Edhe pse shumë nga qytetet bregdetare kanë hapur tashmë sezonin turistik, plazhi i Shëngjinit duke se nuk është akoma gati për të pritur pushuesit  e parë. Papastërtitë e shumta gjatë gjithë vijës bregdetare si dhe ndërtimet pa leje kanë rënduar tej mase situatën mjedisore.

Si të mos mjaftonte kjo rruga që të çon në plazhin e Kunes është tërësisht e amortizuar, duke e bërë të vështirë kalimin e njerëzve dhe mjeteve. Nga ana e tyre autoritetet lokale presin datën 1 qershor për të çelur sezonin turistik.

“Do të bëjmë frezimin e rërës, çka do të thotë problemi i plazhit do të jetë ndër vitet më specifike. Të arrijmë të bëjmë nivelimin e atyre gropave, ose atyre pikave që nuk normalizojnë udhëtimin e kënaqshëm të të gjithë atyre që preferojnë të vijnë me makina dhe më fëmijë të natyrave e moshave të ndryshme.”

Plazhi i Shëngjinit është një nga destinacionet më të rëndësishme turistike në veri të vendit dhe çdo vit pret pushues të shumtë nga Kosova dhe Maqedonia, por duket se investimet e kryera për ndriçimin e rrugës dhe furnizimin 24 orë me ujë dhe energji elektrike nuk do të mjaftojnë për ta kthyer atë në një plazh të frekuentuar për shkak të keqpërdorimit në vite, situatë që fatkeqësisht vazhdon ende./tvklan.al