Portieri i Kombëtares Shqiptare, Thomas Strakosha i konsideron dy finale ndeshjet e muajit Nëntor, të vlefshme për Ligën e Kombeve.

Të dyja luhen në stadiumin “Air Albania” në Tiranë; kundër Çekisë më 16 Nëntor dhe ndaj Ukrainës më 19 Nëntor.

Në një konferencë për shtyp, Strakosha tha se ndeshja me Çekinë e para 1 muaji ku kuqezinjtë humbën 2 me 0, mund të jetë më e keqja në 2 vitet e fundit.

Megjithatë, tani situata tani është ndryshe dhe kuqezinjtë janë të motivuar për të dhënë maksimumin në fushë.

“Në Çeki ndoshta kemi luajtur ndeshjen më të keqe në 2 vitet e fundit. Nuk jemi futur siç duhet, pësuam gol në minutat e para. Prandaj vetëm më mirë mund të bëjmë. Duhet të përqëndrohemi më shumë. Tani kemi 2 finale brenda në shtëpi. Jemi të përgatitur mirë, besoj do japim maksimumin. Ekipi është pak a shumë njësoj, por me më shumë eksperiencë. Tani jemi të barabartë me pikët. Kemi 2 finale në shtëpi me publikun dhe të japim maksimumin me zemër. Besoj do ja dalim”, u shpreh Strakosha.

/tvklan.al