Policia ka gjetur motorin e djegur të autorit të vrasjes së Bujar Nasufit, i cili u qëllua disa herë me armë zjarri teksa ndodhej në makinë.

Uniformat blu njoftojnë se motori është gjetur i shkrumbuar në “Kodrat e Sharrës”. Tashmë është duke iu nënshtruar një ekspertize të thelluar nga Drejtoria e Policisë së Tiranës.

Gazetari i Klan News, Besar Bajraktaraj raporton se gjatë kontrollit në afërsi të vendit ku u dogj motori, hetuesit kanë gjetur të djegur edhe armën e zjarrit të vrasjes së Bujar Nasufit. Arma është automatik i shkurtër. Arma është dërguar gjithashtu në laborator për ekspertizë.

Ngjarja e rëndë ndodhi mbrëmjen e djeshme në afërsi të banesës së Bujar Nasufit në vendin e quajtur “Pallati me Shigjeta” në Tiranë.

Nga verifikimi i kamerave të sigurisë, vrasësi ka dyshime se e ka pritur viktimën në afërsi të banesës së tij, në momentin që 56-vjeçari është kthyer në shtëpi së bashku me bashkëshorten e tij.

Burime bëjnë me dije se autori i është afruar viktimës sapo ai është ndarë nga gruaja e tij, e cila ka zbritur nga makina dhe i është drejtuar banesës pak metra larg vendit ku ndodhi ngjarja, në rrugën “Myrte Zeneli”.

Grupi hetimor po kryen veprime intensive për sekuestrimin e provave që do t’i shërbejnë hetimit për zbardhjen dhe dokumentimin ligjor, identifikimin dhe kapjen e autorit/ëve.

Njoftimi i Policisë:

Në lidhje më ngjarjen e ndodhur mbrëmjen e djeshme ku u vra me armë zjarri shtetasi B.N, ju informojmë se: Në vendin e quajtur “Kodrat e Sharrës” gjatë krehjes së zonës, shërbimet e Policisë kanë gjetur një motomjet të djegur, i cili dyshohet se i përket autorit.

Vijon puna nën drejtimin e Prokurorisë, për dokumentimin ligjor të ngjarjes, si dhe po kryhen të gjitha veprimet hetimore përkatëse me qëllim identifikimin dhe kapjen e autorit/ve.

Grupi hetimor po kryen veprime intensive për sekuestrimin e çdo prove që do ti shërbejë hetimit për zbardhjen dhe dokumentimin ligjor, identifikimin dhe kapjen e autorëve.

/tvklan.al