Shtetet e Bashkuara të Amerikës kanë kritikuar diplomacinë kosovare në arritjet e saj për njohjen e shtetit të ri. Gazeta “Telegraf” thotë, se qeveria amerikane nuk është e kënaqur me ritmin e njohjeve dhe aktivitetin e pakët lobues të Prishtinës zyrtare për sigurimin e të paktën 97 njohjeve të cilat janë të nevojshme që Kosova të aplikojë për t’u anëtarësuar në OKB në shator, gjatë mbledhjes së Asamblesë së Përgjithshme.

Deri më tani sipas Radiotelevizionit të Kosovës shteti i ri është njohur nga rreth 41 vende të botës. Gjatë vizitës së disa ditëve më parë në Prishtinë zëvendës ndihmësja e sekretares së shtetit Rosmari Di Carlo i sugjeroi qeverisë kosovare, që të kërkojnë edhe ndihmën e ish-krye ndërmjetësit finlandez Marti Ahtisari dhe ish zëvendësit të tij Albert Rohan të interesuar të lobojnë për Kosovën.

E megjithatë këta 2 diplomatë nuk janë kontaktuar nga qeveria e Kosovës. Sipas “Telegraf” humbja e hapit të Prishtinës zyrtare po shfrytëzohet nga Serbia, e cila është në përgatitje të rezolutës kundër pavarësisë që do të hidhet në votim në Asamblenë e Përgjithshme./tvklan.al

Gazetare: Urita Dokle