Një programacion festiv, të larmishëm, me muzikë shqiptare, humor, nostalgji dhe të tjera surpriza do të sjellë Televizioni Kombëtar Klan në datat 31, 1 dhe 2 Janar.

Në natën më të rëndësishme, atë të ndërrimit të viteve, 100 Këngë nga Bota, do t’ju shoqërojë në një transmetim maratonë, duke sjellë në shtëpinë tuaj, muzikën e mirë shqiptare me artistët më të mirë të skenës, si dhe të ftuar specialë.

“Natën e ndërrimit të viteve për shqiptarët do të jetë spektakli “100 Këngë nga Bota”, show final dhe festiv nga Adi Hila, Bledi Laço dhe Pandi Laço në bashkë prezantim me Marsela Çibukajn. Hitet më të bukura shqiptare do të jenë premierë në këtë natë festive”, shprehet Albert Dumani, Drejtor i Programacionit në Tv Klan.

“Ashtu siç e kemi traditë në shtëpitë tona, ose traditë si komb, do festojmë bashkërisht. Kryesisht me muzikë të mirë, me muzikë shqiptare”, shton producenti Bledi Laço.

Në më shumë se 4 orë spektakël, nuk do të mungojnë surprizat, lojërat, por as humori dhe momentet e veçanta që do ju shoqërojnë deri në mesnatë, për t’ju thënë “Gëzuar”.

“Le të zbulojmë, Artiola Toska, Albina Kelmendi, Ervis Behari, Remzie Osmani… Nuk do të mungojnë edhe notat e humorit apo lojërat shumë interesante. Momente shumë të këndshme të ndërtuara enkas me të ftuarit tanë”, thotë Bledi Laço.

Po aq i larmishëm do të jetë programacioni i Televizion Klan, edhe në netët e para të 2025-tës, ku “Prime Time” do të vijë me një koncert të Alban Skenderajt.

“Eventi unik i zhvilluar në stadiumin “Air Albania” do të vijë premierë ekskluzive dhe absolute në Televizionin Klan. Në 31, 1 dhe 2 do të ketë premierë ekskluzive të një prej serialeve më të klikuar në Amazone, bëhet fjalë për Origjinën e FIFA-s. Në datën 1 Janar në orën 18:20 do të jetë telekomedia “Edhe unë dua të qesh”, prodhimi i parë televiziv i Televizionit Klan”, shprehet Albert Dumani.

Nuk do të mungojnë në ditët e para të vitit të ri premiera të kinematografisë botërore, por as serialet më të ndjekur në çdo vend që janë shfaqur e po shfaqen, të cilët vazhdojnë të mbajnë mbërthyer shqiptarët para ekranit të Tv Klan edhe gjatë 2025-ës.

Tv Klan