Në kuadër të planit operacional “Sundimi i ligjit” është arrestuar 32-vjeçari E.D., i cili ishte i shpallur në kërkim, pasi akuzohej për veprat penale “Shtrëngimi me anë të kanosjes ose dhunës për dhënien e pasurisë”, kryer në bashkëpunim, dhe “Prodhimi dhe mbajtja pa leje e armëve, armëve shpërthyese dhe municionit’.

Ai akuzohet se në bashkëpunim me vëllanë e tij, 1 vit më parë kanosën një 34-vjeçar që ky i fundit të ju jepte 200 mijë Euro. Dyshohet se kjo shumë parash rrjedh nga veprimtari të përbashkëta kriminale në fushën e narkotikëve të kryera jashtë vendit.

“Ky shtetas ishte shpallur në kërkim kombëtar, pasi Gjykata e Shkallës së Parë e Juridiksionit të Përgjithshëm Elbasan i ka caktuar masën e sigurisë “Arrest në burg”, për veprat penale “Shtrëngimi me anë të kanosjes ose dhunës për dhënien e pasurisë”, kryer në bashkëpunim, dhe “Prodhimi dhe mbajtja pa leje e armëve, armëve shpërthyese dhe municionit’.

Shtetasi E. D., më datë 12.08.2023, në bashkëpunim me vëllanë e tij (i arrestuar më parë, në kuadër të operacionit “Pressure”), dyshohet se kanë kanosur një shtetas 34 vjeç, që ai t’iu jepte shumën 200 000 euro, që dyshohet se rrjedh nga veprimtari të përbashkëta kriminale në fushën e narkotikëve, të kryera jashtë vendit.”

Materialet procedurale i kaluan Prokurorisë, për veprime të mëtejshme./tvklan.al