Në frontin e luftës së Ukrainës duket se po hidhen hapat e para drejt uljes së armëve. Këto filmime tregojnë pasojat e shkatërrimeve që kanë lënë pas luftimet në disa fshatra të rajonit rus të Kurskut, aty ku ushtarët ukrainas kanë nisur të tërhiqen.
Pamjet u publikuan nga ushtria ruse që ka nisur të rikthejë kontrollin në këto zonat e rëna në duart e ukrainasve që prej gushtit 2024.
Presidenti rus Vladimir Putin zhvilloi të mërkurën një vizitë të paparalajmëruar në zonat nga ku ukrainasit janë larguar në Kursk. Ushtarët e kapur ukrainas, ai tha se autoritetet ruse duhet t’i trajtojnë si terroristë.
Zhvillimet vijnë pasi ukrainasit sinjalizuan gatishmërinë për paqe në takimin me amerikanët në Arabinë Saudite të martën.
Plani i armëpushimit 30-ditor i paraqitet këtë të enjte palës ruse nga i dërguari i posaçëm i Shtëpisë së Bardhë Steve Witkoff.
Zëdhënësja e ministrisë së Jashtme të Rusisë, Maria Zaharova tha se Moska ishte gati të diskutonte që sot për paqen.
Ndërkaq Sekretari i Përgjithshëm i NATO-s, Mark Rutte do të diskutojë këtë të enjte në Shtëpinë e Bardhë me presidentin amerikan Donald Trump për Ukrainën.
Tv Klan
