Euro 2024 
Çdo fillim e ka një fund… edhe për Sokol Cikalleshin.
Sulmuesi kuqezi njoftoi këtë të martë se rrugëtimi i tij me ekipin kombëtar të Shqipërisë ka përfunduar.
Në një postim në rrjetet sociale, bomberi nga Kavaja shpreh mirënjohjen e tij për ato që ka arritur në fushën e blertë me kombëtaren.
Në fund, Sokol Cikalleshi, pati një urim të veçantë për shokët e tij që do të shkojnë në Gjermani e do të na përfaqësojnë në Euro 2024.
Sokol Cikalleshi: Rrugëtimit tim me ekipin kombëtar të futbollit i erdhi fundi
“Fundi i një rrugëtimi. Rrugëtimet janë të bukura, me uljet e ngritjet e veta. Gjatë rrugëtimeve nëse gjërat i ke bërë siç duhet, fundi është i lumtur, paçka se jo gjithmonë e zgjedhim vetë mënyrën.
Ka qenë një krenari dhe emocion i papërshkrueshëm, përfaqësimi i fanellës së ekipit kombëtar të futbollit. Bartja e emocioneve të një kombi mbi shpinë, është sa privilegj, aq edhe një përgjegjësi, e cila më ka bërë të përunjur dhe mirënjohës ndaj çdokujt që besoj, ndaj çdokujt që më dha kurajo për të vazhduar e padyshim në mënyrë të veçantë ndaj çdokujt që brohoriti për mua.
Ashtu si çdo fillimin e ka një fund, edhe rrugëtimit tim me ekipin kombëtar të futbollit i erdhi fundi. Ndihem i lumtur për çka bëra gjatë këtij rrugëtimi, ku dhashë pa kursimin më të vogël, pikën e fundit të djersës edhe shpitin për të bërë më të mirën e mundshme.
Falenderoj Zotin për gjithçka më ka dhënë në jetë, familjen për mbështetjen, tifozët kuqezi që meritojnë shumë më shumë sesa ne kemi dhënë në fushën e blertë. I lutem Zotit që shokët që do të vijojnë rrugëtimin në Euro 2024 të kenë sukses dhe të bëjnë një paraqitje dinjitoze”, shkroi Cikalleshi.
Sokol Cikalleshi, 59 ndeshje me Shqipërinë. Ka shënuar 13 gola
Sokol Cikalleshi nuk u përfshi në listën e Sylvinho-s për Euro 2024.
Sulmuesi që aktualisht luan për Konyaspor në Turqi numëron 59 ndeshje me përfaqësuesen kuqezi. Ai ka shënuar 13 gola duke u dhuruar tifozëve kuqezi emocione të pafundme.
Cikalleshi ka qenë pjesë e skuadrës së De Biasit që na përfaqësoi në Euro 2016 në Francë./tvklan.al
