ketë fjalën e tij edhe avokati mbrojtës dhe të hetuarit e tjerë në këtë proces”, raportoi Metushi.
Praktika e Gjykatës së Posaçme të Shkallës së Parë në lidhje me verifikimin e masave të sigurisë dhe marrjen në pyetje ka ndodhur që brenda ditës të shpallë vendimin e saj për vijimin ose jo të masave.
Sa kohë kjo seancë nisi rreth orës 13:30 dhe janë disa të hetuar që do të mbajnë fjalën e tyre, do të ngelet në dorën e gjyqtarit Bani, nëse pas përfundimit të dëgjimit të palëve do ta shpallë sot vendimin në lidhje me vijimin ose jo të të njëjta masave që lëshoi të dielën në ngarkim të kryebashkiakut dhe të hetuarve të tjerë.
Përballë gjykatës aktualisht nuk ka mbështetës të Veliajt. Ata u mblodhën fillimisht në mëngjes dhe kanë njoftuar se do grumbullohen sërish në orën 17:00 pasi e konsiderojnë hetimin ndaj tij si të padrejtë dhe në mungesë të provave. Në mbështetje të Veliajt në ambientet e SPAK gjatë orëve të pasdites u pa edhe Helena Kadare, bashkëshortja e shkrimtarit të ndjerë Ismail Kadare, që njihen si miq të familjes Veliaj.
Tv Klan
